الماتىدا 21 ساۋىردە COVID-19 ىندەتىن جۇقتىرعاندار 669 ادامعا جەتتى. بۇل تۋرالى قالالىق دەنساۋلىق ساقتاۋ باسقارماسى حابارلادى.
قالادا سوڭعى ءبىر تاۋلىكتە جاڭادان 145 ىندەت جۇقتىرۋشى انىقتالعان.
ولاردىڭ 104-ءى ورتالىق قالالىق كلينيكالىق اۋرۋحانانىڭ، 12-ءى №12 قالالىق ەمحانانىڭ، 11-ءى قازىرگى ۋاقىتتا پروۆيزورلىق ورتالىق بولىپ تابىلاتىن قالالىق پاللياتيۆتىك كومەك ورتالىعىنىڭ قىزمەتكەرلەرى. سونداي-اق قالعان 18 ادام ۆيرۋس جۇقتىرعان ناۋقاستارمەن بايلانىستا بولعان جاندار.
بۇگىندە قالاداعى جۇقپالى اۋرۋلار ستاتسيونارلارىندا الماتى وبلىسىنىڭ ءبىر ناۋقاسىن قوسا العاندا 577 ادام قاۋىپتى ىندەتتەن ەمدەلىپ جاتىر.
ەكى ناۋقاستىڭ جاي-كۇيى – وتە اۋىر، 6 ادامدا – اۋىر، 168-ءى اۋىرلىقتىڭ ورتاشا دارەجەسىندە، ال قالعاندارىنىڭ دەنساۋلىعى قاناعاتتانارلىق.
جالپى 88 ناۋقاس قاۋىپتى ىندەتتەن ساۋىعىپ شىقتى. پروۆيزورلىق گوسپيتالداردا 452 ادام، كارانتيندىك وقشاۋلاۋدا 352 جانە ءۇي كارانتينىندە 9950 ادام بار.
مەگاپوليستەگى بوستاندىق اۋدانىنىڭ باس سانيتارلىق دارىگەرىنىڭ قاۋلىسىنا سايكەس №12 قالالىق ەمحانا كارانتينگە جابىلدى.
ورتالىق قالالىق كلينيكالىق اۋرۋحاناعا قاتىستى ايتار بولساق، ستاتسيونار تازا جانە ۆيرۋس جۇقتىرعان ايماقتارعا بولىنگەن. بۇگىندە ەمحانادا قوسىمشا 150 جۇقپالى، 60 پروۆيزورلىق جانە 150 كارانتيندىك توسەك-ورىن اشىلدى. ەم قابىلداپ جاتقان ناۋقاستارعا مەديتسينالىق كومەك وباعا قارسى كيىم-كەشەك كيىلىپ كورسەتىلەدى. بۇل رەتتە ەم جۇرگىزىپ جاتقان مەديتسينا قىزمەتكەرلەرىنىڭ بارلىعىندا تالداۋ ناتيجەلەرى تەرىس.
تالداۋلارى وڭ ناتيجە بەرگەن مەديتسينا قىزمەتكەرلەرى جۇمىستان شەتتەتىلىپ، ينفەكتسيالىق ستاتسيونارلار مەن بولىمشەلەردە ەم-دوم قابىلداۋدا.
اكىمشىلىك قىزمەتكەرلەردى الەۋمەتتىك قورعاۋ بويىنشا تۇراقتى جۇمىس جۇرگىزۋدە. كارانتين جانە جابىق كەڭىستىك ادامداردىڭ پسيحولوگيالىق جاعدايىنا كەرى اسەر ەتۋى مۇمكىن. وسىنى ەسكەرگەن ماماندار ۇجىمداعى قارىم-قاتىناس ءادىسىن دە دۇرىس جولعا قويۋدا.
قالاداعى بارلىق مەديتسينالىق ۇيىمدار قاجەتتى جەكە قورعانۋ قۇرالدارىمەن تولىق جابدىقتالعان.
قازىرگى ەسەپ بويىنشا، ەلىمىزدە 1967 ناۋقاس تىركەلىپ، 452 ادام ايىعىپ شىققان. وكىنىشكە قاراي 19 ادام ىندەتتەن كوز جۇمدى.
الماتى
