25 قازان كۇنى ساعات 11 شاماسىندا اباي وبلىسى اياگوز قالاسىنداعى جەكە ۇيلەردىڭ بىرىندە ءورت شىققان. وقيعا ورنىنا 4 بالا قازا تاپقان. 8 جاسار ەگىزدەر مەن ولاردىڭ 3 جانە 2 جاستاعى ىنىلەرى كومىرقىشقىل گازىنان ۋلانىپ قايتىس بولعانى ايتىلدى. بۇل تۋرالى Abai News جاريالادى، دەپ حابارلايدى “ادىرنا” ۇلتتىق پورتالى.
بەلگىلى بولعانداي، بالالاردىڭ اكەسى جەدەل جاردەم جۇرگىزۋشىسى بولىپ جۇمىس ىستەيدى جانە وقيعا كەزىندە جۇمىستا بولعان، ال اناسى بازاردان ازىق-تۇلىك ساتىپ الۋعا كەتكەن.
قايعىلى وقيعا تۋرالى اقپارات قازىر تەك جەرگىلىكتى تۇرعىندار اراسىندا تارالىپ جاتىر. ولار جاس اتا-انالارعا كومەك رەتىندە قاراجات جيناي باستاعان. بىراق بۇل اقپاراتتى وقيعا بولعان كۇنى نە اۋداندىق اكىمدىك، نە وبلىستىق اكىمدىك راستامادى دا، جوققا دا شىعارمادى.
«اقپاراتتىق ۇنسىزدىكتىڭ جالعاسىپ جاتقان مەرەكەلىك باعدارلامالارعا قاتىسى بار ما دەپ ويلامايىق. قالاي بولعاندا دا، وبلىس ورتالىعى 26 قازانعا جوسپارلانعان ءتۇرلى شارالاردى كەيىنگە قالدىرا باستادى»، - دەپ تولىقتىردى Abai News باسىلىمى.
اباي وبلىسىنىڭ اكىمدىگى اياگوز قالاسىندا بولعان جانتۇرشىگەرلىك تراگەديا تۋرالى اقپاراتتى 26 قازاندا عانا رەسمي تۇردە راستادى.
بۇل مالىمەتكە قاراعاندا، 25 قازان كۇنى ساعات 10:49-دا توتەنشە جاعدايلار دەپارتامەنتىنىڭ كۇشتەرى مەن قۇرالدارىنا ورتالىق باسقارۋ ورتالىعىنا اياگوز قالاسىنداعى جەكە ۇيلەردىڭ بىرىندە ءتۇتىن شىققانى تۋرالى سيگنال كەلىپ تۇسكەن. 6 ادامنان تۇراتىن قۇتقارۋ توبى دەرەۋ وقيعا بولعان ورىنعا جەتكەن.
ء"ورت سوندىرۋشىلەر كەلگەن كەزدە بولمەلەردىڭ بىرىندە (جاتىن بولمە) 20 شارشى مەتر اۋماقتا جيھاز جانە جەكە زاتتار جانىپ جاتىر. ءورت ءسوندىرۋ بولىمشەلەرى ءورتتى ساعات 11:10-دا انىقتاپ، 11:24-تە ءسوندىردى. ءتۇتىننىڭ شىعۋ سەبەبى انىقتالۋدا،" - دەلىنگەن حابارلامادا.
ءورتتى ءسوندىرۋ كەزىندە قۇتقارۋشىلار ءتورت بالانىڭ دەنەسىن تاپتى.
پوليتسيا وقيعانىڭ ءمان-جايىن انىقتاۋعا كىرىستى.
وبلىس اكىمدىگى قازىرگى تاڭدا وتباسى مۇشەلەرىنە بارلىق قاجەتتى كومەكتەر كورسەتىلىپ جاتقانىن، جاعداي جەرگىلىكتى اتقارۋشى ورگانداردىڭ باقىلاۋىندا ەكەنىن باسا ايتتى.
ەسكە سالساق، 2019 جىلدىڭ اقپان ايىنىڭ باسىندا بەس اپالى-ءسىڭلىلى استانانىڭ شەتىندەگى ورتتە ورتەنىپ كەتكەن بولاتىن. بۇل قايعىلى وقيعا قوعامدى ءدۇر سىلكىندىرىپ، ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆانى قىزمەتىنەن كەتۋگە ءماجبۇر ەتتى. سونداي-اق حالىقتىڭ الەۋمەتتىك وسال توپتارىنا، ونىڭ ىشىندە كوپ بالالى وتباسىلارعا مەملەكەتتىك قولداۋ كورسەتۋدى ايتارلىقتاي قايتا قاراعان بولاتىن.
