قازاقستاندا 8 پروتسەنتپەن كرەديت بەرىلەدى

3837
Adyrna.kz Telegram

 ۇلتتىق بانك شاعىن جانە ورتا كاسىپكەرلەردى جەڭىلدىكپەن كرەديتتەۋ باعدارلاماسىنىڭ بەكىتىلگەنىن مالىمدەدى، دەپ حابارلايدى Sputnik قازاقستان بانكتىڭ رەسمي سايتىنا سىلتەمە جاساپ.

بانكتىڭ مالىمەتىنشە جاڭا باعدارلاما كورونوۆيرۋس پاندەمياسىنا جانە ونىڭ قازاقستان ەكونوميكاسىنا تەرىس ىقپالىنا بايلانىستى توتەنشە جاعداي سالدارىنان زارداپ شەككەن كاسىپكەرلەردى قولداۋ ءۇشىن جاسالدى. بۇعان دەيىن پرەزيدەنت قاسىم-جومارت توقاەۆ تا ءتيىستى تاپسىرما بەرگەن. وسىلايشا ۇلتتىق بانك قارجى نارىعىن رەتتەۋ جانە دامىتۋ اگەنتتىگىمەن بىرلەسىپ شاعىن جانە ورتا كاسىپكەرلىك سۋبەكتىلەرىن جەڭىلدىكپەن كرەديتتەۋ باعدارلاماسىن ازىرلەدى.

"باعدارلامانى ىسكە اسىرۋ ءۇشىن ەكىنشى دەڭگەيلى بانكتەردە نەگىزدەلگەن سالىمداردى ورنالاستىرۋ ارقىلى 600 ميلليارد تەڭگە ءبولىندى. بيزنەستى قولداۋ تەتىگى ەكىنشى دەڭگەيلى بانكتەردىڭ توتەنشە جاعدايدىڭ ەنگىزىلۋى سالدارىنان زارداپ شەككەن شاعىن جانە ورتا كاسىپكەرلىك سۋبەكتىلەرىنە، جەكە كاسىپكەرلەرگە 12 ايعا دەيىنگى مەرزىممەن جىلدىق 8%-تەن اسپايتىن مولشەرلەمە بويىنشا اينالىم قاراجاتىن تولىقتىرۋعا جەڭىلدىكپەن كرەديتتەر بەرۋ ارقىلى ىسكە اسىرىلادى", - دەلىنگەن رەسمي حابارلامادا.

ەكىنشى دەڭگەيلى بانكتەر بولىنگەن قاراجاتتى 3 ايدىڭ ىشىندە يگەرۋى ءتيىس. باعدارلامانىڭ وپەراتورى – ۇلتتىق بانك جانىنداعى "قازاقستاننىڭ ورنىقتىلىق قورى" اق. كرەديتتەر 13 بانك ارقىلى بەرىلەدى.

"باعدارلاماعا قاتىسۋشى بانكتەرگە بولىنگەن قاراجاتتى مەملەكەتتىك جانە مەملەكەتتىك ەمەس باعالى قاعازداردى ساتىپ الۋعا، باسقا بانكتتەردەگى دەپوزيتتەرگە ورنالاستىرۋعا، شەتەل ۆاليۋتاسىن ساتىپ الۋعا جانە وزگە دە ماقساتقا پايدالانۋعا تىيىم سالىنادى. قازاقستان قارجى نارىعىن رەتتەۋ جانە دامىتۋ اگەنتتىگى "قازاقستاننىڭ ورنىقتىلىق قورى" اق-مەن بىرلەسىپ كاسىپكەرلەرگە بەرىلگەن جەڭىلدىكتى كرەديتتەردىڭ ۋاقىتىلى جانە نىسانالى پايدالانىلۋىنا اي سايىنعى نەگىزدە مونيتورينگ جۇرگىزەدى", - دەلىنگەن بىرلەسكەن مالىمدەمەدە.

 

پىكىرلەر