ءدال وسى ساعاتتا نۇر-سۇلتان كوشەلەرىندە كيىم سالعان سومكەسىن سۇيرەپ 10 مەديتسينا قىزمەتكەرى قوناتىن جەر ىزدەپ ءجۇر. ولار ءجاي قىزمەتكەرلەر ەمەس، ەلوردادا جاڭادان سالىنعان جۇقپالى اۋرۋلار اۋرۋحاناسىنىڭ جۇمىسشىلارى. كوروناۆيرۋسپەن كۇرەسىپ جۇرگەن مەديتسينا قىزمەتكەرلەرى كەشكىسىن جۇمىستان شىققالى بەرى قوناتىن جەر ىزدەپ كوشەدە ءجۇر. بۇل تۋرالى "ادىرناعا" نۇر-سۇلتاننىڭ مەديتسينا قىزمەتكەرلەرلەرى حابارلادى.
⠀
كوشە كەزىپ كەتكەن تەك وسى 10 ادام عانا ەمەس، جالپى سانى 450گە جۋىق قىزمەتكەر. كەشەدەن بەرى ياعني، 16-17 ماۋسىم كۇندەرى قىزمەتكەرلەردىڭ بارلىعىن قوناق ۇيدەن شىعارىپ جىبەرگەن. ولار رامادا پلازادا تۇرىپ كەلىپتى. كىمنىڭ قايدا باراتىنىندا ەشكىمنىڭ شارۋاسى جوق. تەك قوناق ءۇيدى بوساتىڭدار دەگەن بۇيرىق كەلگەن.
450 قىزمەتكەر كوشە كەزىپ كەتكەن. اعايىن-تۋىسىنا بارا المايدى. سەبەبى وزدەرى كوروناۆيرۋستىڭ ناق ورتاسىندا جۇرگەندىكتەن بىردەن ءبىر تاسىمالداۋشى ادامدار بولىپ ەسەپتەلەدى. سوندىقتان ولارعا ەشكىم كۆارتيرانى جالعا دا بەرگىسى كەلمەي جاتىر.
⠀
"ونىمەن قويماي، بۇرىن جۇمىسقا الىپ بارىپ، الىپ كەلەتىن ارنايى اۆتوبۋستار دا توقتاپ قالدى. ەندى اق حالاتتىلار كوروناۆيرۋسپەن كۇرەسۋگە قوعامدىق كولىكپەن قاتىنايدى. سول سەبەپتى 450 ادام 450 covid-19 تاسىمالداۋشى بولىپ ەسەپتەلەدى،" - دەيدى قىزمەتكەرلەر.
⠀
شاعىمدانۋشىلاردىڭ ايتۋىنشا، بىرىنشىدەن، كۇن-ءتۇن دەمەي قىزمەتتە جۇرگەن مەد.قىزمەتكەرلەرگە جاسالىپ وتىرعان ادىلەتسىزدىك. ەكىنشىدەن، ماسكانىڭ ءوزىن ارەڭ تاعىپ جۇرگەن قاراپايىم تۇرعىندار ءۇشىن دە قاۋىپ. سەبەبى ولار ەپيتسەنترگە كۇن سايىن كىرىپ-شىعىپ جۇرگەن ادامدار. ⠀
"تۇسىنۋگە ميىم جەتپەي وتىر. ەل بولىپ ساقتىق شارالارىن ساقتاۋعا شامامىز جەتپەي جاتقاندا، 450 covid-19 تاسىمالداۋ قاۋپى جوعارى ادامدى سانالى تۇردە تاراتىپ جىبەرۋدى قالاي تۇسىندىرۋگە بولادى؟", - دەپ اشىنادى.
دەنساۋلىق ساقتاۋ مينيسترلىگى بۇل ماسەلەنى شۇعىل قولعا الادى دەپ سەنەمىز.
"ادىرنا" ۇلتتىق پورتالى
