جوشى حان تۋرالى فيلم ءتۇسىرىلىپ، ەسكەرتكىش قويىلاتىنى تۋرالى اقپارات تارادى، دەپ حابارلايدى "ادىرنا" ءتىلشىسى ۇلىسمەدياعا سىلتەپ.
جوشى ۇلىسىنىڭ 800 جىلدىعىنا وراي جوشى تۋرالى تولىقمەتراجدى كوركەم فيلم جانە «التىن وردا» تاريحي سەريالىن ءتۇسىرۋ ماسەلەسىن پىسىقتالۋدا. بۇل تۋرالى ۇكىمەت باسشىسى دەپۋتاتتارعا بەرگەن جاۋابىندا كەلتىرگەن.
التىن وردا تاريحى مەن جوشى حان تۋرالى دەرەكتى جانە كوركەم فيلمدەر، سەريالدار ءتۇسىرۋ، مونۋمەنت تۇرعىزۋ ماسەلەلەرى اتالعان جوسپار شەڭبەرىندە جالعاسىپ جاتىر.
ودان بولەك، عىلىم جانە جوعارى ءبىلىم مينيسترلىگى شەتەلدىك، وتاندىق ارحيۆتەر مەن كىتاپحانالاردا جاڭادان انىقتالعان دەرەككوزدەردى پايدالانا وتىرىپ، «قازاقستاننىڭ ەجەلگى زاماننان بۇگىنگى كۇنگە دەيىنگى تاريحى» اتتى جەتى تومدىق اكادەميالىق باسىلىم ازىرلەپ جاتقانىن مالىمدەدى.
