ەلىمىز بويىنشا ماۋسىم ايىندا ۇبت تاپسىرعان جانە شەكتى بالل جيناعان تالاپكەرلەردەن مەملەكەتتىك ءبىلىم گرانتىن تاعايىنداۋ كونكۋرسىنا قاتىسۋ ءۇشىن وتىنىشتەر قابىلدانىپ جاتىر دەپ حابارلايدى «ادىرنا» ۇلتتىق پورتالى قازاقستان رەسپۋبليكاسىنىڭ ءبىلىم جانە عىلىم مينيسترلىگىنە سىلتەمە جاساپ.
بيىل مەملەكەتتىك ءبىلىم گرانتىنا ۇمىتكەرلەردىڭ سانى 80 مىڭنان اسادى، ونىڭ ىشىندە 61 039 تالاپكەر قۇجاتتارىن eGov.kz ەلەكتروندىق ۇكىمەت پورتالى ارقىلى تاپسىرعان. گرانتقا قۇجاتتاردى جوو-نىڭ ۆيرتۋالدى قابىلداۋ كوميسسياسى ارقىلى دا تاپسىرۋعا بولادى. ماماندار بەينە بايلانىس ارقىلى تالاپكەرلەرگە كەڭەس بەرىپ، قاجەتتى ءبىلىم بەرۋ باعدارلاماسىن تاڭداۋعا كومەكتەسەدى. جوو-نىڭ ۆيرتۋالدى قابىلداۋ كوميسسياسى ارقىلى 9 472 تالاپكەر قۇجات تاپسىرعان. قۇجاتتاردى وسىنداي تاسىلمەن تاپسىرۋ ەلەكتروندىق تسيفرلىق قولتاڭباسى (ەتسق) جوق ازاماتتار ءۇشىن ىڭعايلى. قۇجاتتاردى 30 شىلدەگە دەيىن تاپسىرۋعا بولادى.
53 مىڭ قازاقستاندىق تالاپكەر جوعارى ءبىلىمدى تەگىن – مەملەكەت ەسەبىنەن الا الادى. مەملەكەت ەڭبەك نارىعىندا نەعۇرلىم سۇرانىسقا يە كادرلاردى دايارلاۋعا اقشا بولەدى، ونىڭ ىشىندە اقپاراتتىق تەحنولوگيالار سالاسىنداعى ماماندارعا، پەداگوگتەر مەن قۇرىلىسشىلارعا دەگەن ۇلكەن سۇرانىس بايقالادى. وسى ءۇردىستى ەسكەرە وتىرىپ، اتالعان باعىتتار بويىنشا مەملەكەتتىك تاپسىرىس كولەمى دە ارتۋدا. گرانتتار ۋنيۆەرسيتەتتەرگە بولىنبەيدى، ياعني ۇمىتكەرلەردىڭ سوڭىنان جۇرەدى - ءبارى ولاردىڭ تاڭداۋىنا بايلانىستى ەكەندىگىن ايتا كەتكەن ءجون.
مىسالى، 2020-2021 جىلدارى «اقپاراتتىق تەحنولوگيالار» ماماندىعىنا كوپ گرانت بولىنگەن، اتاپ ايتساق 2 468 گرانت. بولاشاق IT-مامانداردى ەلىمىزدىڭ 49 جوعارى وقۋ ورنىندا وقىتادى.
«قوعامدىق دەنساۋلىق ساقتاۋ» ماماندىعى بويىنشا 2 147 گرانت بولىنگەن. بۇل سالا بويىنشا مامانداردى 11 مەديتسينالىق ۋنيۆەرسيتەت دايىندايدى. جالپى، مەديتسينالىق قىزمەتكەرلەردى وقىتۋعا بيۋدجەتتەن بيىل 2 700 ورىنعا قارجى ءبولىندى.
8 مىڭنان استام بيۋدجەتتىك ورىن پەداگوگيكا سالاسىنداعى ماماندىقتارعا تيەسىلى. ولاردىڭ ىشىندە ەڭ كوبى – «مەكتەپكە دەيىنگى وقىتۋ جانە تاربيەلەۋ» (789 گرانت), «شەت ءتىلى مۇعالىمدەرىن دايارلاۋ» (760 گرانت), «حيميا مۇعالىمدەرىن دايارلاۋ» (740 گرانت), «فيزيكا مۇعالىمدەرىن دايارلاۋ» (730 گرانت), «بيولوگيا مۇعالىمدەرىن دايارلاۋ» (730 گرانت), «باستاۋىش وقىتۋدىڭ پەداگوگيكاسى مەن ادىستەمەسى» (660 گرانت), «ماتەماتيكا مۇعالىمدەرىن دايارلاۋ» (500 گرانت), «گۋمانيتارلىق پاندەر بويىنشا مۇعالىمدەردى دايارلاۋ» (350 گرانت), «دەنە شىنىقتىرۋ مۇعالىمدەرىن دايارلاۋ» (200 گرانت), سونداي-اق العاشقى اسكەري دايىندىق مۇعالىمى (20), مۋزىكا مۇعالىمى (30), كوركەم ەڭبەك جانە سىزۋ مۇعالىمدەرىن دايارلاۋ (30) باعىتتارى بويىنشا دا گرانت ۇتىپ الۋعا بولادى.
