«اق جول» فراكتسياسى ۇكىمەتكە داعدارىستان شىعۋ كەزىندە بيزنەستى سالىقتىق قولداۋدى ۇلعايتۋدى ۇسىنادى. بۇل تۋرالى بۇگىن فراكتسيا دەپۋتاتى ەكاتەرينا نيكيتينسكايا قر پرەمەر-مينيسترىنە جولداعان دەپۋتاتتىق ساۋالىندا ايتتى.
قازاقستان رەسپۋبليكاسى
پرەمەر-ءمينيسترى
ا.ۇ مامينگە
قۇرمەتتى اسقار ۇزاقپايۇلى!
Covid-19 ىندەتى الداعى ەكى جىلدا الەمدىك ەكونوميكاعا بۇرىن-سوڭدى بولماعان كەرى اسەرىن تيگىزەرى ءسوزسىز. قازاقستان بۇگىننىڭ وزىندە وسىنداي قاۋىپ-قاتەرمەن بەتپە بەت كەلۋدە. ەكونوميكالىق ىنتىماقتاستىق جانە دامۋ ۇيىمىنىڭ باعالاۋىنشا، ەلدەردىڭ ەپيدەمياعا قارسى شارالارى ءوندىرىستىڭ 20-دان 25% -عا ازايۋىنا اكەلۋى مۇمكىن، ال تۇتىنۋشىلىق شىعىندار باستاپقىدا ۇشتەن بىرگە ازايادى دەپ كۇتىلۋدە.
ورتا جانە شاعىن كاسىپورىندار مەن ءوزىن-ءوزى جۇمىسپەن قامتىعان ادامدار ءۇشىن ەكونوميكالىق بەلسەندىلىكتىڭ تومەندەۋى ەڭ قيىن تاۋەكەلدەر بولىپ تابىلادى. ساتىپ الۋشىلاردىڭ سانى كۇرت تومەندەپ، كەلىسىم-شارتتار بۇزىلىپ، جەتكىزۋ تىزبەكتەرى ءۇزىلۋى مۇمكىن. دەگەنمەن كاسىپورىندار كەڭسە الاڭىن جالعا الۋ، كوممۋنالدىق تولەمدەر، جالاقى تولەۋ جانە تاۋارلىق-ماتەريالدىق قورلاردى تولتىرۋ شىعىندارىن ءوز موينىنا الادى. ىندەت كەزىندە بۇل شىعىندار كەيبىر كاسىپورىندار ءۇشىن ۇلعايۋى دا مۇمكىن. بۇگىننىڭ وزىندە الماتى قالاسىندا ازىق-تۇلىك پەن دايىن تاماقتى جەتكىزەتىن ورتا كومپانيالاردىڭ ايلىق شىعىنى 16 ملن تەڭگەنى قۇراعان. بۇعان قالا سىرتىندا تۇراتىن جۇمىسكەرلەر ءۇشىن قوناق ۇيلەر مەن جاتاقحانالاردى جالداۋ، گيگيەنالىق جەكە قۇرالداردى، توسەكتەردى ساتىپ الۋ، جۇمىسقا جەتكىزۋ ءۇشىن كولىكپەن قامتاماسىز ەتۋ جانە تاعى باسقا دا شىعىندار كىرەدى.
ناۋرىز ايىندا پرەزيدەنتتىڭ «ەكونوميكانى تۇراقتاندىرۋ جونىندەگى شارالار تۋرالى» №287 جارلىعىنا سايكەس ۇكىمەت توتەنشە جاعدايدىڭ ەنگىزىلۋىنە بايلانىستى سالىقتىق قولداۋ شارالارى تۋرالى №224 قاۋلىسىن قابىلدادى.
اتالمىش قاۋلى بويىنشا ميكرو، شاعىن جانە ورتا كاسىپورىندار مەن جەكە كاسىپكەرلەر 2020 جىلدىڭ 1 ساۋىرىنەن 1 قازانىنا دەيىن، ال ءىرى كاسىپورىندار 1 ساۋىردەن 1شىلدەگە دەيىن مىندەتتى الەۋمەتتىك مەديتسينالىق ساقتاندىرۋ تولەمدەرىنەن، جەكە تابىس پەن الەۋمەتتىك سالىقتان، زەينەتاقى تولەمدەرىنەن بوساتىلادى.
ءوزىن-ءوزى جۇمىسپەن قامتىعاندار ءۇشىن ۇشۋ-قونۋ جولاقتارىنداعى اەرودرومداردا، اۋەجاي تەرمينالدارىندا مۇلىك سالىعى ستاۆكالارىنا نولدىك كوەففيتسيەنت ەنگىزىلدى.
اۋە جولاۋشىلار كولىگى كاسىپورىندارىنا رەزيدەنت ەمەستەرگە اۋە كەمەلەرىن ليزينگكە تەحنيكالىق قىزمەت كورسەتۋ جانە قۇقىقتىق قولداۋ ءۇشىن ققس تولەۋ 2021 جىلدىڭ 1 قاڭتارىنا دەيىن كەيىنگە قالدىرىلدى.
