ۇلىتاۋ وبلىسىندا شاحتادا 7 جۇمىسشى ءۇيىندى استىندا قالىپ قويدى. بۇل تۋرالى «قازاقمىس» كومپانيالار توبى ايتتى، دەپ حابارلايدى «ادىرنا» ءتىلشىسى.
وقىس وقيعا بۇگىن، 17 اقپاندا جاڭاارقا اۋدانىندا ورنالاسقان «جومارت» كەنىشىندە بولعان.
«قازاقمىس كورپوراتسياسىنىڭ» «جومارت» كەنىشىندە تاۋ جىنىسى وپىرىلىپ ءتۇستى. وقيعا سالدارىنان 7 جۇمىسشى ءۇيىندىنىڭ ارعى جاعىندا قالدى. كابەلدەردىڭ ۇزىلۋىنە بايلانىستى قازىرگى ۋاقىتتا جۇمىسشىلارمەن بايلانىس جوق»،—دەلىنگەن حابارلامادا.
قازىر وقيعا ورنىندا ىزدەستىرۋ-قۇتقارۋ جۇمىستارى جۇرگىزىلىپ جاتىر. وعان تجد-نىڭ 21 قىزمەتكەرى مەن 7 تەحنيكاسى جۇمىلدىرىلعان. سونداي-اق قۇتقارۋ جۇمىستارىنا «سەرىكتەس» اقق-نىڭ 2 بولىمشەسى قوسىلدى.
