باۋىرجان بايبەك الماتىلىقتارمەن "قوشتاسقان" جازباسىن جاريالادى

الماتى قالاسىنىڭ بۇرىنعى اكىمى باۋىرجان بايبەك الماتى تۇرعىندارىنا جۇرەكجاردى لەبىزىن ءبىلدىرىپ، ەلباسىنا العىسىن جەتكىزدى.

بۇل تۋرالى باۋىرجان بايبەك ينستاگرامداعى پاراقشاسىندا جازدى.

"قۇرمەتتى الماتىلىقتار! ءوزىم تۋىپ-وسكەن الماتىعا قىزمەتكە كەلگەنىم كۇنى كەشە عانا سەكىلدى ەدى. مىنە، 4 جىل وتە شىعىپتى. وسى كەزەڭدە سۇيىكتى قالامىزعا ايانباي ەڭبەك ەتتىم. كوپتەگەن جوبالاردى بىرلەسە ىسكە اسىردىق.
⠀
ماعان ۇلكەن سەنىم ارتىپ، الماتىنىڭ اكىمى ەتىپ تاعايىنداعان ەلباسى نۇرسۇلتان ءابىشۇلى نازارباەۆقا العىسىم شەكسىز. اتقارىلعان ءاربىر يگى ءىس ەلباسىنىڭ زور قولداۋىمەن ىسكە استى.
⠀
سونداي-اق، پرەزيدەنت لاۋازىمىنا كىرىسكەننەن ۇنەمى قولداۋ ءبىلدىرىپ، الماتىعا ارنايى كەلىپ، مەترو جانە جولايىرىقتار قۇرىلىسىنىڭ قارقىنىن ۇدەتۋگە، قوسىلعان اۋدانداردا ينفراقۇرىلىمدى دامىتۋعا قولداۋ كورسەتكەن، سايلاۋدان كەيىن مەنى قايتا تاعايىنداعان كاسىم-جومارت كەمەلۇلى توقاەۆقا ۇلكەن العىس بىلدىرەمىن.
⠀
قالا اكىمى قىزمەتىنە كىرىسە سالا «Nur Otan» پارتياسىنىڭ باسىمدىقتارى نەگىزىندە «الماتى-2020» باعدارلاماسىن ازىرلەپ، ونى قوعاممەن تىكەلەي تالقىلادىق. ول ويداعىداي ىسكە اسۋدا. «قالا ادامدار ءۇشىن» كونتسەپتسياسى اياسىندا بىرقاتار كوشەلەر جاڭعىرتىلدى، ءوندىرىس وشاقتارى اشىلدى، ەكونوميكا وركەندەپ، اۋقىمدى ينۆەستيتسيالار تارتىلدى.
⠀
قىزمەتىمىزدىڭ ۇلكەن ءبىر باعىتى ۇلتتىق رۋحتى كوتەرۋ بولدى. ەلباسى قولداۋىمەن يۋنەسكو اياسىندا الماتىنىڭ 1000 جىلدىعىن اتاپ ءوتىپ،قالامىزدىڭ وتكەنىنەن سىر شەرتەتىن «الماتى مۋزەيىن» اشتىق. وسىلايشا، الماتىنىڭ مىڭجىلدىقتار بۇرىن بابالار سالعان التىن بەسىك، اتاجۇرت ەكەنىن ايشىقتادىق. ۇلتتىق ونەرىمىزدى دارىپتەيتىن حالىقارالىق شارالار ۇيىمداستىرىپ، بىرقاتار ونەر وردالارىن اشتىق.
⠀
ەندى بۇگىن قاراپايىم ازاماتتاردىڭ مۇڭىن مۇڭداپ، جوعىن جوقتاپ، وزەكتى ماسەلەلەردىكوتەرىپ كەلە جاتقان، حالىق پەن بيلىكتىڭ اراسىنداعى دانەكەر – «Nur Otan» پارتياسى توراعاسىنىڭ ءبىرىنشى ورىنباسارى قىزمەتىنە تاعايىندالدىم. ەل تاريحىنداعى وسىناۋ جاۋاپكەرشىلىگى مول تۇستا سەنىم ارتىپ وتىرعان ەلباسىعا ۇلكەن العىس ايتامىن.
⠀
حالىقتىڭ مەملەكەتكە جانە ەرتەڭگى كۇنگە دەگەن سەنىمىن ارتتىرۋعا، ەل بىرلىگىن نىعايتۋعا، ياعني ەلباسى باعدارىن ىسكە اسىرۋعا باعىتتالعان پارتيا ساياساتىن ورىنداۋعا بار كۇش-جىگەرىمىزدى جۇمسايتىن بولامىز.
⠀
بارشاڭىزعا ىقىلاسىمدى بىلدىرە وتىرىپ، دەندەرىڭىزگە ساۋلىق، وتباسىلارىڭىزعا اماندىق تىلەيمىن!" دەلىنگەن جازبادا.