پرەزيدەنت قاسىم-جومارت توقاەۆ بولاشاقتا سۋ تاسقىنىنىڭ الدىن الۋ شارالارىنا ايرىقشا ءمان بەرۋدى تاپسىردى. ول قورعانىس بوگەتتەرى مەن سۋ جۇرەتىن كانالدار سالۋ كەرەگىن ايتتى، دەپ حابارلايدى “ادىرنا” ۇلتتىق پورتالى اقورداعا سىلتەپ.
«كوكتەم مەزگىلىندە قار شىعارۋ، وزەندەردىڭ قاۋىپتى ۋچاسكەلەرىندەگى مۇزدى جارۋ، قارعىن سۋ جۇرەتىن ارنالار جاساۋ جانە باسقا دا قاجەتتى شارالار الدىن الا جۇرگىزىلۋگە ءتيىس. جاز-كۇز ماۋسىمىندا وزەندەردىڭ ارنالارىن ۋاقىتىلى تازالاۋدى، تابانىن تەرەڭدەتۋدى جانە ساعالارىن كەڭەيتۋدى، اۆتوموبيل مەن تەمىرجولداردىڭ بويىنداعى قولدانىستاعى سۋ وتكەلدەرىنىڭ قۋاتتىلىعىن ارتتىرىپ، جاڭاسىن سالۋ قاجەت. قورعانىس بوگەتتەرى مەن سۋ جۇرەتىن كانالدار سالۋ كەرەك. بۇل مىندەت رەسپۋبليكالىق شتابقا جانە ۇكىمەتكە جۇكتەلەدى»، – دەدى مەملەكەت باسشىسى.
ايتا كەتەيىك، بۇگىن قاسىم-جومارت توقاەۆ باتىس قازاقستان وبلىسىنا بارىپ, سۋ تاسقىنىنا بايلانىستى جەدەل شتابتىڭ وتىرىسىن وتكىزدى
«قازىر ءتيىستى مەكەمەلەردىڭ ءبارى بەلسەندى تۇردە جۇمىس ىستەپ جاتىر. بىرقاتار ايماقتى قارعىن سۋ باسىپ قالدى. كەيبىر جەردە تاسقىن سۋ كوتەرىلىپ جاتىر. بۇل – تابيعي اپات. قىسقاسى، الدىمىزدا تۇرعان جۇمىس وتە اۋقىمدى. ءبارىمىز ءبىر ەل، ءبىر ۇجىم بولىپ وسى اپاتتى ەڭسەرۋىمىز كەرەك. باسقا جول جوق. تاسقىن سۋدىڭ سالدارىن جويۋ ءۇشىن ناقتى شارالار قولعا الىندى. قاۋىپ-قاتەردىڭ الدىن الۋ جۇمىستارى اتقارىلۋدا. مەنىڭ تاپسىرمام بويىنشا وبلىستاردىڭ اكىمدەرى جۇمىسقا بەلسەندى كىرىستى»، – دەدى پرەزيدەنت.
