قر پرەزيدەنتى قاسىم-جومارت توقاەۆ قازاقستاندىقتاردىڭ ەڭبەك قۇقىقتارىن قورعاۋعا كوڭىل ءبولۋدى تاپسىردى، دەپ حابارلايدى قازاقپارات ءتىلشىسى.
«بيىل 4 ماۋسىمدا اتىراۋ قالاسىندا بىردەي ەڭبەك ەتەتىن جەرگىلىكتى جانە شەتەلدىك جۇمىسشىلاردىڭ جالاقىسىن ءادىل بەرۋدى تاپسىرعان بولاتىنمىن. ۇكىمەتكە بۇل ماسەلەنى سوڭىنا دەيىن انىقتاۋدى تاپسىرامىن. اسقار ۇزاقبايۇلى (مامين – رەد.), ەڭبەك جاعدايى، جۇمىسشىلاردىڭ جالاقىسى بويىنشا ەگجەي-تەگجەيلى ساراپتاما جاساۋىڭىزدى سۇرايمىن. ەگەر ينۆەستورلارمەن كەلىسىمشارتقا وزگەرىس ەنگىزۋ قاجەت بولسا، مۇنى كۇن تارتىبىنەن تۇسىرمەگەن ءجون. ارينە، بۇل وڭاي جۇمىس ەمەس، تۇسىنەمىن، بىراق بۇل ماسەلەنى شەشۋ قاجەت»، - دەدى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا. پرەزيدەنت ۇلتتىق مۇددەنى قورعاۋدىڭ بارلىق مەملەكەتتىك ورگان ءۇشىن ماڭىزدى ەكەنىن اتاپ ءوتتى. «قازاقستاندىق مامانداردىڭ، جۇمىسشىلاردىڭ ءتيىستى بىلىكتىلىك الۋىنا دا ەرەكشە كوڭىل ءبولۋ كەرەك»، - دەدى مەملەكەت باسشىسى.
"ادىرنا" ۇلتتىق پورتالى
