ارىس قالاسىنىڭ تۇرعىندارى بۇگىن، ياعني 28 ماۋسىم كۇنى تاڭعى 8.00-دە قالاعا كىرگىزىلە باستادى. 4 كۇن بويى شىمكەنت قالاسى مەن وبلىستىڭ وزگە دە اۋداندارىنداعى ەۆاكۋاتسيالىق ورتالىقتاردا كۇن كەشكەن تۇرعىندار ۇيىمداسقان تۇردە اۆتوبۋس كولوننالارىمەن تۋعان جەرلەرىنە ورالدى.
قازىرگى تاڭدا ارىس قالاسى مەن اسكەري قويمادا وق-دارىلەردى تازالاۋ جانە قالانى دەزينفەكتسيالاۋ شارالارى اياقتالدى. تۇرعىندار ومىرىنە ەش قاۋىپ جوق. سونداي-اق بۇگىن عانا قر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ارىستاعى اتموسفەرالىق اۋانىڭ تازا، سۋ جانە توپىراقتىڭ لاستانباعانىن، رادياتسيانىڭ جوقتىعىن ايتقان بولاتىن.
تۇرعىندار ۇيىنە ورالعاندا بەكىتىلگەن قىزمەتكەرلەر فوتو-ۆيدەوفيكساتسيا جاساپ، شىعىنداردى ەسەپتەۋگە كومەك بەرەدى. جايعاسۋ بارىسىندا وبلىستىق پوليتسيا قىزمەتكەرلەرى مەن دارىگەرلەر، توتەنشە جاعداي دەپارتامەنتى مەن قۇزىرلى مەكەمەلەر ۇزدىكسىز قىزمەت كورسەتەدى.
سونىمەن قاتار ارىستىقتارعا قۇرىلىس-جوندەۋ جۇمىستارىنا كومەك بەرۋ ءۇشىن ەلىمىزدىڭ بارلىق وڭىرىنەن 160 ارنايى بريگادا كەلەدى. ءاربىر وبلىسقا ارىس قالاسىنداعى بولىنگەن سەكتورلار بويىنشا جۇمىستار بەرىلەدى.
ايتا كەتەيىك، تۇرعىنداردى كىرگىزۋ ءۇشىن ارىس قالاسى 17 سەكتورعا بولىنگەن. بۇل سەكتورلارعا وبلىسىمىزدىڭ اۋدان، قالا اكىمدىكتەرىنەن 640 جاۋاپتى (1 اۋدان - 40 ادام) ازامات بەكىتىلدى. ءاربىر 10 ۇيگە 1 قىزمەتكەردەن جاۋاپتى. تۇرعىنداردى جايعاستىرۋ كەزىندە وسى ازاماتتارعا قالاداعى كوشە، اۋلالاردىڭ بەلسەندىلەرى كومەك بەرەتىن بولادى.
اپاتتان زارداپ شەككەن حالىققا قازاقستاننىڭ وزگە وبلىستارىنان قاجەتتى 150 توننا زات جينالعان.
تۇركىستان وبلىسى اكىمىنىڭ ءباسپاسوز-قىزمەتى
"ادىرنا" ۇلتتىق پورتالى
