بيىل بالالاردىڭ تەرەزەدەن قۇلاۋى بۇرىنعىدان جيىلەپ كەتتى. تەرەزەگە تەمىر تور ورناتۋدى پاتەردەن پاتەرگە اۋىسىپ جۇرگەن ادامداردىڭ قالتاسى كوتەرە بەرمەيدى. ال موسكيتتى تور قاۋىپسىزدىكتى قامتاماسىز ەتە المايدى. تەرەزە ورناتۋمەن اينالىساتىن شەبەر تەمىر توردىڭ باعاسى شامامەن قانشا تۇراتىنىن ايتتى. البەتتە، ەلدىڭ ءار ايماعىندا باعا ءارتۇرلى بولۋى مۇمكىن.
جىل سايىن اشىق قالعان تەرەزەدەن قۇلايتىن بالالاردىڭ سانى ارتىپ كەلەدى. 2020 جىلى وسىنداي وقيعا بويىنشا 105 بالا تىركەلگەن بولسا، بىلتىر 170 ءسابي تەرەزەدەن قۇلاعان. ال، بيىل جىل باسىنان بەرى ەرەسەكتەردىڭ قاراۋىنسىز قالعان 120-دان استام بالا جازاتايىم وقيعاعا دۋشار بولدى. ولاردىڭ ىشىندە وقيعا ورنىندا بىردەن قايتىس بولعاندار دا، اۋىر جاراقات الىپ زارداپ شەككەندەر دە بار.
توتەنشە جاعدايلار مينيسترلىگى كوپ قاباتتى ۇيلەردىڭ تۇرعىندارىنا تۇسىندىرمە جۇمىستارىن جۇرگىزىپ، تەرەزەنى اشىق قالدىرماۋدى ەسكەرتىپ الەك. بىراق بۇدان ناتيجە بار ما؟ قايتسەك بالانى قۇلاۋدان امان ساقتاي الامىز؟
تەرەزەگە تەمىر تور ورناتۋدى مىندەتتەۋ قاجەت پە؟
ءوزىنىڭ جەكەمەنشىك پاتەرىندە تۇراتىن اتا-انا ءۇشىن تەرەزەگە تور، ارنايى بلوكيراتور قويىپ، قاۋىپسىزدىك قۇرالدارىن ورناتۋ ءتيىمدى. ال، وزگەنىڭ ءۇيىن جالداپ تۇراتىن اتا-انالاردىڭ قالتاسى باسقا ۇيگە كوشكەن سايىن بالانىڭ قاۋىپسىزدىگىن ساتىپ الۋعا اقشاسى جەتە مە؟
مىسالى، شىمكەنت قالاسىنىڭ تۇرعىنى، ەكى بالانىڭ اناسى التىناي حانىم ءار ۇيگە كوشكەندە قاۋىپسىزدىك قۇرالدارىن الۋ قارجىلاي قيىندىقتار تۋدىرادى دەيدى. ول – پاتەردەن پاتەرگە كوشۋدىڭ قيىندىعىن وتكەرگەن ادامداردىڭ ءبىرى.
- پاتەرىمىز ءتورتىنشى قاباتتا ورنالاسقان. ءبىز جالعا العان ۋاقىتتا تەرەزەدە بالانى قۇلاۋدان ساقتايتىن ەشقانداي جابدىق بولمادى. ونىڭ ۇستىنە بولمە تار بولعاندىقتان تەرەزە الدىنا ديۆان قويۋىمىزعا تۋرا كەلدى. ەكى بالام تەرەزەگە وڭاي شىعا الاتىن بولدى، سول ءۇشىن تەمىر تور ورناتتىق. كوپقاباتتى تۇرعىن ۇيلەردى قولدانىسقا بەرەردە بالانىڭ قاۋىپسىزدىگى ەسكەرىلسە، جاقسى بولار ەدى، - دەيدى التىناي حانىم.
ول قۇرىلىس جۇرگىزگەندەردى تەرەزەگە تەمىر تور ورناتۋعا مىندەتتەگەن ءجون دەپ سانايدى.
قاۋىپسىزدىك قۇلىپتارى جانە تەمىر تور
توتەنشە جاعداي سالاسىنىڭ ماماندارى اۋەلى بالانى ەرەسەكتەردىڭ قاراۋىنسىز قالدىرماۋ كەرەك دەيدى. سونداي-اق، باقىلاۋسىز قالعان بالا تەرەزەگە شىعا الماس ءۇشىن تەرەزە ماڭىنا جيھازداردى قويۋعا بولمايدى.
