پەتروپاۆلدا 95 جاستاعى قاريا ايەلىمەن جانجالداسقاننان سوڭ ءوزىن گاز باللونىمەن جارىپ جىبەرمەك بولعان، دەپ حابارلايدى «ادىرنا» ءتىلشىسى tengrinews.kz-كە سىلتەمە جاساپ.
ەر ادام 22 مامىردا پوليتسياعا حابارلاسىپ، ءوزىن جارىپ جىبەرەمىن دەپ قورقىتقان.
«وسى قوڭىراۋ بويىنشا مۇندا پوليتسيا قىزمەتكەرلەرى كەلدى. ولار قارت ەر اداممەن سويلەسۋگە تىرىستى. بىراق ول ەسىكتى كىلتتەپ، اشپاي قويعان. وسى كەزدە گاز-اۋا قوسپاسى پايدا بولىپ، سوڭىنان ءۇي جارىلعان. كەيىن ءورت ءسوندىرۋ ءبولىمى شاقىرىلدى”، – دەدى پەتروپاۆل قالالىق توتەنشە جاعدايلار ءبولىمىنىڭ باسشىسى نازىمبەك ەلەمەسوۆ.
پوليتسەيلەر ءورت سوندىرۋشىلەر كەلگەندە ءۇي تولىعىمەن ورتەنىپ جاتقانىن، كورشى ءۇيدىڭ قاپتاماسى جانىپ ۇلگەرگەنىن اتاپ ءوتتى.
«زارداپ شەگۋشى قۇتقارىلىپ، اۋرۋحاناعا جەتكىزىلدى. ال ءورت سوندىرۋشىلەر ورتتەن تاعى بىرنەشە گاز باللوندارىن شىعاردى»،—دەدى قالالىق توتەنشە جاعدايلار ءبولىمىنىڭ باسشىسى.
قازىرگى تاڭدا زەينەتكەردىڭ جاعدايى اۋىر حالدە.
«1929 جىلعى ناۋقاس كوپ بەيىندى قالالىق اۋرۋحاناعا جاتقىزىلدى. دەنەسىنىڭ 35-40 پايىزىن تەرميالىق كۇيىك شالعان. ارقاسى مەن قولى كۇيگەن، بىراق ەسىن جيدى»،– دەپ ءتۇسىندىردى وبلىستىق دەنساۋلىق ساقتاۋ باسقارماسىنىڭ باسپاسوز حاتشىسى گۇلنار سايلاۋ.
بۇل وقيعا قىلمىستىق كودەكستىڭ 105-بابى («ءوزىن-ءوزى ولتىرۋگە دەيىن جەتكىزۋ») بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. قازىرگى تاڭدا تەرگەۋ شارالارى جۇرگىزىلىپ جاتىر.
