ەكى كۇنگە جالعاسقان ونەر دوداسىندا «حالىقتىق مۋزىكا» نوميناتسياسىنىڭ دومبىرامەن ءان ايتۋ كاتەگورياسىندا باس جۇلدەنى جاقسىگەلدى ماياساروۆ يەلەندى. ال ۇزدىك دومبىراشى اتاعى مەن مەدالدى استانالىق بەگدجانوۆ ساكەن قانجىعاسىنا بايلادى.
ەلىمىزدىڭ ءار وڭىرىنەن جاس جۇرەكتىڭ ۇكىلى ءۇمىتىن ۇلبىرەتىپ باق سىناۋعا كەلگەن ونەرپازدارعا ءادىل باعاسىن بەرگەن قازىلار القاسى قاتارىندا ءداستۇرلى ءانشى، مەملەكەتتىك سىيلىقتىڭ يەگەرى قايرات بايبوسىنوۆ، رامازان ستامعازيەۆ، ايگۇل قوسانوۆا سىندى ءدۇلدۇل انشىلەر بولدى.
–جىل وتكەن سايىن XVIII حالىقارالىق «شابىت» شىعارماشىلىق جاستار فەستيۆالىنە ونىڭ ىشىندە «حالىقتىق مۋزىكا» نوميناتسياسىنىڭ دومبىرامەن ءان سالۋ كاتەگورياسىنا ءوتىنىش بىلدىرۋشىلەردىڭ سانى ارتقانى ءبىزدى قۋانتىپ وتىر، دەيدى – قايرات بايبوسىنوۆ اعامىز. – جىلدان-جىلعا شىعارماشىل جاستاردىڭ دەڭگەيى ءوسىپ، اسىرەسە ءداستۇرلى ونەرگە دەگەن قىزىعۋشىلىعى ارتىپ وتىر. وتكەن جىلدارى وسى بايقاۋعا كەلەتىن جاستاردىڭ اراسىندا نەگە وڭتۇستىك وڭىرلەرى، پەتروپاۆل، پاۆلودار سىندى ايماقتاردىڭ ونەرلى جاستارى جوق دەپ تاڭ قالاتىنبىز. بيىل مىنە وسى اتالعان وڭىرلەردىڭ ونەرپازدارى ونەرلەرىن ورتاعا سالدى. جالپى بيىلعى فەستيۆال بارىسىندا ۇلتتىق ونەر، ءداستۇرلى ونەرگە دەگەن قۇرمەت ارتا تۇسكەنىن بايقاپ وتىرمىز. «شابىت» جاستار فەستيۆالى ءداستۇرلى ءان ونەرىن سەرىك ەتكەن ونەرپازداردىڭ قاناتىن قاتايتىپ، ءالى دە جەتىلە تۇسۋىنە ىقپال ەتەدى.
مۋزىكا زەرتتەۋشىلەرىنىڭ ايتۋىنا قاراعاندا، حالقىمىزدا 5 مىڭنان اسا كۇي, 12 مىڭعا جۋىق ءان بار كورىنەدى. بۇل كورسەتكىش قازاقتىڭ ۇلتتىق ونەرىنىڭ تامىرى تەرەڭدە ەكەنىن ايشىقتاي تۇسەتىندەي.
«دومبىرامەن ءان سالۋ» نوميناتسياسىندا ۇمىتكەرلەر حالىق ءانى مەن حالىق كونمپوزيتورلارىنىڭ سونداي-اق قازاقستان كومپوزيتورلارىنىڭ اندەرىن ورىندادى. بايقاۋدىڭ تالابىنا ساي بيىل قاتىسۋشىلار ءبىرجان سالدىڭ «ايتپاي»، اقان سەرىنىڭ «قۇلاگەر»، اسەت نايمانباەۆتىڭ «قىسمەت»، حالىق اندەرى «قاناتتالدى»، «قارعاش»، «تىلەۋقاباق»، مۇحيت مەراۇلىنىڭ «اينامكوز»، «پاڭكويلەك»، «ۇلكەن ايداي»، اجاردىڭ ءانى «ءامىرحان»، جامبىل جاباەۆ «العاداي»، كەنەن ازىرباەۆ «تىك شىرقاۋ»، قالقا جاپسارباەۆ «سارىجازىق»، قاپەز بايعابىلۇلى «ءۇش مەركى»، دانەش راقىشەۆ «ساياسىندا المانىڭ» اندەرىن ورىندادى.
گران-پري – قۇرمەت ديپلومى مەن مەدالدى جاقسىگەلدى ماياساروۆ جەڭىپ الدى. ول سونىمەن قاتار 250 000 تەڭگە كولەمىندە سىياقى الدى.
باقىتگۇل ابايقىزى
سۋرەتتەردى تۇسىرگەن نۇربەك المانبەتوۆ
El.kz
