رەسپۋبليكا كۇنى قارساڭىندا «AMANAT» پارتياسى استانا قالالىق فيليالىندا «كىتاپ-AMANAT» جوباسى اياسىندا كىتاپ ورتالىعى اشىلدى. وسى ارقىلى پارتيا وتاندىق ادەبيەتكە دەگەن قىزىعۋشىلىقتى ارتتىرۋدى، ادامداردى وقۋعا ىنتالاندىرۋدى، قازاقستاندىق اۆتورلار مەن كىتاپ شىعارۋشىلارعا قولداۋ كورسەتۋدى كوزدەپ وتىر.
ءىس-شاراعا پارتيالىقتارمەن قاتار، باسپاگەرلەر، مەملەكەت جانە قوعام قايراتكەرلەرى، اقىن-جازۋشىلار، زيالى قاۋىم وكىلدەرى قاتىستى.
ءسوز باسىندا «AMANAT» پارتياسىنىڭ اتقارۋشى حاتشىسى داۋلەت كارىبەك بۇل ءىس-شارانىڭ ءمانى مەن ماڭىزىنا توقتالدى.
«مەملەكەت باسشىسى قاسىم-جومارت توقاەۆ تۇركىستاندا وتكەن ۇلتتىق قۇرىلتايدا كىتاپ ءىسى ەلىمىزدەگى يدەولوگيالىق جۇمىستىڭ باستى باعىتتارىنىڭ ءبىرى ەكەنىن ەرەكشە اتاپ وتكەن بولاتىن. وسى ورايدا، پارتيامىزدىڭ ءار فيليالىندا كىتاپ ورتالىقتارىن اشۋدى كوزدەيتىن جوبا باستادىق. ونىڭ العاشقىسى الماتى قالاسىندا، پارتيامىزدىڭ توراعاسى ەرلان قوشانوۆتىڭ قاتىسۋىمەن رەسمي اشىلىپ تا ۇلگەردى. بۇل جوبا بىردەن ەكى يگىلىكتىڭ ارناسىن توعىستىرىپ وتىر. اۋەلگىسى – رۋحانياتتىڭ دامۋىنا ولشەۋسىز ۇلەس قوسادى، سونىمەن قاتار وتاندىق قالامگەرلەردىڭ، ۇلتتىق ادەبيەتىمىز بەن اۋدارما ءىسىنىڭ دامۋىنا سەپتىگىن تيگىزەدى»، – دەدى پارتيانىڭ اتقارۋشى حاتشىسى داۋلەت كارىبەك.
وسى ورايدا، «قازاقستان رەسپۋبليكاسىنىڭ باسپاگەرلەر، پوليگرافيستەر جانە كىتاپ تاراتۋشىلار» قاۋىمداستىعى پرەزيدەنتىنىڭ ورىنباسارى، اقىن الماس احمەتبەكۇلى پارتيا وقىرمان مەن باسپاگەر اراسىندا التىن كوپىرگە اينالۋدى كوزدەيتىن ماڭىزدى قادام جاساپ جاتقانىن اتاپ ءوتتى.
«كىتاپ-AMANAT» جوباسى «AMANAT» پارتياسىنىڭ رۋحانيات ماسەلەلەرى بويىنشا ەڭ باستى جوباسى بولىپ سانالادى. ەندى ءبىز باسپاگەرلەر، پوليگرافيستەر جانە كىتاپ تاراتۋشىلار قوعامىمەن «AMANAT» پارتياسى اراسىندا مەموراندۋمعا قول قويدىق. باسپا ونىمدەرىن بارىنشا قولداۋ جانە تاراتۋ ماسەلەسىن قولعا الدىق. بۇنداي ورتالىقتار الداعى ۋاقىتتا بارلىق وبلىس ورتالىقتارىندا ىسكە قوسىلسا، ودان كەيىنگى جىلدارى اۋدان ورتالىقتارىندا دا اشىلادى دەپ ويلايمىن»، – دەدى ول.
ءوز كەزەگىندە، «قازاق گازەتتەرى» جشس باس ديرەكتورى ديحان قامزابەكۇلى مەملەكەتتىك ءتىلدىڭ قولدانىس اياسىن كەڭەيتۋ ىسىندە مۇنداي باستامالاردىڭ ماڭىزى زور ەكەنىن اتاپ ءوتتى.
«تارلان تاريحىمىزعا، كىتاپقا دەگەن قۇرمەت ءاردايىم الدىڭعى ورىندا تۇرۋى ءتيىس. كىتاپ – ارقاشان جاقسىلىققا، جاڭاشىلدىققا جەتەلەيدى. «AMANAT» پارتياسىنىڭ بۇگىنگى باستاماسىن حالىق، سونىڭ ىشىندە زيالى قاۋىم وكىلدەرى وتە جىلى قابىلداپ جاتىر. الەمدەگى بارلىق دامىعان ەل كىتاپتان، گازەت-جۋرنالدان قول ۇزگەن جوق. وسىنداي ىزگى قادامدار ارقىلى كىتاپ وقۋعا دەگەن ىنتامىز ارتا تۇسەدى»، – دەدى ديحان قامزابەكۇلى.
بۇل رەتتە، قوعام قايراتكەرى، پارتيا ارداگەرى ورازكۇل اسانعازىقىزى مەملەكەتتىك تىلدە جارىق كورەتىن كىتاپتار ساتىلىمىن ارتتىرۋ ماسەلەسىن قوزعادى.
«جاستار كىتاپ وقىمايدى دەپ كىنا ارتۋعا بولمايدى. ساتىپ الاتىن كىتاپ ىزدەپ، وي-ءورىسىن كەڭەيتكىسى كەلەتىن جاستار قاتارى كوبەيىپ كەلەدى. وكىنىشكە قاراي، قازاق تىلىندە جارىق كورگەن كىتاپتار سانى كىتاپ دۇكەندەرىندە وتە از. بۇل – ۇلكەن سىن. سوندىقتان بۇگىن «AMANAT» پارتياسى وتە ورىندى ءىس-شارا وتكىزىپ جاتىر. الداعى ۋاقىتتا اۆتورلار وسى جەرگە كەلىپ، وقىرماندارىمەن جۇزدەسىپ، ءوز كىتاپتارىن ناسيحاتتايدى دەپ ۇمىتتەنەمىن»، – دەدى ول.
ال بەلگىلى اقىن سەرىكزات دۇيسەنعازى وسىنداي ورتالىقتار اشۋ ماسەلەسى بۇعان دەيىن دە كوپ ايتىلىپ جۇرگەنىن اتاپ ءوتتى.
«بالاعا كىتاپ وقى دەپ ايتۋدىڭ قاجەتى جوق. كىتاپ وقۋعا قاجەت جاعداي جاساۋ كەرەك. كەزىندە اكەلەرىمىزدىڭ قوينىندا «جۇلدىز» جۋرنالى جۇرەتىن ەدى. ياعني، اعا بۋىننىڭ كىتاپ وقۋىنا جاعداي جاسالدى. قازىر دە سونداي جاعداي جاساۋىمىز كەرەك»، – دەدى ول.
پارتيا بۇل جۇمىستى الداعى ۋاقىتتا بەلسەندى جالعاستىرادى.
