شىعىس وڭىرىندە جاس انالار اراسىندا ەرەكشە كونكۋرس ءوتتى. ايماقتاعى قالالار مەن اۋدانداردان كەلگەن 17 قاتىسۋشى «ۇزدىك كەلىن» اتالمىنىنا كىمنىڭ لايىق ەكەندىگىن دالەلەدەدى.
بۇرىمدىلار اراسىنداعى مۇنداي كونكۋرس وڭىردە ءبىرىنشى رەت وتكىزىلىپ تۇرعان جوق. بيىل ءداستۇرلى سايىس جارما اۋدانىنىڭ قالباتاۋ اۋىلىندا «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ۇيىمداستىرلىعان-دى. باستى ماقساتى جاستار ساناسىنا وتباسىلىق قۇندىلىقتى ءسىڭىرىپ، ەرەسەكتەر تاجىريبەسىن جاس بۋىنعا جەتكىزۋ. شارانىڭ وتۋىنە شقو ىشكى ساياسات باسقارماسىنىڭ «جاستار رەسۋرسى ورتالىعى» كمم-ءنىڭ ۇيىتقى بولعانىن ايتا كەتكەن ءجون.
كەلىندەر اراسىنداعى باسەكە ەكى كەزەڭنەن تۇردى. العاشقى «اس – ادامنىڭ ارقاۋى» بولىگىندە قاتىسۋشىلار اسپازدىق شەبەرلىكتەرىن پاش ەتىپ، قازىلارعا ۇلتتىق تاعامداردان ءدام تاتقىزدى. ال كەلەسى كەزەڭ شىعارماشىلىق جاعىنا باعىتتالدى. مۇندا بايقاۋعا تۇسكەندەر جاسىرىن تالانتتارىن كورسەتۋ ارقىلى، قازىلار مەن كورەرمەندەردى تاڭ قالدىرۋلارى كەرەك بولدى.
«اياۋلى جاس كەلىن» سايىسىندا جەڭىسكە جەتۋ ءۇشىن قاتىسۋشىلار قابىلەتتەرى مەن ونەرلەرىن كورسەتىپ قانا قويماي، سالت-داستۇرلەردەن حاباردار ەكەندىكتەرىن كورسەتۋلەرى ءتيىس ەدى. ۇيىمداستىرۋشىلاردىڭ ايتۋىنشا، اتالمىش كونكۋرستىڭ باستى ماقساتى – قازاق حالقىنىڭ ۇمىت بولا باستاعان ادەت-عۇرپىن قالىپقا كەلتىرىپ، ولاردى بارىنشا ەستە ساقتاۋعا شاقىرۋ.
سونىمەن، جۇلدەگەرلەر ۇشتىگى كەلەسىدەي انىقتالدى: ءۇشىنشى ورىنعا جارما اۋدانىنىڭ وكىلى گۇلميرا جۋسانباەۆا يە بولدى. وعان كىر جۋاتىن ماشينە تابىس ەتىلدى. جۇلدەلى ەكىنشى ورىن اباي اۋدانىنىڭ كەلگەن ماقپال ەبىنگە بۇيىرىپ، گاز پليتاعا قول جەتكىزسە، «اياۋلى جاس كەلىن» اتالىمىنا سەمەيلىك ايدانا باۋىرجانوۆا لايىق شىقتى. بۇل قاتىسۋشىعا تەلەديدار تابىستالدى. ەرەكشە جارىستىڭ وزگە قاتىسۋشىلارىنا ىنتالاندىرۋ سىيلىقتارى رەتىندە امبەباپ ازىرلەگىشتەر سىيعا بەرىلدى.
