جامبىل وبلىسىندا «قولجەتىمدى باسپانا»، «نۇرلى جەر» باعدارلامالارى اياسىندا مىڭداعان وتباسى قونىس تويىن تويلاپ جاتىر. سونداي ءبىر قۋانىشتى جاڭالىق وبلىسقا قاراستى جاڭاتاس قالاسىندا بولدى.
جامبىل وبلىسىنىڭ 80 جىلدىعىنا وراي جاڭاتاس قالاسىنا 70 پاتەرلى تۇرعىن ءۇي پايدالانۋعا بەرىلدى. جاڭا قوڭىس تويىن تويلاعاندار نەگىزىنەن كوپبالالى جانە تۇرمىسى تومەن وتباسىلار بولىپ سانالادى.
سارىسۋ اۋدانى اكىمى قاناتبەك مادىبەكتىڭ ايتۋىنشا، «قولجەتىمدى باسپانا»، «نۇرلى جەر» باعدارلامالارى اياسىندا شاعىن قالادا جاندانىپ كەلەدى. ناقتىراق ايتساق، قالاداعى كوپقاباتتى تۇرعىن ۇيلەر قايتا جاڭعىرتىلىپ، پايدالانۋعا بەرىلىپ جاتىر.
«تۇرعىن ءۇي ماسەلەسىن شەشۋ جولىندا تۇرعىنداردى، اسىرەسە جاعدايى تومەن وتباسىلارى مەن مۇمكىندىگى شەكتەۋلى ازاماتتاردى تۇرعىن ۇيمەن قامتۋ ءۇشىن بارلىق مۇمكىندىكتەر قاراستىرىلۋدا. جىل سايىن بوس تۇرعان كوپقاباتتى ۇيلەردى قالپىنا كەلتىرىپ، ەل يگىلىگىنە بەرۋ جۇمىستارى جالعاساتىن بولادى. جىل سوڭىنا دەيىن 1-شاعىن اۋدانداعى 120 پاتەرلى تاعى ءبىر كوپقاباتتى ءۇيدى پايدالانۋعا بەرۋدى جوسپارلاپ وتىرمىز. جاڭا قۇرىلىستار قالا كەلبەتىن جاقسارتىپ، اجارىنا اجار قوسۋمەن قاتار، كوپتەگەن وتباسىنىڭ باسپانالى بولۋىنا ۇلكەن مۇمكىندىكتەر تۋعىزۋدا. مىنە، سونىڭ دالەلى رەتىندە ۇزاق جىلدار كەزەكتە تۇرعان ازاماتتار بۇگىن جاڭا قونىسقا يە بولىپ وتىر»، – دەدى اۋدان اكىمى قاناتبەك مادىبەك.
بۇگىنگى تاڭدا جاڭاتاس قالاسىندا كوممۋنالدىق مەنشىكتەگى تۇرعىن ۇيلەردەن پاتەر الۋ كەزەگىندە 1958 ازامات تىزىمدە تۇر. جىلدان-جىلعا قالا تۇرعىندارىنىڭ سانى كوبەيىپ كەلەدى دەسەك، وسىعان سايكەس، تۇرعىن ءۇي كەزەگىندەگى تۇرعاندار سانى دا ارتا تۇسۋدە.
ايتا كەتەيىك، قازىرگى وبلىس اكىمىنىڭ باستاماسىمەن وڭىردە تۇرعىن ءۇي كەزەگىندە تۇرعان كوپبالالى وتباسىلارىنىڭ كەزەگى كەلگەنشە باسپانامەن قامتۋ ماقساتىندا 612 پاتەرلى 11 جاتاقحانانىڭ قۇرىلىسى جۇرگىزىلۋدە. ونىڭ سەگىزى تاراز قالاسىندا، ۇشەۋى اۋداندارعا تيەسىلى. جىل سوڭىنا دەيىن 478 پاتەرلى 9 جاتاقحانانى پايدالانۋعا بەرۋ جوسپارلانعان. قالعان 3 جاتاقحانا 2020 جىلى تاپسىرىلاماق. قازىرگى تاڭدا پايدالانۋعا بەرىلگەن تۇرعىن ءۇي كولەمىنىڭ جالپى اۋماعى 217,7 مىڭ شارشى مەتردى نەمەسە ناقتى كولەم يندەكسى 109,8 پايىزدى قۇراعان. ەسەپتى كەزەڭدە وبلىس بويىنشا 18 568 ادام تۇرعىن ءۇي كەزەگىندە تۇر دەسەك، ونىڭ ىشىندە 1784-ءى كوپبالالى وتباسى.
«ادىرنا»
ۇلتتىق پورتالى
