2024 جىلدىڭ توعىز ايىندا قىتايدان قازاقستانعا تۇراقتى تۇرۋعا 1451 ادام، ال موڭعوليادان 1088 ادام قونىس اۋدارعان، دەپ حابارلايدى «ادىرنا» ۇلتتىق پورتالى.
بۇل كورسەتكىش 2023 جىلدىڭ سايكەس كەزەڭىمەن سالىستىرعاندا قىتاي بويىنشا 177%-عا، ال موڭعوليا بويىنشا 172%-عا وسكەن.
سونداي-اق، قىتايدان كەلگەن ميگرانتتاردىڭ سانى 2017 جىلدان بەرگى ەڭ جوعارى كورسەتكىش بولسا، موڭعوليادان كەلگەندەر سانى 2011 جىلدان بەرگى ەڭ ۇلكەن كورسەتكىش بولىپ وتىر.
قونىس اۋدارعانداردىڭ باسىم كوپشىلىگى – ەتنيكالىق قازاقتار. قىتايدان كەلگەندەردىڭ 98%-ى، ال موڭعوليادان كەلگەندەردىڭ 99%-ى قازاق ۇلتىنىڭ وكىلدەرى.
قىتايدان كەلگەندەردىڭ شامامەن ءار بەسىنشىسى الماتى وبلىسىندا تۇرۋدى تاڭداسا، جارتىسى استانا مەن الماتى قالالارىنا قونىستانعان. موڭعوليادان كەلگەندەر اراسىندا ەڭ تانىمال ءوڭىر – اقمولا وبلىسى (33%). سونىمەن قاتار، ولاردىڭ ۇشتەن بىرىنە جۋىعى ەلوردا مەن الماتىنى تاڭداعان.
