ءماجىلىس وتىرىسىندا دەپۋتات قاراقات ابدەن ەلدەگى گەندەرلىك تەڭدىك ماسەلەسىن كوتەردى، دەپ حابارلايدى “ادىرنا” ۇلتتىق پورتالى.
ول ايەلدەر ءۇشىن بيلىكتە تەڭ قۇقىقتار بولۋىن تالاپ ەتتى.
«گەندەرلىك ساياساتتى ىسكە اسىرۋ – ەلىمىزدەگى وزەكتى باعىتتاردىڭ ءبىرى. حالقىمىزدىڭ 51%-ى ايەلدەر قاۋىمى ەكەنىن ەسكەرسەك، ەلدەگى ساياسي ومىرگە دە بارلىق ازاماتتىڭ تەڭ دارەجەدە قاتىسۋىن قامتاماسىز ەتۋ ماڭىزدى. ارينە، قازىر مەملەكەتتىك باسقارۋ ىسىندە، ساياساتتا، بيزنەستە دە ايەلدەر ۇلەسى ءبىرشاما ارتقانىن مويىنداۋىمىز كەرەك. جاڭارتىلعان مينيسترلەر كابينەتىنىڭ وزىندە 4 ايەل بار. بۇل – وتكەن جىلدارمەن سالىستىرعاندا جاقسى كورسەتكىش. مەملەكەت باسشىسى گەندەرلىك تەڭدىكتى قامتاماسىز ەتۋ بويىنشا جۇمىستى جەتىلدىرۋگە باسا نازار اۋدارادى. بىراق ءالى كۇنگە دەيىن مەملەكەتتىك كومپانيالاردىڭ باسقارۋشى ساناتىنداعى ايەلدەردىڭ ۇلەسى نەبارى 6-7%»، - دەدى قاراقات ابدەن دەپاتتىق ساۋال جولداي وتىرىپ.
ونىڭ ايتۋىنشا، «قازاقستان تەمىر جولى»، «KEGOC»، «قازاقتەلەكوم» سىندى ءىرى كومپانيالاردىڭ ديرەكتورلار كەڭەسىندە بىردە-ءبىر ايەل جوق.
«كادرلار شوعىرلانعان استانانادا 5 اۋدان بويىنشا ءبىر دە ءبىر ايەل اكىم نەمەسە ونىڭ ورىنباراسى بولىپ تاعايىندالماعان. «حالىقتىڭ 50%-دان استام ۇلەسىنە تەڭ بولىپ وتىرعان ايەلدەر نەگە لاۋازىمدى قىزمەتتە 50%-عا جەتپەي وتىر؟» دەگەن زاڭدى سۇراق تۋىندايدى. كوپ ويلانۋدىڭ قاجەتى جوق. گەندەرلىك تەڭدىكتى قامتاماسىز ەتۋ جولىندا ءبىز 30%-عا جەتكىزىپ، 50%-عا ۇمتىلۋىمىز كەرەك»، - دەيدى ول.
دەپۋتات ءبىلىمدى ايەلدەردىڭ ءۇنى مىنبەدەن ەستىلۋى كەرەگىن ايتا كەتتى. "قازاقستاندىق ايەلدەردىڭ ەل ءۇشىن ماڭىزدى شەشىمدەردى قابىلداۋعا ءبىلىمى دە، بىلىكتىلىگى دە جەتەدى. يا، ايەلدىڭ ەڭ ۇلى ميسسياسى – انا، جار بولۋ، سانالى ۇرپاق تاربيەلەۋ. بىراق "مەڭىرەۋ ايەلدەن مەڭىرەۋ ۇرپاق تۋادى!" دەگەن عۇلاما ءماشھۇر ءجۇسىپتىڭ ءسوزىن ۇمىتپايىق. سوندىقتان تاس كەرەڭ بولاشاققا تاس اتپايىق دەسەك، دومالاق انانىڭ كوزىندەي بولعان ساۋاتتى، سانالى ايەلدىڭ بۇگىنگى ءۇنى مىنبەدەن ەستىلۋى ءتيىس!", – دەپ قورىتىندىلادى قاراقات ابدەن.سونىمەن قاتار، ول پرەمەر-مينيستر ءاليحان سمايلوۆقا مىناداي ۇسىنىس ءبىلدىردى.
- اكىمدەردىڭ قىزمەتىن باعالايتىن رەيتينگكە وڭىردەگى توپ-مەنەدجمەنتتەگى ايەلدەردىڭ ۇلەسىن انىقتايتىن كورسەتكىش قوسىلسىن;
- ۇكىمەت تاراپىنان ايەلدەردىڭ ساياسي كوشباسشىلىعىن دامىتۋ بويىنشا ناقتى باعدارلامالاردى دايارلاۋ قاراستىرىلسىن.
