قاراعاندى وبلىسىندا ەكونوميكانىڭ بارلىق سالالارىندا ءوسىم بار. ونەركاسىپتىك كاسىپورىندار 9 ايدا 3 ترلن تەڭگەگە جۋىق ءونىم ءوندىردى. وتكەن جىلدىڭ سايكەس كەزەڭىنە ينۆەستيتسيا 14,6%-عا ارتىپ، 680 ملرد تەڭگەگە جەتتى. جىل سوڭىنا دەيىن ءۇش مىڭعا جۋىق جۇمىس ورنى اشىلىپ، ون جوبانى ىسكە قوسۋ جوسپارلانىپ وتىر. ايماقتىڭ فەرمەرلەرى العاش رەت رەكوردتىق استىق جينادى – ءونىم ميلليون توننادان استى.
وبلىستىڭ دامۋى تۋرالى Saryarqa تەلەارناسىندا تىكەلەي ەفيردە ايماق باسشىسى ەرماعانبەت بولەكپاەۆ ايتىپ بەردى. ول بيزنەستىڭ ىسكەرلىك بەلسەندىلىگىن ارتتىرۋ ءۇشىن قانداي جۇمىستار جاسالىپ جاتىر دەگەن سۇراققا جاۋاپ بەردى.
"ىسكەرلىك احۋال" تاۋەلسىز رەيتينگىن باعالاۋ بويىنشا قاراعاندى وبلىسى ەلىمىزدە جەتىنشى ورىندا تۇر.
شاعىن جانە ورتا بيزنەستى قولداۋ جانە قولايلى بيزنەس-كليمات قۇرۋ – باسىم مىندەت، دەپ اتاپ ءوتتى وبلىس اكىمى.
– رەسپۋبليكا دەڭگەيىندە كوپتەگەن باعدارلامالار ازىرلەندى. قارجىلىق قولداۋدى كەڭەيتۋ ءۇشىن دامۋ قورىمەن بىرلەسىپ "كاسىپكەر" وڭىرلىك باعدارلاماسى ازىرلەنىپ، ىسكە اسىرىلۋدا. جاقىن ارادا ءبىز نەسيەلەر بويىنشا پايىزدىق مولشەرلەمەنى سۋبسيديالاۋ تۇرىندەگى قولداۋدى بىرنەشە ەسە ارتتىرۋدى كوزدەپ وتىرمىز. وڭدەۋ ونەركاسىبى، تۋريزم جوبالارىنا ەرەكشە نازار اۋدارىلادى، – دەدى ەرماعانبەت بولەكپاەۆ.
سونىمەن قاتار، بارلىق قاجەتتى ينفراقۇرىلىمى بار شاعىن ونەركاسىپتىك ايماقتاردى قۇرۋ باستالدى. وندا بيزنەس ءوز ءوندىرىسىن ەڭ تومەنگى جالداۋ شارتىمەن ورنالاستىرا الادى. مۇنداي العاشقى يندۋستريالىق الاڭدار قاراعاندى مەن ساراندا ىسكە قوسىلدى. بۇل تاجىريبەنى باسقا قالالار مەن اۋداندارعا تاراتۋ مىندەتى تۇر، دەپ اتاپ ءوتتى وبلىس اكىمى.
ءوڭىر باسشىسى ەلىمىزدە ءبىرىنشى بولىپ قاراعاندى وبلىسى بولشەك ساۋدا سالىعىن 4-تەن 2%-عا دەيىن تومەندەتكەنىن ەسكە سالدى. ناتيجەسىندە ارنايى سالىق رەجيمىن قولداناتىن سالىق تولەۋشىلەر سانى 16 ەسە ءوستى. تارتىمدىلىقتى كورىپ، وبلىسقا باسقا ايماقتاردان سالىق تولەۋشىلەر كەلدى. بۇل قازىنانى ەداۋىر تولىقتىرۋعا مۇمكىندىك بەردى.
