قر پرەزيدەنتى ق.توقاەۆ كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندەگى كەڭەستىڭ وتىرىسى جالعاسۋدا. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي جاريالادى.
مەملەكەت باسشىسى كوروناۆيرۋسپەن كۇرەستە اقپاراتتىق جۇمىستاردىڭ ماڭىزدى ءرول اتقاراتىنىن ايتتى.
"دەر كەزىندە حابارلاپ، ءتيىستى شارالار قابىلداۋعا كوپ نارسە بايلانىستى. باستاپقى كەزەڭدە بۇل جۇمىستار جاقسى ۇيىمداستىرىلدى. بىراق مەملەكەتتىك ورگاندار سوڭعى كەزدە بۇل ءىستى بوساڭسىتىپ جىبەردى.
كوروناۆيرۋس بويىنشا ءۇش اي بۇرىن ارنايى قۇرىلعان رەسپۋبليكالىق كوممۋنيكاتسيالىق ورتالىق قازىرگى ۋاقىتتا ءىس جۇزىندە جۇمىس ىستەمەيدى. وسىعان سايكەس، بۇگىندە بىرىڭعاي ناقتى اقپاراتتار دەرەگى جوق. ىندەتكە قارسى كۇرەستە جاۋاپتى شەنەۋنىكتەر تەرىس اقپارات بەرىپ، حالىقتى ودان ءارى اداستىرادى. ەڭ جامانى وسى.
اكىمدەر مەن مينيسترلەر قاراپايىم حالىقپەن بايلانىس ورناتۋدى قويدى. ولاردىڭ ارىز-شاعىمدارىنا دەر كەزىندە جاۋاپ بەرمەيدى. سوندىقتان تۇرعىنداردىڭ كوپشىلىگى قايدا بارارىن بىلمەي، تورىعۋدا."- دەدى پرەزيدەنت.
قاسىم-جومارت توقاەۆ ىندەتتىڭ كەڭ تارالۋىنا بايلانىستى تۇرعىنداردان ارىز-شاعىم كوپ ءتۇسىپ جاتقانىن جەتكىزدى.
«www.coronavirus2020.kz سايتىنا قىرىق مىڭعا جۋىق سۇراق كەلىپ ءتۇستى. قازىرگى تاڭدا ونىڭ ۇشتەن بىرىنە عانا جاۋاپ بەرىلدى. مۇنداي قارىم-قاتىناستىڭ ناتيجەسىندە تەرىس ءارى جالعان اقپاراتتار ءورشىپ تۇر. بۇل ءبىزدىڭ جۇمىسىمىزدى ودان سايىن قيىنداتۋدا.
اقپاراتتىق جۇمىستارعا قاتىستى ءتاسىلدى تۇبەگەيلى وزگەرتۋ كەرەك. تەلەارنالاردان، تىكەلەي ەفير ارقىلى دارىگەرلەردەن كەڭەس الىپ، سۇراقتارىنا جاۋاپ الاتىن كۇندەلىكتى باعدارلامالاردى ۇيىمداستىرۋعا نەگە بولمايدى؟ ازاماتتارعا ەمدەۋدىڭ پروتوكولىن، الگوريتمىن جەتكىزۋ كەرەك. ءدارى-دارمەكتەر، ونى پايدالانۋ جونىندە تۇسىنىكتەمە بەرۋ قاجەت، – دەدى پرەزيدەنت.
"ادىرنا" ۇلتتىق پورتالى