«ەلەكتروتەحنيكا جانە ەنەرگەتيكا» (1 800), «تاۋ-كەن ءىسى جانە پايدالى قازبالاردى ءوندىرۋ» (1 702), «مەحانيكا جانە مەتالل وڭدەۋ» (1 500) ماماندىقتارى بويىنشا كوپ گرانت بولىنگەن.
گۋمانيتارلىق باعىتتاعى 12 ماماندىق بويىنشا 1 285 بيۋدجەتتىك ورىن بولىنگەن، اتاپ ايتقاندا، فيلوسوفيا جانە ەتيكا، ءدىن جانە تەولوگيا، تاريح جانە ارحەولوگيا، اۋدارما ءىسى، فيلولوگيا، الەۋمەتتانۋ، ساياساتتانۋ، جۋرناليستيكا مەن رەپورتەرلىك ءىس جانە ت.ب.
سونىمەن قاتار، مەملەكەت تاراپىنان «بيولوگيا جانە ارالاس عىلىمدار» (650 گرانت), «فيزيكا» (852 گرانت), «حيميا» (670 گرانت), «ماتەماتيكا جانە ستاتيستيكا» (600 گرانت), «اقپاراتتىق قاۋىپسىزدىك» (600 گرانت), «كوممۋنيكاتسيا جانە كوممۋنيكاتسيالىق تەحنولوگيالار» (500 گرانت), «ەلەكتروتەحنيكا جانە اۆتوماتتاندىرۋ» (720 گرانت), «جەر تۋرالى عىلىم» (450 گرانت) جانە تاعى باسقا باعىتتار قارجىلاندىرىلادى.
تالاپكەرلەر اۋىل شارۋاشىلىعى سالاسىنداعى – «ۆەتەريناريا» (825 بيۋدجەتتىك ورىن), «وسىمدىك شارۋاشىلىعى» (470), «اگروينجەنەريا» (360)ماماندىقتارى بويىنشا دا كونكۋرسقا قاتىسا الادى.
ەستەرىڭىزگە سالا كەتەيىك، جوو-نىڭ اكادەميالىق ەركىندىگى شەڭبەرىندە 2019 جىلدان باستاپ ءبىلىم بەرۋ باعدارلامالارىنىڭ ءتىزىلىمى جۇرگىزىلۋدە، بۇل اۋقىمدى تەحنيكالىق جانە مازمۇندى ساراپتاما جۇرگىزۋ ارقىلى باعدارلامالاردىڭ ساپاسىن باعالاۋعا مۇمكىندىك بەردى. بۇگىنگى تاڭدا تىزىلىمگە 9 130 ءبىلىم بەرۋ باعدارلاماسى ەنگىزىلگەن، ونىڭ ىشىندە 541 جاڭا جانە 83 يننوۆاتسيالىق باعدارلاما.
ماسەلەن، 1 قىركۇيەكتەن باستاپ ەلىمىزدىڭ جوعارى وقۋ ورىندارى «دەرەكتەردى قولدانبالى تالداۋ»، «تەحنولوگيالاردى جانە يننوۆاتسيالاردى باسقارۋ»، «بيوينجەنەريا»، «تسيفرلىق اۋدارما»، «سپورت جۋرناليستيكاسى»، «IT-كاسىپكەرلىك جانە تسيفرلىق ەكونوميكا»، «ساندىق پەداگوگيكا»، «جاساندى ينتەللەكتىسى بار جوعارى جۇكتەلگەن اقپاراتتىق جۇيەلەر»، «اقپاراتتى وڭدەۋ جانە دەرەكتەردى ۆيزۋاليزاتسيالاۋ»، «تسيفرلىق اناليتيكالىق ءبىلىم بەرۋ جۇيەلەرىن جوبالاۋ»، «تابيعي-تەحنوگەندىك قاۋىپ-قاتەرلەر»، «اۋىل شارۋاشىلىق ەكولوگياسى»، «مەديتسينالىق قۇقىق»، «قولدانبالى ەپيدەميولوگيا» جانە ت.ب. ماماندىقتار بويىنشا كادرلاردى دايارلايدى
ادىرنا ۇلتتىق پورتالى
