باس سانيتار: كوروناۆيرۋس ەلدىڭ ىشىندە تاراي باستادى

قازاقستاننىڭ باس سانيتار دارىگەرى ايجان ەسماعامبەتوۆا كوروناۆيرۋستىڭ ەلدىڭ ىشىندە تاراي باستاعانىن ەسكەرتتى، دەپ حابارلايدى Sputnik قازاقستان .

"قۇرمەتتى قازاقستاندىقتار، ماڭىزدى ءبىر ماسەلەگە نازار اۋدارعىم كەلەدى، بۇگىندە 369 ناۋقاستىڭ ىشىندە 91 ادام عانا شەتەلدەن اۋىرىپ كەلگەن. قالعانى –  وسىندا ءجۇرىپ، ۆيرۋستى جاقىن قارىم-قاتىناس ارقىلى جۇقتىرعاندار. بۇل دەگەنىمىز، ينفەكتسيا ەلدىڭ ىشىندە تاراپ جاتىر", - دەدى ەسماعامبەتوۆ بۇگىنگى ونلاين بريفينگتە.

ونىڭ ايتۋىنشا، بۇگىندە ناۋقاستىڭ وزىنەن ەمەس، ونىمەن بايلانىستا بولعان ءبىر كىسىدەن 10 ادامنىڭ ينفەكتسيا جۇقتىرۋ وقيعالارى بار.

"ۆيرۋس تەز جۇعادى. ءبىر ادام ينفەكتسيانى ءتورت ادامعا دەيىن تاراتا الادى. سوندىقتان كارانتين شارالارىن قاتاڭ ساقتاۋ قاجەت. قازىرگى كەزدە ونداي شارالار بارلىق ايماقتاردا قولعا الىندى. كارانتين دەگەنىمىز، ول - بارلىق قارىم-قاتىناستى دوعارۋ. سول سەبەپتى ۇيدە بولىڭىزدار، قۇرمەتتى ازاماتتار. دالاعا ازىق-تۇلىك پەن ءدارى-دارمەك الۋعا عانا شىعىڭىزدار", - دەپ اتاپ كورسەتتى ەسماعامبەتوۆا.

وسى ورايدا باس سانيتار جەكە گيگيەنا تالاپتارىن ساقتاۋدىڭ ماڭىزدىلىعىن ەرەكشە اتاپ ءوتتى. دالاعا شىققاندا قولمەن بەتتى جانە كوزدى ۇستاۋعا بولمايدى. ادامدارمەن سويلەسىپ تۇرعاندا، كەم دەگەندە، ەكى مەتر الشاق تۇرۋ قاجەت. انتيسەپتيكتى قولدانىپ ءجۇرۋ كەرەك. ال اۋرۋدىڭ العاشقى بەلگىلەرى بايقالسا، بىردەن جەدەل جاردەمدى شاقىرعان دۇرىس.