استانادا بيشىمباەۆ ءىسى بويىنشا باستى سوت وتىرىسى باستالدى. كىنالىلەر ورىندىعىندا قۋاندىق بيشىمباەۆپەن بىرگە ونىڭ تۋىسى باقىتجان بايجانوۆ دا وتىر دەپ حابارلايدى "ادىرنا" ۇلتتىق پورتالى.
پروكۋرور ايىپتاۋ قورىتىندىسىن جاريالاعاننان كەيىن بيشىمباەۆ ءوز كىناسىن مويىندامايتىنىن ايتتى:
"ايىپتاۋدىڭ ءمانى تۇسىنىكتى. مەن كىنامدى مويىندامايمىن. ايتايىن دەگەنىم، مەن سوتقا دەيىنگى تەرگەپ-تەكسەرۋ كەزىندە دە، ەش جەردە دە ءوز وقيعامدى ايتۋعا مۇمكىندىگىم بولعان جوق. پروكۋروردىڭ وقىعانى - جالعان. راستاۋ دەرەكتەرى نەمەسە ايعاق جوق. سوندىقتان 110-باپ بويىنشا (ازاپتاۋ – كىنالىگە ماتەريالدىق جاعىنان تاۋەلدى ادامعا قارسى جۇيەلى تۇردە ۇرىپ-سوعۋ نەمەسە وزگە دە زورلىق-زومبىلىق ارەكەتتەرى ارقىلى دەنە جانە پسيحيكالىق زارداپ كەلتىرۋ – رەد. ەسكەرتپەسى) مەنىڭ اتىمنان مۇنداي قىلمىس جاسالماعان»، - دەدى بيشىمباەۆ.
ول سونداي-اق، ازاپتاۋدان بولەك كىسى ولتىرۋدەگى كىناسىن مويىندامايتىنىن اتاپ ءوتتى.
«جاڭا ايتقانىما سايكەس، مەن ەشكىمدى قاتىگەزدىكپەن قاساقانا ولتىرگەن جوقپىن»، - دەپ قورىتىندىلادى ءسوزىن سوتتالۋشى.
