پوليتسەيلەردىڭ ەڭبەكاقىسى ديففەرەنتسيالدى تۇردە، ياعني ەڭبەك ءوتىلى مەن تاجىريبەسىنە قاراي 20--65 پروتسەنتكە جوعارىلادى.
ىشكى ىستەر مينيسترلىگى استانادا جۇمىس ىستەيتىن پاترۋلدىك پوليتسيا قىزمەتكەرلەرىنىڭ جالاقىسىن جاريالادى. ولار ەڭبەكاقىدان بولەك تۇرعىن ءۇي وتەماقىسىن دا الادى، دەپ حابارلادى Sputnik قازاقستان ءتىلشىسى.
ىشكى ىستەر ۆيتسە-ءمينيسترى الەكسەي كالايچيديدىڭ ايتۋىنشا، شىلدە ايىندا ىشكى ىستەر ورگاندارى قىزمەتكەرلەرىنىڭ جالاقىسى كوتەرىلگەن. پوليتسەيلەردىڭ ەڭبەكاقىسى ديففەرەنتسيالدى تۇردە، ياعني ەڭبەك ءوتىلى مەن تاجىريبەسىنە قاراي 20-65 پروتسەنتكە جوعارىلادى.
"پاترۋلدىك پوليتسيا قىزمەتكەرلەرى ەڭ كوپ ۇستەماقى الدى، ولاردىڭ جالاقىسى 65 پروتسەنتكە ارتتى. سىزدەر ولاردى كۇندە كوشەدە كورىپ جۇرەسىزدەر. ماسەلەن، بۇعان دەيىن پاترۋلدىك پوليتسەي 117 000 تەڭگە السا، ەندى 150 000 الاتىن بولادى. وعان قوسا، ءبىز پاترۋلدىك پوليتسەيلەردى جالدامالى باسپانا ءۇشىن وتەماقى الاتىن قىزمەتكەرلەردىڭ قاتارىنا قوستىق", - دەدى كالايچيدي استانادا وتكەن ءباسپاسوز ءماسليحاتىندا.
ونىڭ سوزىنە قاراعاندا، وتەماقى وتباسىنىڭ قۇرامىنا قاراي تولەنەدى. ماسەلەن، نۇر-سۇلتاندا ءتورت ادامنان (اتا-انا جانە ەكى بالا) تۇراتىن وتباسىعا 200 مىڭ تەڭگە تۇرعىن ءۇي وتەماقىسى رەتىندە بەرىلەدى.
"سوندا وتباسىنىڭ ءاربىر مۇشەسىنە 50 000 تەڭگەدەن شىعىپ تۇر. وعان 150 000 تەڭگەنىڭ جالاقىسىن قوسىڭىز. بىزدىڭشە، وسىنداي قولداۋ شارالارى ارقاسىندا پوليتسيانىڭ قاتارىنا جاستاردى كوپتەپ تارتۋعا بولادى", - دەپ اتاپ كورسەتتى كالايچيدي.
بۇدان بولەك، شۇعىل تەرگەۋ قۇرىلىمدارىنىڭ جالاقىسى 55 پروتسەنتكە ارتقان. ۋچاسكەلىك ينسپەكتورلار 25 پروتسەنتكە ارتىق اقشا السا، قالعان قۇرىلىم قىزمەتكەرلەرىنىڭ ەڭبەكاقىسى 20 پروتسەنتكە ءوسىپ وتىر.
"جاڭا جىلدان باستاپ ءبىز وسى تىزىمگە توتەنشە جاعدايلار كوميتەتىنىڭ قىزمەتكەرلەرىن قوسۋدى جوسپارلاپ وتىرمىز. وندا دا جۇمىسى اۋىر مامانداردىڭ ۇستەماقىسى جوعارى بولادى. شەكتى مەجە – 65 پروتسەنت. ماسەلەن، ءورت سوندىرۋشىلەردىڭ جالاقىسىن 65 پروتسەنتكە ارتتىرعان دۇرىس دەپ سانايمىز. ولار، شامامەن، 140 000 تەڭگەدەن ارتىق الاتىن شىعار. تۇرعىن ءۇي وتەماقىسى تاعى بار", - دەيدى كالايچيدي.
