بۇگىن تالدىقورعاندا مارقۇم شەرزات پولاتتىڭ ءىسى بويىنشا سوت پروتسەسى جالعاستى. 5 مامىردا وتكەن سوت وتىرىسىندا سوتتالۋشىلاردىڭ جاقىندارى جەلىدە تاراعان ۆيدەوعا نارازىلىق ءبىلدىردى. ولار ۇلدارىن ۆيدەوعا تۇسىرگەن ازاماتتى سوت زالىنان شىعارۋدى سۇرادى, دەپ حابارلايدى «ادىرنا» ءتىلشىسى.
ايىپتالۋشىلاردىڭ ءبىرى — نۇرقياس ءىلياسوۆتىڭ اكەسى كامەراعا تۇسىرۋگە تىيىم سالىنعان ايىپتالۋشىلاردىڭ ۆيدەوسى تاراپ كەتكەنىن ايتتى.
«ءبىز بالالارىمىزدى تۇسىرمەڭدەر دەپ ءوتىنىش جاساعان ەدىك. بىراق ولاردى ءتۇسىرىپ جەلىگە سالىپ جىبەرگەن. ولاردىڭ قاتارىندا كامەلەتكە تولماعان كۋاگەر دە بار»،—دەدى ول.
جابىرلەنۋشى تاراپتىڭ ادۆوكاتى مەيىرمان شەكەەۆ بۇعان قاتىستى جاۋاپ بەردى.
«ول — مەنىڭ موبيلوگرافىم. قازىرگى ايتىپ تۇرعان مالىمدەمە نەگىزسىز. سەبەبى ءبىزدىڭ پاراقشامىزدى قاۋىپسىزدىك قىزمەتكەرلەرى تەكسەرىپ وتىر. ول بەينەجازبا ءبىزدىڭ تاراپىمىزدان شىققان جوق»،— دەدى ادۆوكات.
سوت توراعاسى ەرجان جانۇزاقوۆ ۆيدەوعا قاتىستى تەكسەرۋ ءجۇرىپ جاتقانىن مالىمدەدى. سونىمەن قاتار سوت وتىرىسى كەزىندە فوتو-ۆيدەو تۇسىرۋگە قاتاڭ تىيىم سالىناتىنىن قايتا ەسكەرتتى.