سونداي-اق، سالىق تولەۋشىلەر ءۇشىن 2019 جىلدىڭ سالىق ەسەپتەرىن تاپسىرۋ بويىنشا ەكى ايلىق (31 ناۋرىزدان باستاپ 31 مامىرعا دەيىن) شەگەتۋلەر ەنگىزىلدى
كوروناۆيرۋستىق داعدارىس جاعدايىنداعى سالىق جانە سالىق ساياساتى بيزنەستىڭ سەنىمدىلىگى مەن تۇراقتىلىعىن ارتتىرۋعا باعىتتالۋى كەرەك. الداعى ۋاقىتتا سالىقتىق تۇسىمدەردىڭ ازايۋى ىقتيمالدىعى جوعارى بولعاندىقتان، ولاردى كوبەيتۋدىڭ جاقسى ءادىسى - تۇراقتى ىنتالاندىرۋ ارقىلى ەكونوميكالىق ءوسۋدى قامتاماسىز ەتۋ.
وسى تۇرعىدان العاندا قابىلدانىپ جاتقان فيسكالدىق شارالار ۇيلەستىرىلمەگەن جانە جەتكىلىكسىز كورىنەدى.
مىسالى، ميكرو، شاعىن جانە ورتا بيزنەس نىساندارىنا نەگە ەكەنى بەلگىسىز 2000 شارشى مەتر جانە ودان جوعارى ساۋدا نىسانداردااۆتوموبيلدەر مەن اۆتوكولىك قۇرالدارىنىڭ ءىرى بولشەك ساۋداسى، ساۋدا-ساۋىق ورتالىقتارى مەن باسقا دا كوممەرتسيالىق جىلجىمايتىن مۇلىكتى جالعا بەرۋ جانە باسقارۋ، اۋە بەكەتتەرىنىڭ، اۋە جولاۋشىلار كولىگىنىڭ قىزمەتتەرى، سونداي-اق كوممەرتسيالىق قىزمەتتەر جانە باسقارۋ ماسەلەلەرى بويىنشا كونسۋلتاتسيالار دا ەنگىزىلگەن.
ءىرى كاسىپكەرلىك نىساندارىنىڭ تىزىمىندە دە ءدال سول نىساندار كوزگە تۇسەدى.
البەتتە، ەڭ الدىمەن ۇلكەن بيزنەسكە نازار اۋدارىلعاندىقتان، قۇندىق تىزبەكتىڭ ءوسۋىن قامتاماسىز ەتەتىن ەكونوميكا سالالارى ءىس جۇزىندە ۇسىنىلمادى.
ال، ققس تولەۋدى كەيىنگە قالدىرۋ ءوز الدىنا ءبىر بولەك. 2019 جىلعا ارنالعان سالىقتىڭ ەسەپتىڭ ەكى ايعا كەيىنگە قالدىرۋدا ەشقانداي جەڭىلدىكتەر قاراستىرىلماعان.
وسىعان بايلانىستى «اق جول» دەموكراتيالىق پارتياسىنىڭ فراكتسياسى ۇكىمەتكە داعدارىسقا قارسى ۇزاق مەرزىمدى سيپاتتاعى جۇيەلى سالىقتىق شارالارىن قابىلداۋدى، ونىڭ ىشىندە:
- وتكەن جىلعى كىرىس دەڭگەيىن ەسەپكە الماي، تاۋار اينالىمىنىڭ بولجامدى وزگەرۋىنە نەگىزدەلگەن 2020 جىلى كورپوراتيۆتىك تابىس سالىعى بويىنشا اۆانستىق تولەمدەردىڭ توقتاتۋدى نەمەسە تۇزەتۋدى;
- ەكونوميكانىڭ ناقتى سەكتورلارىنداعى ءوزىن-ءوزى جۇمىسپەن قامتىعاندارعا، ميكرو جانە شاعىن بيزنەسكە جەكە تابىس سالىعى، سونداي-اق الەۋمەتتىك ساقتاندىرۋ جارنالارى بويىنشا نولدىك مولشەرلەمەنى ۇزارتۋدى;
- 2020 جىلى الەۋمەتتىك ماڭىزى بار تاۋارلارعا، سونداي-اق يمپورتتالاتىن ءدارى-دارمەكتەر مەن ولاردى وندىرۋگە ارنالعان جابدىقتارعا قوسىلعان قۇن سالىعى مەن كەدەندىك باجداردىڭ تومەندەتىلگەن مولشەرلەمەلەرىن ەنگىزۋدى;
- ايىپپۇلدار مەن ءوسىمپۇلدار ەسەبىن توقتاتا تۇرۋ كەزىندە دەكلاراتسيانى تاپسىرۋ مەن سالىقتاردى تولەۋ مەرزىمدەرىن ۇزارتۋدى;
- 2020 جىلى كارانتين شارالارىن ەنگىزۋ ناتيجەسىندە قالىپتاسقان سالىقتىق قارىزداردى ءوندىرىپ الۋدى، سونىڭ ىشىندە بانكتىك شوتتار مەن اكتيۆتەردى بۇعاتتاۋدى توقتاتۋدى ۇسىنادى.
ءبىزدىڭ ۇسىنىستارىمىزدى قاراستىرۋىڭىزدى سۇرايمىز.
قۇرمەتپەن،
«اق جول» قدپ فراكتسياسىنىڭ دەپۋتاتتارى
