فيليپپين ۆيتسە-پرەزيدەنتى سارا دۋتەرتە ەل پرەزيدەنتى فەرديناند ماركوسقا قاستاندىق جاساۋعا كيللەر جالداعانىن مالىمدەدى، دەپ حابارلايدى «ادىرنا» ۇلتتىق پورتالى CBS News-كە سىلتەمە جاساپ.
سارا دۋتەرتە پرەزيدەنتتى، ونىڭ جۇبايىن جانە وكىلدەر پالاتاسىنىڭ سپيكەرىن ءولتىرۋ ءۇشىن كيللەر جالداعانىن ايتىپ، "بۇل ءازىل ەمەس" دەپ قوستى.
پرەزيدەنتتىڭ قاۋىپسىزدىك قىزمەتى ماركوس پەن ونىڭ وتباسىنىڭ قاۋىپسىزدىگىن كۇشەيتتى. ۆيتسە-پرەزيدەنتتىڭ بۇل مالىمدەمەسى ۇلتتىق قاۋىپسىزدىككە قاۋىپ رەتىندە باعالاندى.
دۋتەرتە مەن ماركوس 2022 جىلعى پرەزيدەنت سايلاۋىندا ءبىر كوماندادا جەڭىسكە جەتكەنىمەن، كەيىن ساياسي كەلىسپەۋشىلىكتەرگە بايلانىستى ارالارى سۋىپ كەتكەن. سارا دۋتەرتە ماركوس پەن ونىڭ جاقتاستارىن سىبايلاس جەمقورلىققا، ساياسي قۋدالاۋعا جانە ءوز جاقتاستارىنا قىسىم كورسەتۋگە ايىپتادى.
قاقتىعىس وكىلدەر پالاتاسىنىڭ دۋتەرتەنىڭ اكىمشىلىگىن تەكسەرۋ ماقساتىندا ونىڭ باسشىسى زۋلەيكا لوپەستى قاماۋعا الۋىنان كەيىن ۋشىعا ءتۇستى. لوپەسكە قارسى تەرگەۋ بيۋدجەتتىڭ دۇرىس پايدالانىلماۋى تۋرالى كۇدىكپەن باستالعان ەدى.
سارا دۋتەرتە ماركوستى "بىلىكسىز" دەپ اتاپ، ونىڭ ايەلى مەن سپيكەردى "ادەپسىز سوزدەر قولداندى" دەپ ايىپتادى.
