«ەلىمىزدە شەن-شەكپەندىلەردىڭ، اكىم – قارالاردىڭ ورنى ساتىلىپ الىنادى ەكەن» دەگەن سىپسىڭ ءسوز شىندىققا اينالا باستاعانداي. بۇلاي دەيتىنىم كەشە عانا الەۋمەتتىك جەلىدە ءسوز بوپ جاتقان جامبىل وبلىسى، مەركى اۋدانى اكىمىنىڭ ورىنباسارى مەيىرجان سۇلەيمەنوۆتىڭ ءوزىنىڭ باسشىسىنىڭ جايلى ورنىن يەلەنۋگە 50 مىڭ دوللار بەرمەك بولعان ماسقارا قارەكەتى. بۇل جايت بۇكىل اكىمدەردىڭ ابىرويىنا جاعىلعان قارا كۇيە بولماق. ءتىپتى الگى بەيباق تەلەفونمەن ء(وڭىردىڭ بەلگىلى بيزنەسىمەنىمەن) سويلەسىپ جاتىپ، «الگى ورىن 50 مىڭ دوللار ەمەس، 200 مىڭ دوللارعا دەيىن كوتەرىلىپ كەتپەي مە؟» دەگەن ۇرەيدە ايتقان كورىنەدى. بۇل ءسوزدىڭ ءبارى ۇلتتىق بيۋرو وكىلدەرى ونىڭ تەلەفونىن تىڭداعاندا بەلگىلى بولسا كەرەك. ءوزىنىڭ باسشىسىنىڭ ورنىن اقشا ارقىلى ساتىپ الماق بولعان مەيىرجان سۇلەيمەنوۆتىڭ الداعى تاعدىرى نە بولماق؟ ەستۋىمىز شە ول قىزمەتتەن بوساتىلعان كورىنەدى. ءجون –اق. ەگەردە ەشكىم بىلمەي ول اۋدان اكىمىنىڭ ورىنتاعىن 200 مىڭ دوللارعا ساتىپ الىپ جاتسا، قالتاسىنان شىعارعان اقشانىڭ ورىن قالاي تولتىرادى؟ ورتا ەسەپپەن العاندا 200 مىڭ دولار 70 ميلليون تەڭگە. دەمەك شىققان شىعىندى اۋدان حالقىنىڭ ەسەبىنەن جاباتىنى بەلگىلى. ياعني پاراقورلىققا، جەمقورلىققا جول اشادى دەگەن ءسوز. مىنە، ءبىزدىڭ ەلدە جەمقورلىق وسىلاي ءورشىپ وتىر. وسى ورايدا سىبايلاس جەمقورلىققا قارسى اگەنتتىك جۇمىسىن كۇشەيتۋى ءتيىس. بۇل جەردە كوزگە كورىنىپ تۇرعان ەڭ باستى ماسەلە، اكىم –قارالاردى تاعايىنداۋدىڭ دۇرىس ەمەستىگى. «بارماق باستى، كوز قىستى» بولىپ، رەتىن تاۋىپ جىلى، مايلى ورىنعا وتىرعان اكىم قارا باسىنىڭ مۇددەسىن ءبىرىنشى ورىنعا قوياتىنى بەلگىلى. قايتپەك كەرەك؟ دەمەك بارلىق اكىمدەردى تەك حالىقتىق سايلاۋ ارقىلى عانا بيلىك تىزگىنىن ۇستاتۋ قاجەت. سوندا عانا ولار حالىقپەن ساناسىپ، ەل الدىندا جاساعان ەڭبەگى ءۇشىن ەسەپ بەرەدى. ال ۇيتپەيىنشە، وسى كەتكەنىمىز كەتكەن.
ازاماتحان ءامىرتاي،
«بايتاق-بولاشاق» ەكولوگيالىق اليانسىنىڭ توراعاسى،
ۇلتتىق قوعامدىق سەنىم كەڭەسىنىڭ مۇشەسى
