پاۆلودار ورتالىعىندا كولىك جۇرگىزۋشىلەرى توبەلەس شىعاردى. وقيعا تاسپاعا ءتۇسىپ، جەلىدە تارادى- دەپ حابارلايدى “ادىرنا” ۇلتتىق پورتالى.
كادرلاردان بايقاعانداي توبەلەس نازارباەۆ داڭعىلىندا ورىن العان. ەۆاكۋاتور مەن جەڭىل كولىك جۇرگىزۋشىسى باعدارشام الدىندا جانجال شىعاردى. توبەلەس كەزىندە ءبىر جۇرگىزۋشى ءسۇرىنىپ، ەكىنشىسى تەپكىنىڭ استىندا قالدى. وسى كەزدە ءۇشىنشى ادام ولاردى اجىراتۋعا تىرىسقانىن بايقاۋعا بولادى.
الەۋمەتتىك جەلى قولدانۋشىلارى جۇرگىزۋشىلەر سوقتىعىسىپ قالعان سوڭ سوزگە كەلىپ قالدى دەپ بولجاۋدا. ال، پوليتسەيلەر توبەلەسكە قاتىسۋشىلاردىڭ تۇلعاسى انىقتالعانىن حابارلادى.
«ۇساق بۇزاقىلىق فاكتىسى بويىنشا جانجالعا قاتىسۋشىلارعا اكىمشىلىك ءىس قوزعالدى»، - دەپ ءتۇسىندىردى پاۆلودار وبلىستىق پوليتسيا دەپارتامەنتىنىڭ ءباسپاسوز قىزمەتى.
