530 مىڭ بالا كەزەكشى سىنىپتا ءبىلىم الادى

1862
Adyrna.kz Telegram

1 قىركۇيەكتەن باستاپ باستاۋىش سىنىپتا ءبىلىم الاتىن 530 مىڭ بالا كەزەكشى سىنىپتا وقيتىن بولدى. بۇل تۋرالى ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا قر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.

«بىرنەشە كۇننەن كەيىن جاڭا وقۋ جىلى باستالادى. بۇگىنگى كۇنى دايىندىق جۇمىستارى قارقىندى ءجۇرىپ جاتىر. 1 قىركۇيەك - ادەتتەگىدەي ءبىلىم كۇنى. 1 قىركۇيەكتەن باستاپ جاڭا وقۋ جىلى باستالادى. وزدەرىڭىز بىلەتىندەي، وقۋ جىلى ىندەتكە بايلانىستى قاشىقتان وقىتۋ فورماتىندا جۇرگىزىلەدى.

بۇل تۋرالى شىلدەدە ۇكىمەت وتىرىسىندا شەشىم قابىلدانعان ەدى. ارينە، ءبىز ءۇشىن ەڭ باستىسى - بالالاردىڭ جانە ۇستازدارىمىزدىڭ دەنساۋلىعى، قاۋىپسىزدىگى»، - دەدى ول. وسى رەتتە مينيستر قاشىقتان وقىتۋدىڭ ەكى ەرەكشەلىگىنە توقتالدى. «ءبىرىنشىسى - كەزەكشى سىنىپتاردىڭ جۇمىسى. 1-4 سىنىپتارعا بايلانىستى كەزەكشى سىنىپتاردىڭ جۇمىسى اتا-انالاردىڭ دەربەس شەشىمى، وتىنىشتەرى بولسا ۇيىمداستىرىلادى.

ەكىنشى ەرەكشەلىك - بۇل شالعايداعى اۋىلدارداعى شاعىن جيناقتالعان مەكتەپتەر. ەگەر وسى اۋىلداردا ەپيدەميولوگيالىق احۋال جاقسى بولاتىن بولسا، وندا بۇل ءبىلىم وردالارى ءداستۇرلى فورماتتا جۇمىس ىستەيتىن بولادى. سونداي مۇمكىندىك بەرىپ وتىرمىز»،- دەدى مينيستر. ونىڭ دەرەگىنشە، وقۋشىلاردىڭ 80 پايىزى نەمەسە 2,6 ملن بالا قاشىقتان ءبىلىم الادى. باستاۋىش سىنىپ وقۋشىلارىنىڭ 15 پايىزى نەمەسە 530 مىڭ بالانىڭ اتا-انالارى كەزەكشى سىنىپتا وقىتۋعا ءوتىنىش بەرگەن. «قالعان 5 پايىز بالالار شاعىن جيناقتى ءداستۇرلى فورماتتا وقيتىن بولادى. ولاردىڭ سانى - 202 مىڭ بالا. مىنە وسىنداي فورماتتا جۇمىسىمىزدى باستايمىز»، - دەدى اسحات ايماعامبەتوۆ.

 

 

پىكىرلەر