قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتى مەن شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى قازاقستان حالقى تىلدەرى كۇنى مەرەكەسىنە وراي ۇلت ۇستازى احمەت بايتۇرسىنۇلىنا ارنالعان «تاعزىم مەن تاعىلىم» ونلاين وتىرىسىن وتكىزدى.
مەملەكەت باسشىسى قاسىم-جومارت توقاەۆ قازاقستان حالقىنا ارناعان «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا:«قازاق قوعامىندا جاڭا قاعيداتتار جانە جاڭا باعدارلار سالتانات قۇرۋعا ءتيىس. ۇلت ۇستازى احمەت بايتۇرسىنۇلى: «ءبىلىمدى بولۋعا وقۋ كەرەك. باي بولۋعا كاسىپ كەرەك. كۇشتى بولۋعا بىرلىك كەرەك. وسى كەرەكتەردىڭ جولىندا جۇمىس ىستەۋ كەرەك» دەيدى. بۇل كوزقاراس بۇگىنگى كۇنى وتە ماڭىزدى»،– دەپ اتاپ كورسەتكەن بولاتىن.
شارادا قۇتتىقتاۋ ءسوز العان قازاقستان رەسپۋبليكاسى مادەنيەت جانە سپورت ۆيتسە-ءمينيسترى نۇرعيسا مۇراتۇلى داۋەشوۆ ەكى جىلدان كەيىن تۋعانىنا 150 جىل تولعالى وتىرعان ۇلى تۇلعانىڭ ەسىمىن ماڭگى ەستە قالدىرۋ باعىتىنداعى شارالار جوسپارىنا توقتالىپ، ونلاين وتىرىسقا قاتىسۋشىلاردى مەرەكەمەن قۇتتىقتادى.
شارا مودەراتورى ءتىل ساياساتى كوميتەتى توراعاسىنىڭ ورىنباسارى ادىلبەك كۇنەسحانۇلى قابانىڭ ايتۋىنشا، ورفوگرافيكالىق جۇمىس توبى ون وتىرىسىن وتكىزگەن ەكەن، بۇل ءوز كەزەگىندە ۇلكەن تالقىلاۋلارعا ۇلاسىپ وتىرعان. ونوماستيكالىق كوميسسيانىڭ ءۇش وتىرىسىندا ەلىمىز بويىنشا بەس ءجۇز اتاۋ وزگەرتىلگەن، ياعني، ساياساتتىڭ سالقىنى تيگەن كوپتەگەن كونە اتاۋلار قالپىنا كەلتىرىلىپ، قازاق تاريحى مەن مادەنيەتىنە قاتىستى تۇلعالاردىڭ ەسىمى بەرىلگەن. سونداي-اق، قازاقستان رەسپۋبليكاسى ۇكىمەتى جانىنداعى رەسپۋبليكالىق تەرمينولوگيالىق كوميسسياسىنىڭ ەكى وتىرىسى ءوتىپ، ءار قايسىسىندا بەس جۇزدەن استام تەرمين ماقۇلدانعان. بۇل دەگەنىڭىز مىڭنان استام جاڭا تەرمين قولدانىسقا ەنىپ، ءتىلىمىز سونشالىقتى سوزبەن بايىدى دەگەن ءسوز.
وسىنداي قاجىرلى قايراتكەرلىگى مەن ەسەلى ەڭبەكتەرى ءۇشىن قازاقستان رەسپۋبليكاسى ۇكىمەتى جانىنداعى رەسپۋبليكالىق تەرمينولوگيالىق، ونوماستيكالىق كوميسسياسى مۇشەلەرى، قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جانىنداعى ورفوگرافيالىق، ادىستەمەلىك، تەرمينولوگيالىق، تەحنيكالىق سۇيەمەلدەۋ جونىندەگى جۇمىس توپتارىنىڭ مۇشەلەرى، وبلىستىق تىلدەردى وقىتۋ ورتالىقتارىنىڭ باسشىلارى قازاقستان رەسپۋبليكاسى مادەنيەت جانە سپورت ءمينيسترىنىڭ العىسحاتىنا، ءتىل ساياساتى كوميتەتى توراعاسىنىڭ قۇرمەت گراموتاسىنا يە بولدى.
«ۇلت ۇستازىنىڭ تاعىلىمى» تاقىرىبىندا بايانداما جاساعان ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ اتقارۋشى ديرەكتورى، عالىم ەربول ەردەمبەكۇلى تىلەشوۆ كەسەك ويعا تولى كوسەمسوزدىڭ تيەگىن اعىتتى:
«ءۇش جىل بولدى، تىلدەر مەرەكەسى قازاق عىلىمىنىڭ اتاسى، ۇلت ۇستازى احمەت بايتۇرسىنۇلىنىڭ تۋعان كۇنىنە تۇراقتادى. بۇل وتە ماڭىزدى. تاريح ارەناسىنا شىققان كەز كەلگەن حالىق ءوز تاۋەلسىزدىگى ءۇشىن كۇرەسەدى. قازاق تاريحى دا وسىنداي ازاتتىق ارپالىسىنا تۇنىپ تۇر. رەسەي يمپەرياسى مەن قازاق حالقىنىڭ كۇشى تەڭ ەمەس ەدى. جاراتقان يەمىز سول الماعايىپ كەزەڭدە حالقىمىزدىڭ كوز جاسىنا ۇلى ابايدى ومىرگە اكەلدى. ودان كەيىن حالقىنا قالقان، جاۋىنا سەمسەر بولار الاش ازاماتتارىنىڭ شوعىرى قازاق كوگىنە شىقتى. سولاردىڭ ىشىندە احمەت بايتۇرسىنوۆتى ەرەكشە اتايمىز».
بۇدان كەيىن احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ ديرەكتورى انار مۇراتقىزى فازىلجانوۆا، احمەت بايتۇرسىنۇلى مۋزەي-ءۇيىنىڭ ديرەكتورى رايحان ساحىبەكقىزى يماحانبەت، تورعايداعى مۇراجايلار كەشەنىنىڭ باسشىسى گۇلبانۋ قۇلەتقىزى سارسەكەيلەر احمەت بايتۇرسىنۇلى تۋرالى ويلارىن ورتاعا سالىپ، قۇتتىقتاۋ جولدادى.
شارانى ۆيتسە-مينيستر ن.داۋەشەۆ قورىتىندىلادى.