- اتا-انالار موسكيتتى تور بولعاندىقتان بالا قۇلامايدى دەپ ويلايدى. بۇل – قاتە پىكىر. جاندىكتەردەن قورعايتىن سەتكالاردىڭ ەشقايسىسى بالانى امان ساقتاپ قالا المايدى. ولار بالانى قورعاۋعا ارنالماعاندىقتان تورعا سۇيەنگەن بالا ونىمەن بىرگە قۇلاپ كەتەدى. تەك تەرەزە تۇتقاسىنا ورناتىلعان قاۋىپسىزدىك قۇلىپتارى مەن تەمىر تورلار كومەكتەسە الادى. تۇتقاعا قاۋىپسىزدىك قۇلپىن نەمەسە فيكساتور ورناتىپ، كىلتتەپ قويسا بالا اشا المايدى - دەيدى شىعىس قازاقستان وبلىسى توتەنشە جاعدايلار دەپارتامەنتىنىڭ ءباسپاسوز حاتشىسى مارينا ليسكوۆا.
قۇلاۋدان ساقتايتىن قۇرال ءورت سوندىرۋگە كەدەرگى مە؟
مامان ايتقان قاۋىپسىزدىك قۇرالدارىنىڭ سان ءتۇرى بار. ساپاسىنا قاراي باعاسى دا ءار الۋان. ماسەلەن، فيكساتوردىڭ ەڭ ارزانى 1000 تەڭگەدەن باستالادى. ال، تەرەزە تۇتقاسىنا ورناتىلاتىن قاۋىپسىزدىك قۇلىپتارىنىڭ باعاسى 2000-15 000 تەڭگە ارالىعىندا.
10 جىلدان بەرى تەرەزە سالاسىمەن اينالىسىپ جۇرگەن جەكە كاسىپكەر باقىتجان مولساكوۆ تەرەزە تۇتقاسىنا تروس ارقىلى ورناتىلعان قۇلىپتاردى بالالار وڭاي جۇلىپ الادى دەيدى.
- نەگىزى كوپقاباتتى تۇرعىن ۇيلەرگە مەتاللوپلاستيكتەن جاسالعان ياعني ورتاسىنا مەتالل سالىنعان تەرەزە ورناتۋ قاجەت. قۇرىلىس جۇرىگزگەندەر ونى ەسكەرمەگەندىكتەن، قازىرگى تۇرعىن ۇيلەردىڭ تەرەزەلەرىندە تەمىر بولمايدى. تەمىر بولماعاندىقتان تروستى بالالار وڭاي جۇلىپ الادى، - دەيدى باقىتجان مولساكوۆ.
بالا ءومىرىن ساقتاۋعا ارنالعان قاۋىپسىزدىك قۇرالىنىڭ تاعى ءبىر ءتۇرى – تەمىردەن جاسالعان تور. مۇنداي تەمىر توردىڭ باعاسى تەرەزە كولەمىنە بايلانىستى. 15 000 تەڭگەدەن باستالىپ 75 000 تەڭگەگە دەيىن جەتەدى.
- اليۋميني، پلاستيكتەن تور سالدىراتىن اتا-انالار بار. بىراق، ونى بالالار مايىستىرىپ تاستايدى. ال تەمىر تورلار دانەكەرمەن بەكىتىلمەيدى، ءورت بولعان جاعدايدا جەدەل الىپ تاستاۋعا بولادى. بالالاردىڭ كۇشى جەتپەيدى، ەرەسەك ادام الا الادى، - دەيدى باقىتجان مولساكوۆ.
2018 جىلدىڭ 26 ماۋسىمىنان باستاپ قۇرىلىس جۇرگىزەتىن كومپانيالار جاڭا عيماراتتاردى تەرەزەلەرىندە بلوكيراتور نەمەسە قاۋىپسىزدىك قۇلىپتارىمەن تاپسىرۋعا مىندەتتى. نورما قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ № 131-نق بۇيرىعىمەن بەكىتىلگەن. بىراق، بۇرىن پايدالانۋعا بەرىلگەن عيماراتتار نورماعا سايكەس كەلمەيدى.
مەرەي مىرزاعاليقىزى
«ادىرنا» ۇلتتىق پورتالى
