كەشە فەيسبۋك الەۋمەتتىك جەلىسىندە بەكبەي بەك ەسىمدى ازامات بۇگىن زايساندا كوروناۆيرۋسكە بايلانىستى ءجۇرتتىڭ دۇرلىگىپ كەتكەنى تۋرالى جازىپ اقپارات قالدىرعان بولاتىن. ول ءوز جازباسىندا: "زايسان اۋدانىنىڭ سارىتەرەك اۋىلىنىڭ تۇرعىندارى بۇگىن 19.02.2020 ساعات 15:00 نارازىلىقپەن اۋىلدىڭ امبۋلاتورياسىنىڭ الدىنا جينالدى. بۇكىل ءبىر اۋىلدىڭ تۇرعىندارى نارازىلىقا جينالدى. اۋىلدىڭ تۇرعىندارىن ەش ەسكەرتۋسىز اۋداندىق اۋرۋحانانىڭ باس دارىگەرى مەن ونىڭ ورىنباسارلارى "مىناۋ بۇيرىق" دەپ ءبىر جاپىراق قاعازبەن ەرتەڭ تاڭەرتەڭ قازاقستان مەن قىتاي مەملەكەتىنىڭ مايقاپشاعاي شەكارا بەكەتىنەن اۆتوبۋسپەن قىتايدان بەرى كەلگەن جولاۋشىلاردى قىتايداعى اتى شۋلى كورانوۆيرۋسقا بايلانىستى قىتايدان كەلگەن ادامداردى 14 كۇنگە زايسانداعى سارىتەرەك اۋىلدىق امبۋلاتورياسىنا جاتقىزىپ باقىلاۋ جاساماق ەكەن. ال اۋىلدىق امبۋلاتورياسىن اۋىلدىق مادەنيەت ۇيىنە كوشىرمەك . امبۋلاتورياعا شەكارادان كىرگەن جولاۋشىلاردى جاتقىزباق. اۋىل حالىقتى اۋدان بيلىگى، جاۋاپتى مەكەمەلەر قۇلاقتاندىرۋ جۇمىسىن جۇرگىزبەگەنىنە، اۋىل حالقى شۋلاپ، اۋىل اقساقالدارى ء"بىزدى ادام ساناپ وتىرعان جوقسىڭدار" دەپ اۋدان اكىمدىگى اۋدان اكىمى س.اقتانوۆتىڭ كەلۋىن تالاپ ەتتى"-دەگەن بولاتىن.
بۇگىن وسى وقيععاعا بايلانىستى زايسانعا شىعىس قازاقستان وبلىسىنىڭ اكىمى دانيال احمەتوۆ كەلدى. جينالعان حالىق اكىمگە "بىزبەن اشىق تۇردە جينالىس ەتۋدى سۇرايمىز. تالابىمىز شەكارا جابىلسىن، مايقاپشاعاي بەكەتىنىڭ جابىلۋىن تالاپ ەتەمىز" دەدى.
ءوز كەزەگىندە شىعىس قازاقستان وبلىسىنىڭ اكىمى دانيال احمەتوۆ "ەستەرىڭىزدە بولسىن، شەكارادان بىردە-ءبىر شەتەل ازاماتى وتپەيدى. شەكارادان تەك قانا قازاقستاننىڭ ازاماتى كەلەدى. ولار ءبىزدىڭ تۋىستارىمىز، بالالارىمىز بولۋى مۇمكىن. ول ءبىزدىڭ قانىمىز عوي. ەرتەڭ ولاردى جىبەرمەسەك، قالاي بولادى؟ شەكارادان تەك قازاقستاندىقتار عانا وتەدى. ولارمەن ارنايى جۇمىس ىستەيمىز",-دەدى.
"ادىرنا" ۇلتتىق پورتالى
