كۇنى كەشە مەملەكەت باسشىسى قاسىم-جومارت توقاەۆتىڭ قاتىسۋىمەن ۇلتتىق كەڭەستىڭ كەزەكتى وتىرىسى ءوتتى. القالى جيىندا پرەزيدەنت سولتۇستىك قازاقستان وبلىستارىن قازاقىلاندىرۋ جۇمىستارىنا نازار اۋداردى. الايدا، مىرزانتاي جاقىپ تەرىسكەيدى قازاقىلاندىرۋ جۇمىستارىنىڭ ءالى دە بولسا كەمشىن بولىپ جاتقانىن ايتادى.
مەملەكەت باسشىسى شەتتەن كەلگەن قانداستار سولتۇستىككە كەلسە، بىردەن ءۇي بەرۋ كەرەكتىگىن ايتتى. بۇل – وتە ماڭىزدى دۇنيە. سونداي-اق پرەزيدەنت ىشكى كوشى-قون بويىنشا ءار ازاماتقا بەرىلەتىن قارجىنى 35 اەك-تەن 70 اەك كوتەرۋ تۋرالى تاپسىرما بەردى.
ماناش قوزىباەۆ اتىنداعى سولتۇستىك قازاقستان ۋنيۆەرسيتەتى عىلىم دەپارتامەنتىنە قاراستى عىلىمي-ادىستەمەلىك جانە پاتەنتتىك-ليتسەنزيالىق ءبولىمىنىڭ جەتەكشىسى مىرزانتاي جاقىپتىڭ ايتۋىنشا، پرەزيدەنتتىڭ ۇلتتىق كەڭەستە ايتقان سوزىنەن كەيىن كوشى-قونعا بايلانىستى ماسەلە وزدىگىنەن شەشىلىپ كەتپەيدى. بۇدان بولەك ول ءار ازاماتقا بەرىلەتىن قارجىنى 35-تەن 70 اەك كوبەيتكەننەن ەشتەڭە وزگەرمەيتىنىن ەسكەرتتى.
«نەگىزى قالالى جەرگە كوشىپ كەلگەن ازاماتقا 35, ال اۋىلدى جەرگە بارعان ازاماتقا 25 اەك قارجى تولەنەدى. ءبىر اەك 2778 تەڭگە بولسا، 70 اەك 194 460 تەڭگە بولادى ەكەن. ال اۋىلدى جەرگە كوشىپ باراتىن ازاماتقا ەندى 50 اەك، ياعني 138 900 تەڭگە بەرۋى مۇمكىن. شىن مانىسىندە، كوشىپ كەلۋشىلەرگە بەرىلەتىن اتالعان قارجىمەن كوشى-قون ماسەلەسى وڭ جولعا تۇسپەيدى. ەڭ باستىسى، كوشىپ كەلگەن ازاماتتارعا جەرگىلىكتى اكىمشىلىكتىڭ كوزقاراسى وزگەرۋى كەرەك. اكىمشىلىك قارجىنى بەرمەس بۇرىن ازاماتتاردان تۇراقتى تىركەۋدى تالاپ ەتەدى. ال تۇراقتى تىركەۋگە تۇرۋ سولتۇستىك قازاقستان وبلىستارىندا وتە كۇردەلى. ەڭ باستى ماسەلە – قاراجاتتىڭ كولەمىن كوتەرۋدە ەمەس»، – دەيدى ول.
مىرزانتاي قوجابايۇلىنىڭ ايتۋىنشا، قارجىدان بۇرىن ازاماتتاردى جۇمىس جانە تۇرعىن ۇيمەن قاماتاسىز ەتۋ – ماڭىزدى. ويتكەنى، جۇمىسپەن قامتۋ ورتالىقتارى سىرتتان كەلەتىن ازاماتتاردى جۇمىسپەن قامتۋ ماسەلەسىنە نەمقۇرايلى قارايتىن كورىنەدى.
