بىرىككەن ۇلتتار ۇيىمى جانىنداعى قازاقستانننىڭ تۇراقتى وكىلدىگى مەن بۇۇ-نىڭ تەرروريزمگە قارسى باسقارماسى نيۋ-يورك قالاسىندا «تەرروريزمنەن ازات الەمگە جانە بۇۇ 2030 جىلعا دەيىنگى تۇراقتى دامۋ كۇن تارتىبىنە قول جەتكىزۋ ءۇشىن دامۋشى ەلدەردىڭ سينەرگياسى» اتتى ءىس-شارالاردى ءجيى ۇيىمداستىرادى. اتالمىش جيىنعا الەمنىڭ تۇكپىر-تۇپىرىنەن وكىلدەر قاتىسىپ ءوز ويلارىن وتراعا سالادى. جۋىردا قاراشا ايىندا وسى شارا بارىسىندا قازاقستاننىڭ «جۋسان» وپەراتسيا تۋرالى جان-جاقتى ايتىلىپ، بۇۇ-نا مۇشە مەملەكەتتەرگە ۇلگى رەتىندە كورسەتىلدى..
جالپى، قازاقستان وسىعان دەيىن سيريادان وتانداستارىمىزدى قايتارۋ ماقساتىندا «جۋسان»، «جۋسان-2»، «جۋسان-3» وپەراتسياسىن ۇيىمداستىرعان بولاتىن. العاشقى وپەراتسيادا قازاقستاندىق ارنايى جاساق 47 وتانداسىمىزدى سيريادان ەلىمىزگە قايتارسا، بۇدان سوڭ قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تاپسىرماسىمەن وپەراتسيا ءارى قاراي جالعاسىن تاپتى. «جۋسان-2» وپەراتسياسى كەزىندە سيريادان 231 قازاقستان ازاماتى ەلگە جەتكىزىلدى. ال 28-31 مامىر ارالاعىندا وتكەن وپەراتسيانىڭ سوڭعى كەزەڭىندە، ياعني، «جۋسان-3» شاراسىندا سيريادان قازاقستانعا 67 ايەل ادام، 171 بالا، ونىڭ ىشىندە، توعىزى جەتىم بالا، ەلگە قايتارىلعان. ولار ءبىراز ۋاقىت بويى وڭالتۋ ورتالىعىندا بولىپ، پسيحولوگيالىق، گۋمانيتارلىق كومەك الادى.
«جۋسان-2» وپەراتسياسىنان كەيىن قازاقستانعا سەگىز كۇندىك ساپارمەن بۇۇ تاۋەلسىز ساراپشىسى ني اولەين فيوننۋالا كەلگەنىن بارلىعىمىز بىلەمىز. سول كەزدە بۇۇ ساراپاشىسى ءوز ازاماتتارىن قورعاۋعا العان قازاقستاننىڭ بۇل باتىل قادامى كوپتەگەن ەلدەرگە ۇلگى بولاتىنىن ايتقان ەدى.
«قازاقستان الەم الدىندا ايەلدەر مەن بالالاردى ەلگە قايتارۋ مۇمكىن ەكەندىگىن جانە ونى ورىنداۋعا بولاتىنىن كورسەتتى. مۇنداي گۋمانيتارلىق باستامانى وزگە مەملەكەتتەر دە قولداپ، قولعا السا ءتىپتى جاقسى بولار ەدى. دەگەنمەن مەنى قوعام دەڭگەيىندە قولدانىلاتىن دەراديكاليزاتسيا ادىستەرى الاڭداتىپ وتىر. وسى سالادا جۇمىس ىستەيتىن ۇيىمداردى قازاقستاننان ۇلگى الۋعا شاقىرامىن»، - دەگەن بولاتىن ني اولەين فيوننۋالا.
