ءماجىلىس دەپۋتاتى امانجول ءالتاي شەتەل اسىپ كەلگەن الەمدىك جۇلدىزداردىڭ كونتسەرتىندە ەرسى قىلىق كورسەتكەن جاستاردىڭ ءىسىن سىناپ، ۇلتتىق تاربيەگە كوڭىل ءبولۋ قاجەتتىگىن ايتتى، دەپ حابارلايدى "ادىرنا" پورتالى.
ول ۇرپاق تاربيەسىندە قىز بالانىڭ ءرولى ەرەكشە ەكەنىن اتاپ ءوتتى.
"ارۋدىڭ اق ديدارىندا - ۇلتتىڭ ۇياتى بار! قىز تاربيەسى بۇزىلسا — ۇلت تاربيەسى السىرەيدى. وكىنىشكە قاراي، جاستارىمىز تيك-توك پەن ينستاگرامنىڭ تۇتقىنىنا اينالعان بۇگىنگى قوعامدا عاسىرلار بويى كوزدىڭ قاراشىعىنداي ساقتاعان قۇندىلىقتارىمىزدان، ۇلتتىق تاربيە ونەگەسىنەن اجىراپ بارامىز" دەدى ول.
ول الەمدىك جۇلدىز AKON-نىڭ استاناداعى كونتسەرتىندە كقرەرمەن قىزداردىڭ ءىش كيىمىن لاقتىرىپ ۇياتتى ءىس قىلعانىن باس ايتىپ، مۇنداي سوراقىلىققا شارا قولدانۋ كەرەكتىگىن قوستى:
"استانادا وتكەن AKON-نىڭ كونتسەرتىنە بايلانىستى بىرنەشە اسپەكتلەرگە توقتالايىن: بىرىنشىدەن، كونتسەرت كەزىندە جانكۇيەر جاستار انشىگە ءىش كيىمىن لاقتىرىپ، تومەن مورالدىق مىنەز-قۇلىق كورسەتتى، ەلىمىزدىڭ بەدەلىنە نۇقسان كەلتىردى. ەكىنشىدەن، ۇلتتىق وزەگى ءالسىز، وزگەنى ءپىر تۇتقىش جاستار اندەردىڭ كونتەكستىندە بايقالاتىن گەندەرلىك كەمسىتۋشىلىك ماسەلەسىن، قىزداردىڭ نامىسىن، ابىرويىن قورلايتىن تەرىس مازمۇنىن اڭعارماي ەسى كەتتى. ۇشىنشىدەن، «smack that» انىنىڭ ماتىنىنەن ەروتيكالىق سيپاتتاعى ءناپسىنى قوزدىرۋعا يتەرمەلەيتىن، سانانى لايلاپ، تاربيەگە تەرىس اسەر ەتەتىن قاۋىپتى مازمۇندى اڭعارامىز. تورتىنشىدەن، ۇيىمداستىرۋشىلاردىڭ ءانشىنى ۇلتتىق كيىممەن قارسى الىپ، دومبىرا سىيلاعاندارى تىپتەن ورىنسىز دەپ سانايمىن. ءبىز مادەني اتريبۋتتارىمىزدى ىلگەرلەتۋدە، ناسيحاتتاۋدا تالعامدى بولۋىمىز كەرەك. ۇلتتىق مۋزىكالىق مۇرامىزدىڭ سيمۆولى - قاسيەتتى دومبىرانى جەزوكشەلىك پەن ايەلدەردى قورلاۋدى ناسيحاتتاۋدىڭ ايقىن سيپاتىنا يە «Smack that»، «hypnotiser» سياقتى اندەردى ورىندايتىن انشىگە بەرۋ – پارىقسىزدىق، ۇلتتىق قۇندىلىقتاردى تابانعا تاپتاۋ دەپ قابىلدايمىن" دەدى ول.
سونداي-اق، وسىنداي دۇنيەلەردىڭ الدىن الۋ ءۇشىن مينيسترلىك ارنايى شارا قولدانسىن دەپ اتاپ ءوتتى امانجول ءالتاي:
"مادەنيەت جانە اقپارات مينيسترلىگى شەتەلدەن ەلىمىزگە كىرەتىن مادەني ونىمدەرگە، گاسرولدىك ساپارمەن كەلۋشىلەرگە قويىلاتىن ناقتى تالاپتار جيىنتىعىن ازىرلەۋى ءتيىس. ايعايلاعاننىڭ ءبارى ءانشى ەمەس! ءبىزدىڭ نورمامىز بەن ۇستانىمدارىمىزعا قايشى كەلەتىن ونىمدەردى تاراتپاۋ ءۇشىن شەتەل ارتىستەرىن تاڭداۋدا قاتاڭ تالاپتار ساقتالسىن! مادەني قاۋىپسىزدىكتىڭ ساقتالۋى ءۇشىن، ەلىمىزدە وتكىزىلەتىن كونتسەرتتەردىڭ ءبىزدىڭ ۇلتتىق قۇندىلىقتارىمىزعا زيانى تيمەۋى قاداعالانسىن. وقۋ-اعارتۋ مينيسترلىگى مەكتەپ باعدارلاماسىنا «سالت-ءداستۇر جانە ۇلتتىق قۇندىلىقتار» ءپانى ەنگىزىلسىن. عىلىم جانە جوعارعى ءبىلىم مينيسترلىگى جاستار اراسىندا ۇلتتىق تاربيە جۇمىسىن جەتلدىرۋى ءتيىس" دەلىندى.
ەسكە سالاي كەتەيىك، بۇعان دەيىن استانادا وتكەن AKON كونتسەرتىندە ۇياتتى ءىس جاساعان قىزداردىڭ ۆيدەوسى تاراپ، قىزۋ تالقىعا تۇسكەن بولاتىن.
