الماتى حقو-لارىندا مارافون وتۋدە

489

الماتى قالاسى حالىققا قىزمەت كورسەتۋ ورتالىقتارىندا  پاندەمياعا وراي «جۇرەگىڭدى ىزگىلىككە ۇيرەت!» ايلىق-مارافونى اياسىندا تۇرعىندارمەن جاتتىعۋلار وتكىزۋدە، دەپ حابارلايدى «ادىرنا» ءتىلشىسى. وعان حقو قىزمەتكەرلەرىمەن قاتار،  قىزمەت الۋشىلار دا قاتىسۋدا.

بۇگىنگى پاندەميا كەزىندەگى، ادام تاعدىرى ۇستارا جۇزىندە تۇرعان تۇرلاۋسىز ۋاقىتتا، ءار جۇرەككە مەيىرىمدىلىك شۋاعىن ۇيالاتىپ، ادامدار اراسىنداعى ماحاببات پەن دوستىقتى، ادالدىق پەن شىنشىلدىقتى، اقپەيىلدىلىك پەن دارحاندىقتى نىعايتا تۇسەتىن شارالار قاجەت-اق. مۇنى «ازاماتتارعا ارنالعان ۇكىمەت» مەملەكەتتىك كورپوراتسياسى الماتى قالاسى فيليالى  كۇندەلىكتى جۇمىس داعدىسىنا اينالدىرعان. توقتاۋسىز تىرشىلىكتىڭ كوشىندە قوڭىرقاي كۇي كەشكەن جاندارعا ءبىر ءسات بولسا دا جىلۋلىق سىيلاپ، جانىن جادىراتار باقىتتى ساتتەرمەن قۋانتۋعا تىرىسۋدا...

ۇجىمداعى «جىلۋلىق سىيلايمىز» تۇجىرىمداماسى اياسىندا وتكىزىلىپ جاتقان يگى شارالاردىڭ قاتارىندا، فيليال پسيحولوگى ۇيىمداستىرعان «جۇرەگىڭدى  ىزگىلىككە ۇيرەت» مارافونىن ايتۋعا بولادى.

«ادام كەي ۋاقىتتا وزىنە دەگەن سەنىمىن جوعالتىپ، كۇيزەلىسكە ۇشىرايدى، سولاي دەگەنمەن دە، ومىرگە دەگەن سەنىمىن، قۇشتارلىعىن جوعالتپاي، توقتاماستان تەك قانا العا ۇمتىلۋ كەرەك ەكەنىن ۇمىتپاۋى ءتيىس. قانداي جاعداي بولماسىن، بار كۇش جىگەرىن جيناپ، العا ۇمتىلسا عانا بارلىعىن جەڭىپ، جۇرەگىندە دە، جان-دۇنيەسىندە دە تىنىشتىق ورنايتىنىنا، بارلىعى تەك جاقسى بولاتىنىنا سەنۋى كەرەك. وسى سەنىمدى ادام بويىنا ۇيالاتۋ ءۇشىن ءبىزدىڭ پسيحولوگ مامانىمىز ءبىر اي بويى مارافون جۇرگىزىپ وتىر. بۇل ءدال قازىرگى ۋاقىتتا قاجەت دەپ بىلەمىز»، - دەيدى فيليالدىڭ PR-مەنەدجەرى جاڭىل اپەتوۆا.