ال وسى «جۋسان» وپەراتسياسى جونىندە دىگتانۋشى جاندوس ايباروۆ بىلاي دەدى:
«قاۋىپسىزدىك ماسەلەلەرى، تەرروريزممەن كۇرەس جانە وعان قارسى قولداناتىن شارالاردىڭ دامۋى – ءوزارا تاۋەلدى. قازاقستان وسى ماسەلەلەردى شەشۋگە ءوز ۇلەسىن قوسىپ، مينيسترلىك تاراپىنان دا ۇكىمەت تاراپىنان دا، ەلباسى نۇرسۇلتان نازارباەۆتىڭ باستاماسىمەن كوپتەگەن ىستەر اتقارىلدى. ءبىر عانا «جۋسان» وپەراتسياسى قانشاما ازاماتتاردى تىعىرىقتان شىعارۋعا كومەكتەستى. بۇل رەتتە اقپارات جانە قوعامدىق دامۋ ءمينيسترى داۋرەن اباەۆتىڭ «قاۋىپسىزدىك قىزمەتكەرلەرى «جۋسان» وپەراتسياسى ارقىلى سيرياعا كەتكەندەردى توزاقتان الىپ شىقتى» دەگەن ءسوزىنىڭ جانى بار. سيريادان كەلگەندەردىڭبەينە ۇندەۋىن تىڭداپ-اق ولاردىڭ سونداي تاۋقىمەتتەن باستان كەششكەنىن اڭعارۋعا بولادى. مىسالى، 25 جاستاعى ايدا سارينا ءوزىنىڭ سيرياعا قالاي كەلگەنى تۋرالى ەستەلىكتەرىمەن ءبولىسىپ، تەرروريستەر اراسىندا ءومىر ءسۇرۋدىڭ كۇردەلىلىگى، قيىن-قىستاۋ كەزەڭدەرى تۋرالى اڭگىمەلەپ بەردى. بەينەجازبادا سيريادان ورالعان ايدا ءوز وتانىنا ورالۋعا مۇمكىندىك بەرگەنى ءۇشىن قازاقستان ۇكىمەتىنە شىنايى العىسىن ءبىلدىرىپ، ءوزى دە تەرروريستەرمەن كۇرەسۋگە دايىن ەكەنىن شىنايى ايتىپ ءجۇر. بۇل وپەراتسيا اداسقانداردى قالىپقا كەلتىرىپ، شىنىمەن ۇلگى بولىپ وتىرعان دۇنيە».
راسىمەن دە مامان ايتىپ وتىرعانداي، سيريادان كەلگەن ايدا سارينا قازاقستان ۇكىمەتى ارنايى وپەراتسيا ۇيىمداستىرىپ، سيريادان وتانداستارىن الىپ كەتىپ جاتقاندا، فرانتسيادان، گەرمانيادان جانە باسقا ەلدەردەن كەلگەن ايەلدەر قالاي قىزىعا قاراعانىن اڭگىمەلەپ بەرگەن بولاتىن.
«مەن قازاقستاننان كەلگەن قۇتقارۋشىلاردى ءوز كوزىممەن كورگەندە، قۋانىشىمدا شەك بولعان جوق. ەلىمنىڭ ۇكىمەتى ءبىزدى قيىن جاعدايعا تاستاماي، الىپ كەتەتىنىن ءتۇسىندىم، ريزا بولدىم. يا، مەن تەرروريزمنىڭ قۇربانى بولدىم. بىراق قازىر تەرروريزمگە قارسى كۇرەسكىم كەلەدى، وسى ۇلكەن ماقساتتىڭ ءبىر مۇشەسى بولۋعا جانە سۇمدىقتىڭ الدىن الۋعا ءوز ۇلەسىمدى قوسۋعا دايىنمىن. مەن تەرروريزمنەن زارداپ شەككەن بارلىق ايەلدەردىڭ ءۇنىن جەتكىزۋشى بولعىم كەلەدى»، - دەيدى ول.
جالپى، قازاقستاننىڭ جەنەۆا قالاسىنداعى تۇراقتى وكىلدىگى، قازاقستان رەسپۋبليكاسى ادىلەت مينيسترلىگىنىڭ باستاماسىمەن، «جۋسان» وپەراتسياسىنىڭ ناتيجەلەرىندە قازاقستانعا ورالعان ازاماتتاردىڭ، ەڭ الدىمەن ايەلدەر مەن بالالاردىڭ ازاماتتىق ومىرگە قايتا بەيىمدەلۋ جۇمىستارىنا ارنالعان ءىس- شارانى ءجيى وتكىزدى.
مۇنداي ءىس-شارا رەسەي، يران، تۇركيا، سيريا، اقش، ۇلىبريتانيا، وزبەكستان، قىرعىزستان، تۇركىمەنستان، بىرقاتار يىۇ، ەو، لاتىن امەريكا جانە حالىقارالىق مەملەكەتتەرى مەن قۇرىلىمدارىنىڭ - حقكك، بۇۇ-نىڭ ادام قۇقىقتارى جونىندەگى ورگاندارى، يۋنيسەف، ددسۇ، حەۇ ۇلكەن قىزىعۋشىلىعىن تۋدىرىپ وتىر. تىپتەن بۇۇ تاۋەلسىز ساراپشىسى ني اولەين فيوننۋالا باستاعان بىرقاتار ساراپشىلار «قازاقستان «جۋسان» وپەراتسياسى ارقىلى ەلدەگى ءار ازاماتىن باعالاي الاتىنىن الەمگە انىتتى» دەگەندى العا تارتۋدى.
راۋان ءىلياسوۆ،
«ادىرنا» پورتالى
