سولتۇستىك قازاقستان وبلىسىندا قاراۋسىز، بوس قالعان مەكتەپتەر اۋكتسيونعا شىعارىلىپ، ساتىلىمعا قويىلعان. بۇل تۋرالى پەتروپاۆلوۆسك.news سايتى حابارلادى دەپ جازادى Baq.kz.
سقو جامبىل اۋدانى ۇلگى اۋىلىنداعى مەكتەپ قۇنى - 3,7 ملن تەڭگەگە باعالانعان. دەگەنمەن اۋكتسيوننىڭ شارتى بويىنشا ەڭ تومەنگى باعاسى – 1 تەڭگە.
ۇلگى اۋىلىندا مەكتەپكە باراتىن بالا جوق. بۇل اۋىلدا قازىرگى كەزدە 18 ادام تۇرادى. وسىدان 10 جىل بۇرىن 235 ادام تۇرعان ەكەن. ال اۋىلدىڭ تىنىسى تارىلماي، قايناپ تۇرعان ۋاقىتتا 400-دەي ادام تۇرعان.
اۋكتسيون 10 قاراشاعا بەلگىلەنگەن ەكەن.
قۇجات بويىنشا مەكتەپ 1972 جىلى سالىنعان، اۋماعى 471 شارشى مەتردى قۇرايدى. عيماراتتىڭ جاعدايىنا قاراپ، 3,7 ملن تەڭگەگە باعالانعان ەكەن. قاڭىراپ قالعان اۋىلدا ەشكىم بولماعاندىقتان، مۇنداي باعاعا ساتىپ الۋشى بولماي تۇر. ساراپشىلار اۋكتسيون شارتى بويىنشا ساۋدا-ساتتىق تىم تومەندەگەن جاعدايدا، مەكتەپتى ءبىر تەڭگەگە ساتىپ الۋعا بولادى دەيدى.
بۇعان ۇقساس جاعداي جامبىل اۋدانى روجدەستۆەنكا اۋىلىندا دا بار.
مۇندا اۋماعى 1264 شارشى مەتردى قۇرايتىن، 2 قاباتتى مەكتەپ اۋكتسيونعا قويىلعان. ونىڭ سمەتالىق قۇنى - 9,4 ملن تەڭگە، ەڭ تومەنگى باعا – 1 تەڭگە. قازىر بۇل اۋىلدا 13 ادام تۇرادى. وتكەن جىلى 44 ادام تۇرعان ەكەن. 20 جىل بۇرىن 372 تۇرعىنى بار اۋىل بولعان.
ارى قاراي ءتىزىم بويىنشا، اقبالىق اۋىلىنداعى ەكى قابىتتى مەكتەپ. اۋماعى 562 شارشى مەتر. باستاپقى باعا - 1,7 ملن تەڭگە. ەڭ تومەنگى باعا – «كوك تيىن». اۋكتسيون 10 قاراشا كۇنى وتەدى دەپ جوسپارلانعان. 2018 جىلى بۇل اۋىل تاراتىلىپ جىبەرىلگەن (جويىلعان).
وسىدان 20 جىل بۇرىن 260 تۇرعىنى بار قايناعان اۋىل بولعان.
ەسىل اۋدانى نوۆوۋزەنكو اۋىلىندا اۋماعى 3327 شارشى مەتردى قۇرايتىن 3 قاباتتى مەكتەپ ساتىلىمعا شىعارىلعان. قۇنى - 27,2 ملن تەڭگە، ەڭ تومەنگى قۇنى - 1 تەڭگە. مەكتەپ 1983 جىلى سالىنعان، ول كەزدە اۋىلدا 950 ادام تۇرعان. قازىر اۋىلدا 30 ادام تۇرادى. ەڭ باستى پروبلەمالاردىڭ ءبىرى – اۋىز سۋدىڭ بولماۋى. اۋىل تۇرعاندارى سۋدى كورشى اۋىلدان تاسىپ ىشەدى.
ستاتيستيكا كوميتەتىنىڭ مالىمەتتەرى بويىنشا، سوڭعى ونجىلدىقتا سولتۇستىك قازاقستان وبلىسىندا مەكتەپتەردىڭ جالپى سانى 127-گە ازايعان. ال باستاۋىش جانە ورتا مەكتەپتەردەگى وقۋشىلاردىڭ جالپى سانى سەگىز مىڭ ادامعا تومەندەگەن.
جالپى العاندا، سوڭعى 20 جىلدا سولتۇستىك قازاقستان وبلىسىندا 302 مەكتەپ جابىلدى (478 قالدى). ال وقۋشىلار سانى 135,2 مىڭنان 78 مىڭعا دەيىن ازايدى.
فوتو دەرەككوزدەن الىندى.