«ەلباسىنىڭ جان-جاقتاعى زيالى قاۋىم وكىلدەرىن ەلورداعا كوشىرىپ اكەلۋ تۋرالى 2005-2007 جانە 2008-2010 جىلدارعا ارنالعان باعدارلاماسى بولعان. اتالعان باعدارلاما بويىنشا – ەلىمىزدىڭ ءار ايماعىنداعى ازاماتتارعا ءوزى تۇرىپ جاتقان قالادا ءۇيى بولسا دا، ولارعا ەلوردادان ءۇي بەرىلدى. مىنە، سول سياقتى پەتروپاۆل قالاسىنا كوشىپ كەلەتىندەردى ۇيمەن قامتاماسىز ەتۋ كەرەك. جيىندا قاسىم-جومارت توقاەۆ ەلباسى سياقتى جالعا پاتەر بەرۋدى جەرگىلىكتى اكىمشىلىكتەرگە ارنايى تاپسىرۋى كەرەك ەدى. سودان كەيىن مەملەكەت باسشىسى جۇمىسپەن قامتۋ ورتالىقتارىنىڭ كوشىپ كەلگەن ادامعا جۇگىرىپ ءجۇرىپ جۇمىس تاۋىپ بەرۋىن تاپسىرۋى قاجەت ەدى. وكىنىشكە قاراي، ولار جىلى كابينەتىنەن شىقپاي، كوشىپ كەلۋشىلەردى تىركەگەننەن باسقا ەشتەڭە ىستەپ جاتقان جوق. ءبىر سوزبەن ايتقاندا، پرەزيدەنت ازاماتتاردى پاتەر جانە جۇمىسپەن قامتۋ ماسەلەسىن شەشۋدى تاپسىرۋى كەرەك ەدى. ايتپەسە ءار ازاماتقا 70 اەك تۇرماق 7000 اەك قارجى بەرسە دە، كوشى-قون ماسەلەسى شەشىلمەيدى. كوشىپ كەلگەن ادامعا ەڭ اۋەلى باسپانا، سوسىن جۇمىس كەرەك»، – دەيدى مىرزانتاي قوجابايۇلى.
ايتپاقشى، قاسىم-جومارت توقاەۆ جيىندا «سەرپىن» جوباسىنا دا ءمان بەردى. الايدا اتالعان جوبانىڭ كەلەر جىلى جالعاسا ما، جوق پا – ول جاعى بەلگىسىز.
«پرەزيدەنت كەشە «سەرپىن» جوباسى تۋرالى ايتتى. الايدا 2017-2020 جىلعا ارنالعان «ەڭبەك» باعدارلاماسى 2021 جىلعى اياقتالادى. اتالعان باعدارلامانىڭ ىشىنە «سەرپىن» جوباسى كىرەتىن. دەمەك «سەرپىن» جوباسى بيىل اياقتالۋى مۇمكىن. ال مەملەكەت باسشىسى ايتقان تاپسىرما ىسكە اسۋ ءۇشىن كەشەندى تۇردە جوسپار بولۋى كەرەك. جالپى كوشى-قون ماسەلەسىن «ەڭبەك» باعدارلاماسىنا قوسپاي، وعان بولەك باعدارلاما ارناۋ كەرەك. ۇزىن ءسوزدىڭ قىسقاسى، سىرتتان جانە ىشتەن كەلەتىن وقۋشىلارعا ارنايى باعدارلاما جاساۋ قاجەت»، – دەيدى مىرزانتاي جاقىپ.
پرەزيدەنت تاپسىرماسىنان كەيىن دە كوش كولىكتى بولىپ كەتپەسى انىق. بۇل جەردە جەرگىلىكتى اكىمشىلىكتىڭ ءار قىزمەتكەرىنىڭ بۇل ىسكە قالاي قارايتىنى وتە ماڭىزدى.
سەرىك جولداسباي،
«ادىرنا» ۇلتتىق پورتالى.
فوتو اشىق دەرەككوزدەن الىندى.
