قاراشادا رەسەي سىرتقى ىستەر ءمينيسترى سەرگەي لاۆروۆ ەلدىڭ قازاقستانمەن ورتاق تاريحشىلار توبىن قۇراتىنىن ايتقان ەدى. مەملەكەتتىك كەڭەسشى ەرلان قارين ۇلتتىق ارناعا بەرگەن سۇحباتىندا بۇل مالىمدەمەگە قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
ول بىرلەسكەن تاريحشىلار توبىن قۇرۋ تۋرالى كەلىسىم بۇرىننان بار ەكەنىن جەتكىزدى.
«بۇل ەشقانداي دا جاڭالىق ەمەس. بۇرىن دا ونداي جۇمىستار اتقارىلدى، الايدا پاندەميا كەزىندە ۋاقىتشا توقتاتىلعان بولاتىن. بۇنداي كەلىسىم رەسەيمەن عانا ەمەس، باسقا ەلدەرمەن دە بار. بىلايشا ايتقاندا، باياعىدان قولدانىلىپ كەلە جاتقان پراكتيكا عوي. بىزدە تاريحشىلاردىڭ ءتۇرلى اسسوتسياتسياسى بار. نەگىزگى ماقسات — ءبىر-بىرىمەن پىكىر جانە قۇجات الماسۋىنا جاعداي جاساۋ. ەۋروپا ەلدەرىنىڭ تاريحشىلارىمەن دە جەكەلەگەن جۇمىس توپتارى بار. بۇل ەلىمىزدىڭ تاريحىن وزگە ەلدىڭ عالىمدارى جازادى دەگەن ءسوز ەمەس. كەيبىرەۋلەر ادەيى اراڭداتۋ ماقساتىندا وسىنداي پىكىر قالدىرادى. ءبىز ءوز تاريحىمىزبەن ءوزىمىز اينالىسىپ جاتىرمىز، ونى اشىق ايتۋ كەرەك. پرەزيدەنت تاپسىرماسى بويىنشا قازاقستان تاريحىنىڭ 7 تومدىعى دايىندالا باستادى. وعان 250 وتاندىق تاريحشى جۇمىلدىرىلدى. بيىل ول جۇمىستىڭ نەگىزگى بولىگى اياقتالدى»،—دەدى قارين.
ەسكە سالايىق، استاناداعى مەملەكەتتىك باسقارۋ اكادەمياسىنىڭ ديپلوماتيا ينستيتۋتىندا سەرگەي لاۆروۆ رەسەيدىڭ بىرلەسكەن تاريحشىلار توبىن قۇرۋدى كوزدەپ وتىرعانىن جەتكىزگەن بولاتىن.
«رەسەي مەن قازاقستاندا ءبىزدىڭ ورتاق تاريحي وتكەنىمەن جانە قازىرگى تاريحىمەن بايلانىستى تاقىرىپتار پەريودتى تۇردە تۋىنداپ وتىرادى. وسى رەتتە، بىرلەسكەن تاريحشىلار توبىن قۇرۋ تۋرالى وڭ كەلىسىمگە قول جەتكىزىلگەنىن اتاپ وتكىم كەلەدى»، - دەدى ول.
مينيستر مۇنداي قادامنىڭ ەكى ەلگە دە پايدالى ەكەنىن جانە قوعامنىڭ كەي بولىگىندە پايدا بولاتىن پىكىرتالاستاردى باسەڭدەتۋگە كومەكتەسەتىنىن مالىمدەدى.
