بۇۇ-نىڭ حالىقارالىق كۇندەر جۇيەسىندە جىل سايىن 2 قاراشادا حالىقارالىق جۋرناليستەرگە قارسى قىلمىستار ءۇشىن جازاسىزدىقتى جويۋ كۇنى (IDEI) اتاپ وتىلەدى، دەپ حابارلايدى “ادىرنا” ۇلتتىق پورتالى.
اتاۋلى كۇن 2013 جىلى باس اسسامبلەيانىڭ شەشىمىمەن جۋرناليستەردىڭ ءوز جۇمىسىن اتقارۋ مۇمكىندىگىن شەكتەيتىن جانە قوعامنىڭ سەنىمدى اقپارات الۋ قۇقىعىنا نۇقسان كەلتىرەتىن الاڭداتارلىق جاعدايعا جاھاندىق نازاردى اۋدارۋ ءۇشىن قۇرىلعان.
كۇندى بەلگىلەۋ كۇنى رەداكتسيانىڭ نۇسقاۋى بويىنشا ماليدەگى قارۋلى قاقتىعىستىڭ بارىسىن جازعان ەكى فرانتسۋز ءجۋرناليسى گيسلەين ديۋپون مەن كلود ۆەرلوندى ەسكە الۋ ءۇشىن تاڭدالدى. ولاردى 2013 جىلدىڭ 2 قاراشاسىندا سودىرلار ۇرلاپ، ولتىرگەن. بۇل قىلمىس قوعامدا نارازىلىق تۋدىرىپ، ناتيجەسىندە بۇۇ ءباسپاسوز وكىلدەرىنە زورلىق-زومبىلىق كورسەتۋدى جانە ولاردىڭ مىندەتتەرىنە كەدەرگى كەلتىرۋدى ايىپتايتىن قۇجات قابىلدادى. ويتكەنى، حالىقارالىق گۋمانيتارلىق قۇقىققا سايكەس، قارۋلى قاقتىعىس ايماقتارىندا جۇمىس ىستەيتىن باق قىزمەتكەرلەرى بارلىق سوعىسۋشى تاراپتاردىڭ وكىلدەرىنىڭ قورعاۋى مەن قۇرمەتىنە يە بولۋى كەرەك.
جازاسىزدىقپەن كۇرەسۋگە باسا نازار اۋدارۋ جۋرناليستيكانىڭ الاڭداتارلىق جاعدايىمەن بايلانىستى: 2006-2023 جىلدار ارالىعىندا الەمدە شۇعىل جاڭالىقتاردى جاريالاۋ جانە حالىققا اقپارات جەتكىزۋ كەزىندە 1600-دەن استام جۋرناليست ءولتىرىلدى. ماسەلەن، 2012 جىلى يۋنەسكو دەرەكتەرى بويىنشا 124 باق قىزمەتكەرى، 2014 جىلى – 98, 2015 جىلى – 115, 2020-2021 جىلدارى – 117 جۋرناليست قايتىس بولعان.
