رەسەيدىڭ بىرنەشە قالاسىندا ميتينگ وتۋدە

3856

بۇگىن تاڭەرتەڭ حاباروۆسكىدە حاباروۆسك ولكەسىنىڭ قاماۋعا الىنعان گۋبەرناتورى سەرگەي فۋرگالدى قولداۋ ءۇشىن تاعى دا جاپپاي ميتينگ باستالدى. ۆلاديۆوستوك پەن وڭتۇستىك ساحاليندە دە نارازىلىق اكتسيالارى وتۋدە دەپ حابارلايدى "ادىرنا" "بي-بي-سي"-گە سىلتەمە جاساپ.

حاباروۆسكىدەگى ميتينگتەر وسىمەن 15-ءشى كۇن قاتارىنان وتكىزىلۋدە. بي-بي-سي ءتىلشىسى پەتر كوزلوۆتىڭ ايتۋىنشا، اكتسيا جەرگىلىكتى ۋاقىت بويىنشا تۇسكە دەيىن ۇيىمداستىرىلىپ، العاشقى كەزدە قالا ورتالىعىندا شەرۋمەن باستالعان. دەمونسترانتتار «مەن / ءبىز فۋرگال» جانە «20 جىلدىق سەنىم جوق!» دەگەن ۇراندارمەن شىعۋدا

«وتكەن سەنبىگە قاراعاندا ادامدار كوپ بولدى. بۇل ەكى اپتاداعى ەڭ ۇلكەن ميتينگ سياقتى»، - دەيدى ۆۆس ءتىلشىسى. بيلىك ءالى نارازىلىق بىلدىرۋشىلەردىڭ سانىن رەسمي تۇردە جاريالاعان جوق.

سەنبىدە فۋرگالدى قولداۋ اكتسياسى امۋرداعى كومسومولسك جانە كورشى وبلىستاردا دا وتۋدە.

ۆلاديۆوستوك VL.ru پورتالىنىڭ حابارلاۋىنشا، ۆلاديۆوستوكتاعى كەڭەس وكىمەتى ءۇشىن كۇرەسۋشىلەردىڭ ەسكەرتكىشىنە شامامەن 150-200 ادام جينالدى. سونىمەن بىرگە، جەرگىلىكتى بيلىك الاڭدا كوكونىستەر فەستيۆالىن وتكىزىپ، ەسكەرتكىشتى جۋىپ جاتىر. اكتسياعا قاتىسۋشىلار «حاباروۆسك، ءبىز سىزدەرمەن بىرگەمىز!» جانە «رەسەي، شىق!» دەگەن سوزدەر جازىلعان پلاكاتتار الىپ ءجۇر. اكتسيانى ۇيىمداستىرۋشىلار بۇل شارانى «ساياسي سەنبىلىك» دەپ اتايدى.

ينتەرفاكس تىلشىلەرى وڭتۇستىك-ساحاليندە فۋرگالدى قولداۋعا ارنالعان ميتينگىلەر ءوتىپ جاتقانىن، بىراق دەمونسترانتتاردىڭ سانى اتالماعانىن حابارلادى.

حاباروۆسكىدەگى ۆۆس ءتىلشىسىنىڭ ايتۋىنشا، سەنبىدەگى ميتينگى باستالاردان بىرنەشە ساعات بۇرىن پوليتسيا "امۋر" قوناق ۇيىنە ساياساتتانۋشى الەكساندر كينەۆ پەن قالاعا كەلگەن «اشىق رەسەي» ۇيلەستىرۋشىلەرىنەن تۇسىنىكتەمە الۋ ءۇشىن كەلدى. ولار كوروناۆيرۋس جۇقتىرعان بەلگىلى ءبىر ازاماتپەن بايلانىس جاسادى دەگەن كۇدىككە ءىلىندى.

گۋبەرناتوردىڭ ۋاقىتشا مىندەتىن اتقارۋشى دەگتيارەۆ حاباروۆسكىدە نارازىلىق اكتسيالارىن ۇيىمداستىرۋعا شەتەلدىك ازاماتتار تارتىلعانىن ايتتى.

«سەرگەي يۆانوۆيچ [فۋرگالدىڭ] تۇتقىندالۋىنان كەيىن باستالعان ۇلكەن ميتينگىلەر، ماعان تۇسىنىكتى، ولار ستيحيالى تۇردە ۇيىمداستىرىلعان. بۇل حاباروۆسكىنىڭ حالقى ءوزى سايلاعان گۋبەرناتوردى الىپ تاستاۋى جۇرتتىڭ اشۋىن تۋعىزدى»، - دەدى دەگتيارەۆ BBC ءتىلشىسىنىڭ سۇراعىنا جاۋاپ رەتىندە. مەن سوڭعى ءۇش كۇندە تەرەزەدەن كورىپ وتىرمىن، بۇنى  ارنايى ۇيىمداستىرعان. قۇقىق قورعاۋ ورگاندارىنىڭ بۇلتارتپايتىن دالەلى بار. جەدەل مالىمەتتەر سولاي دەيدى دەدى دەگتيارەۆ.

لدپر باسشىسى ۆلاديمير جيرينوۆسكي "گوۆوريت موسكۆا" راديوستانتسياسىنىڭ ەفيرىندە حاباروۆسك ولكەسىنىڭ تۇرعىندارىنىڭ الدىندا «ولار ءبىزدى قانشالىقتى جاقسى كورەتىنىمىزدى، ولاردى قالاي قورعاۋعا دايىن ەكەنىمىزدى ءتۇسىنۋى ءۇشىن» تىزە بۇگۋگە دايىن ەكەنىن مالىمدەدى.

سونىمەن قاتار، جيرينوۆسكي حاباروۆسك تۇرعىندارىنان ميحايل دەگتيارەۆتى قولداۋدى ءوتىندى، ويتكەنى «ول فۋرگالدىڭ جاساعان جاقسى ىستەرىن جالعاستىرادى» دەدى.

سەرگەي فۋرگال 9 شىلدەدە قاماۋعا الىنعان. تەرگەۋ مالىمەتىنشە، ول 2004-2005 جىلدارى كاسىپكەر الەكساندر سمولسكيدى ولتىرگەن جانە كاسىپكەرلەر ەۆگەني زوري مەن ولەگ بۋلاتوۆتى ءولتىرۋدى ۇيىمداستىرعان دەگەن كۇدىككە ىلىنگەن. 20 شىلدەدە پرەزيدەنت ۆلاديمير پۋتين سەنىمىن اقتاماعان  فۋرگالدى قىزمەتىنەن بوساتتى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى