شىعىس قازاقستان وبلىسىنداعى "حاليفا التاي" مەشىتىندە «يسلام مادەنيەتى ۇلتتىق ءداستۇر» اتتى مۋزەي اشىلدى

2182
Adyrna.kz Telegram

مۇندا سوناۋ ساق، عۇن، تۇركى داۋىرىلەرىنەن، يسلام تاريحى مەن قازاق حالقىنىڭ مادەنيەتىنەن سىر شەرتەتىن بىرەگەي قۇندى جادىگەرلەر قويىلعان. بۇل جوبا شىعىس قازاقستان وبلىسى اكىمى دانيال احمەتوۆتىڭ قولداۋىمەن از ۋاقىتتىڭ ىشىندە اشىلدى.
مۇراجايدا كۇلتەگىن ەسكەرتكىشىنىڭ كوشىرمەسى، تۇركىستانداعى ايگىلى تايقازاننىڭ كوشىرمەسى، قازاقتىڭ التى قانات كيىز ءۇيى قويىلىپ، ارىستانباب، قوجا احمەت ياسساۋي كەسەنەلەرىنىڭ شاعىن ماكەتتەرى ورناتىلدى. بۇدان بولەك مۇندا كەلۋشىلەر قاسيەتتى قۇران كىتابىنىڭ ەلەكتروندى زامانۋي كوشىرمەسىن، تاريحي قۇندى ەڭبەكتەردىڭ ەلەكتروندى نۇسقالارىن دا تاماشالاي الادى. سونداي-اق مۇندا ۇلتتىق كونە جادىگەرلەر مەن ەجەلگى ءدىني بۇيىمداردا قويىلعان. ءتىپتى مۇراجايدا تۇركى ءداۋىرىنىڭ تاريحىنان سىر شەرتەتىن «وعىزناما» سەكىلدى كەيبىر سيرەك كىتاپتاردىڭ تۇپنۇسقالىق كوشىرمەسى دە ۇلىبريتانيانىڭ كەمبريدج ۋنيۆەرسيتەتىنەن جانە تۇركياداعى سۇلەيمانيە مەشىتىنىڭ كىتاپحانالارىنان الىنىپ قويىلدى.


– بۇل يگى ءىس "رۋحاني جاڭعىرۋ" باعدارلاماسىنىڭ اياسىندا جۇزەگە اسىرىلدى. مەشىت تەك ءدىني قۇلشىلىق ەتەتىن ورنى عانا ەمەس، سونداي-اق سالت-ءداستۇردى، تاريحىمىزدى ناسيحاتتايتىن رۋحاني ورتالىققا اينالۋى ءتيىس. قازىرگى زامان تالابى دا وسى. ەرتە ساق، عۇن، تۇركى داۋىرلەرىنەن باستاپ، تاۋەلسىز قازاقستاننىڭ قۇرىلۋىنا دەيىنگى تاريحتى تىزبەكتەيتىن وسىناۋ بىرەگەي مۇراجايدا قۇندى جادىگەرلەر مەن ولاردىڭ تۇپنۇسقاسىنان الىنعان كوشىرمەلەرى ەرەكشە كوز تارتادى. الداعى ۋاقىتتا مۇندا شىعىس قازاقستاننىڭ بىرەگەي بايلىعى سانالاتىن ەلەكە سازىنان تابىلعان التىن ادامعا، قوڭىر اۋليەگە، ىرعىزباي اۋليەگە، ەلباسىمىز نۇرسۇلتان ءابىشۇلى نازارباەۆقا جانە مۇزتاۋعا ارنالعان جەكە ستەندتەر اشىلسا مۇراجاي تىپتەن ارلەنە تۇسەر ەدى. بۇدان بولەك كىرەبەرىس زالدىڭ ءبىر قابىرعاسىنا تۇگەلدەي دەرلىك قازاقستاننىڭ دامۋ تاريحىن سۋرەتتەيتىن پانورامالىق سۋرەت سالۋ كەرەك، – دەدى دانيال كەنجەتايۇلى.


الداعى ۋاقىتتا اتالمىش مۋزەيدىڭ تىنىس-تىرشىلىگىنەن حابار بەرەتىن سايت ىسكە قوسىلىپ، وندا مۋزەيگە 3D تۋر جاساۋ مۇمكىندىگى اشىلادى.

 

 

"ادىرنا" ۇلتتىق پورتالى

پىكىرلەر