ادامنىڭ تۇتىنۋ قۇرالدارىنىڭ دامۋى ارتقانىمەن، ادام بويىنداعى اسىل قاسيەتتەردىڭ قۇندىلىعى كەمي تۇسكەن مىنا زاماندا، كۇن ۇزاعىنا پەندەلىك قىم-قۋىت تىرلىكپەن ارپالىسقان ادام، ءبىر ءسات جابىرقاۋ تارتقان جانىنا رۋحاني قۋات ىزدەيدى. سول ساتتە ونىڭ جاعدايىن ءتۇسىنىپ، كومەك قولىن سوزاتىن ادام پسيحولوگ قانا. پسيحولوگپەن اڭگىمەلەسۋ سانانى سىلكىندىرىپ، تۇنىق ويلاردىڭ تۇما كوزدەرىن اشارى بۇگىنگى كۇنى دالەلدەنگەن شىندىق. بۇل ماماندىق وتە توزىمدىلىكتى، شىدامدىلىقتى، بىلىمدىلىك پەن بىلىكتىلىكتى، مەيىرىمدىلىك پەن تالاپ قويا ءبىلۋدى كەرەك ەتەدى دەسەك، ۇجىمى پسيحولوگى داريعا ەلتايقىزى سارسەن وسى ۇدەدەن شىعا بىلگەن مامان. ونىڭ ««جۇرەگىڭدى  ىزگىلىككە ۇيرەت!» مارافونى بارىسىندا ۇيىمداستىرعان شارالارى، تالاي ادامنىڭ جانىنا ىزگىلىك نۇرىن قۇيىپ، بويىنا سەنىمدىلىك ۇيالاتتى.

قازان ايى بويى جالعاسىپ جاتقان مارافون ماقساتى – ادامداردىڭ ەموتسيونالدى-قۇندىلىق سالاسىن دامىتۋ، ادامداردىڭ قيىن  پسيحولوگيالىق جاعدايداعى ارەكەتتەرىنە دۇرىس باعىت بەرۋ، ەموتسيونالدىق سترەسستەن ارىلۋ جولدارىن كورسەتۋ،  قوعامداعى مىنەز-قۇلىق نورمالارىن قالىپتاستىرۋ جانە ءبىر-بىرىمەن قارىم-قاتىناس جاساۋ جانە مادەني مىنەز-قۇلىقتى تاربيەلەۋ. قىزمەتكەرلەردىڭ ۇجىمدا جۇمىس ىستەي ءبىلۋ قابىلەتىن ارتتىرۋ، ءوزىن-ءوزى كورسەتۋ ءۇشىن جاعداي جاساۋ ارقىلى ءوزىن-ءوزى تانۋ پروتسەسىنە ىقپال ەتۋ.

«جۇرەگىڭدى ىزگىلىككە ۇيرەت!» ايلىق-مارافونى بارىسىندا «قيىن پسيحولوگيالىق جاعدايداعى قىزمەتكەرلەردىڭ ارەكەتتەرى»، «تەمپەرامەنت تۋرالى تۇسىنىك»، «سترەسس كەزەڭدەرى مەن بەلگىلەرى»، «ەموتسيونالدىق سترەسس جانە ودان ارىلۋ جولدارى» جانە ت.ب. تاقىرىپتاردا سەمينارلار، «تۇلعانىڭ سابىرلىلىعىن باعالاۋ» تاقىرىبىندا سىناقتار جانە حاساي اليەۆتىڭ «كىلت» ءادىسى بويىنشا جاتتىعۋلار كەشەنىن ونلاين رەجىمدە جۇرگىزەدى.

جاتتىعۋلار مەن ساباقتار، قاراپايىم، ىڭعايلى جانە وتە ءتيىمدى. ولار سترەسسپەن كۇرەسۋگە، جان تىنىشتىعىن تابۋعا عانا ەمەس، سونىمەن قاتار  پروبلەمالارىن  شەشۋگە، سترەسستىڭ تەرىس ەنەرگياسىن جويا وتىرىپ، دەنەنىڭ ساۋىعۋىنا ىقپال ەتەدى. قاتىسۋشىلارعا تۇلعا بويىنداعى قاسيەتتەر جونىندە، تەمپەرامەنت تيپتەرى مەن مىنەز تۇرلەرى تۋرالى ماعلۇمات بەرىپ،  العان بىلىمدەرىن كاسىپتىك قىزمەت بارىسىندا قولدانا بىلۋگە ۇيرەتەدى.

