ماقتاارال اۋدانىنداعى سۋ تاسقىنىنا وراي اۋىل شارۋاشىلىعى سالاسىندا تۇگەندەۋ جۇمىستارى جالعاسۋدا. قازىرگى تاڭدا بۇل جۇمىستارمەن تۇركىستان وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ باستاعان ارنايى جۇمىسشى توبى اينالىسىپ جاتىر.
بۇگىن بۇل تۋرالى مىرزاكەنت كەنتىندەگى شتابتىڭ ءباسپاسوز ورتالىعىندا تۇركىستان وبلىستىق اۋىل شارۋاشىلىعى باسقارما باسشىسىنىڭ ورىنباسارى تۇرعانبەك وسپانوۆ ءمالىم ەتتى.
باسقارما ورىنباسارىنىڭ ايتۋىنشا، قازىردىڭ وزىندە 3601 گەكتارعا جۋىق اۋىل شارۋاشىلىعى داقىلدارىنىڭ سۋ استىندا قالىپ، زارداپ شەككەنى انىقتالعان. الدىن الا بولجام بويىنشا شىعىن كولەمى 404 ملن تەڭگەنى قۇراپ وتىر. اسىرەسە، جاڭاجول، ەڭبەكشى اۋىل وكرۋگتەرىنە قاراستى جەڭىس، جاڭاتۇرمىس، جانتاقساي اۋىلدارىنداعى القاپتار كوپتەپ زارداپ شەككەن. سۋ استىندا قالعان ەگىستىك القاپتىڭ 85 پايىزىن ماقتا ەگىستىگى قۇرسا، قالعانى جوڭىشقا مەن جۇگەرىگە تيەسىلى ەكەنى انىقتالىپتى.
ء"دال قازىرگى تاڭدا 95 مامانىمىز سۋ استىندا قالعان ەگىستىك القاپتارى مەن مال شىعىندارىن ەسەپتەپ، تۇگەندەۋ جۇمىستارىن جۇرگىزۋدە. ماقتاارال اۋدانىنداعى ەگىستىك القاپتار مەن مال شىعىندارىن تولىق ەسەپتەۋگە ازىرگە مۇمكىندىك از بولىپ تۇر. دەسەك تە، تۇرعىندار بەرگەن مالىمەتتەردى اۋداندىق اۋىل شارۋاشىلىعى بولىمىمەن بىرلەسە وتىرىپ، زەردەلەپ جاتىرمىز. ءبىز الداعى ۋاقىتتا سۋ تاسقىنى باسىلعان سوڭ اۋىلداردى ارالاپ، شىعىن كولەمىن ناقتى انىقتايتىن بولامىز", - دەيدى تۇرعانبەك وسپانوۆ.
ايتا كەتەيىك، بۇگىندە ماقتاارال اۋدانىندا الداعى ۋاقىتتا سۋ باسۋ قاۋپى بار اۋىلداردا مالدى ەۆاكۋاتسيالاۋ جۇمىستارى جالعاسۋدا. قازىردىڭ وزىندە سۋ تاسقىنى ورىن العان 7 ەلدىمەكەننەن ياعني، جەڭىس، جاڭاتۇرمىس، جانتاقساي، فەردوۋسي، ەڭبەكشى، نۇرلىتاڭ، ورگەباس اۋىلدارىنان 3115 ءىرى قارا، 1101 جىلقى، 585 قوي، 34 تۇيە كوشىرىلگەن. ال سۋعا كەتىپ ولگەن مال سانى ازىرگە بەلگىسىز بولىپ وتىر. بۇل جۇمىستارعا تاسقىن سۋدىڭ ءالى دە بولسا توقتاماي تۇرعانى قولبايلاۋ بولۋدا.
"ادىرنا" ۇلتتىق پورتالى