«مىنە، بۇگىن تاعى دا جۇزدەگەن جاننىڭ ريزالشىلىعىنا بولەندىم. كاسىبي ءبىلىمىمنىڭ ارقاسىندا اينالاما كوتەرىڭكى كوڭىل كۇي سىيلاۋ، ارىپتەستەرىمنىڭ جاڭاشا قىرىنان كورىنۋىنە قولداۋ كورسەتۋ، شىعارماشىلىق وي-قيالدارىنا شابىت بەرۋ، مەنىڭ كۇندەلىكتى جاقسى كورىپ اينالىساتىن ءىسىم. بۇل دەگەنىڭ كەرەمەت ەمەس پە؟! ولاي دەيتىنىم، قازىر مەن ازاماتتارعا ارنالعان ۇكىمەتتىڭ الماتى قالاسى فيليالىندا پسيحولوگ بولا ءجۇرىپ، ءاربىر كۇن سايىن كەزدەسەتىن قيىنشىلىقتارمەن، پروبلەمالارمەن بەتپە-بەت كەلىپ، ءوز ءبىلىمىمدى شىڭداۋ، ىزدەنۋ ۇستىندەمىن. ادامداردىڭ ريزا جۇزدەرىن كورگەندە ەڭبەگىمنىڭ، جۇمىسىمنىڭ جانعانى دەپ بىلەمىن», - دەيدى داريعا ەلتايقىزى.

«مەن ءبىر جۇمباق اداممىن، ونى دا ويلا» – دەپ  ۇلى اباي اتامىز ايتقانداي، ءاربىر تۇلعا  جۇمباق. سول جۇمباقتىڭ كىلتىن تاۋىپ، جۇرەك كىلتىن اشا ءبىلۋ، ءاربىر جۇرەكتىڭ قۇپيا سىرىن وقي ءبىلۋ، عاجايىپ تىلسىم سىرلارىنا بويلاي ءبىلۋ – پسيحولوگ ماماننىڭ ءبىلىمى مەن بىلىكتىلىگىنە بايلانىستى.

«پسيحولوگتىڭ مارافون بارىسىندا بىزدەرمەن جۇرگىزگەن «بالا كەزىمدەگى فوتودان مەنى تاپ»، «مەنىڭ سۇيىكتى فيلمدەرىم»، «مەنىڭ وتباسىم» جانە ت.ب. تاقىرىپتارداعى ونلاين جاتتىعۋلارى بىزدەردى جاقىنداستىرا ءتۇستى. جانىمىزدا جۇرگەن جانداردى جاقىن تاني باستادىق. ءبىر-ءبىرىمىز تۋرالى كوبىرەك بىلە وتىرىپ، ءبىر-بىرىمىزگە قىزىقتى بولا باستادىق. ءوزارا اشىق ارالاسۋدان قىسىلمايتىن بولدىق، جۇمىستان تىس كەزدە قيىن كورىنگەن ىستەرىمىزدىڭ ارىپتەستەرىمىزبەن بىرگە جاساعاندا وڭايىراق بولاتىنىن بايقادىق»، - دەيدى حقو قىزمەتكەرى ايگۇل تۇرلىبەكوۆا.

الماتىداعى حقو پسيحولوگى داريعا سارسەننىڭ  Zoom پلاتفورماسىندا ونلاين رەجىمدە وتەتىن كونفەرەنتسيالارىنا كەز-كەلگەن ادام قاتىسا الادى.

بۇل كۇندەرى  «ىزگى جۇرەكتى جاندار» ايلىق-مارافونىنا 3 مىڭعا جۋىق ادام  قاتىسىپ ۇلگەردى.

گۇلۆيرا اسقار

"ادىرنا" ۇلتتىق پورتالى

پىكىرلەر
رەداكتسيا تاڭداۋى