ماسكەۋدە جولاۋشىلار ۇشاعى اپاتقا ۇشىراپ، ونداعان ادام وپات بولدى. الدىن الا اقپارات بويىنشا، شەرەمەتەۆو اۋەجايىنا اپاتتى جاعدايدا قونعان سوڭ ورتەنگەن ۇشاقتان ادامداردىڭ ءبىر بولىگى سىرتقا شىعا الماي قالعان.
مامىردىڭ 5-ءى كۇنى كەشكە رەسەي تەرگەۋ كوميتەتى ماسكەۋدىڭ شەرەمەتەۆو اۋەجايىندا "اەروفلوت" اۋە كومپانياسىنىڭ "سۋحوي سۋپەردجەت" جولاۋشىلار ۇشاعى اپاتقا ۇشىراپ، 41 ادام قازا تاپقانى تۋرالى حابارلادى. ۇشاقتا بارلىعى 73 جولاۋشى مەن 5 ەكيپاج مۇشەسى بولعان. مەرت بولعانداردىڭ اراسىندا ەكيپاجدىڭ ءبىر مۇشەسى بار دەپ حابارلاندى.
"اەروفلوت" كومپانياسى اپاتتان ءتىرى قالعان 33 جولاۋشىنىڭ ءتىزىمىن جاريالادى. اقپارات اگەنتتىكتەرى اۋرۋحاناعا جەتكىزىلگەن بەس ادامنىڭ ەكەۋىنىڭ جاعدايى اۋىر دەپ حابارلادى.
جەكسەنبى كۇنى ماسكەۋ ۋاقىتىمەن ساعات 17:57 كەزىندە رەسەي استاناسىنان مۋرمانسكىگە SU1492 رەيسىمەن ۇشىپ شىققان ۇشاق ەكيپاجى اۋە كولىگىندە اپاتتى جاعداي تۋىنداعانى تۋرالى ساعات 18:25 كەزىندە جەرگە حابارلاعان. ارادا بەس مينۋت وتكەندە ماسكەۋ اۋەجايىنا ورالعان ۇشاق جەرگە قونعاننان كەيىن ورتەنگەن. ۇشاقتاعى جولاۋشىلار قۇتقارۋ قۇرالدارىنىڭ كومەگىمەن سىرتقا قاشىپ شىققان.
"اەروفلوت" كومپانياسى ءباسپاسوز حاتشىسى جولاۋشىلاردىڭ ۇشاقتان 55 سەكۋندتا شىعارىلعانىن ايتادى. بىراق، "ينتەرفاكس" اگەنتتىگىنىڭ دەرەككوزدەرىنە سىلتەمە جاساپ حابارلاۋىنشا، ۇشاقتىڭ ارتقى بولىگىندە بولعان ادامدار سىرتقا شىعىپ ۇلگەرمەگەن.
ۇشاق ۇشقىشتارىنىڭ ءبىرى دەنيس ەۆدوكيموۆ Baza باسىلىمىنا بەرگەن سۇحباتىندا اۋەدە ۇشاققا نايزاعاي ءتۇسىپ، سالدارىنان ۇشاق جۇيەسى ىستەن شىققانىن راستاعان. ەكيپاج جانارمايى تولىق ۇشاقپەن اپاتتى جاعدايدا جەرگە قونۋدى ۇيعارعان. ۇشقىشتىڭ ايتۋىنشا، ەكيپاج ۇشاقتى قوندىرعان كەزدە ارنايى نۇسقاۋلىق تالاپتارىن ورىنداپ، ۇشاق جىلدامدىعىن شەكتى شامادان اسىرماعان. بىراق اۋەجاي الاڭىنا قونعان كەزدە ۇشاقتىڭ استىڭعى بولىگى جەرگە سوعىلىپ، ءورت شىققان. اگەنتتىكتىڭ حابارلاۋىنشا، فيۋزەلاجىنىڭ ءبىرى بولىگى ۇشۋ الاڭىنا بىرنەشە رەت سوعىلعان ۇشاقتىڭ ارتقى دوڭگەلەگىنىڭ تىرەۋىشى سىنىپ كەتكەن. ونىڭ سىنىقتارى تۇسكەن قوزعالتقىشتان ءورت شىعىپ، ۇشاقتىڭ ارتقى بولىگى تۇتاس جانا باستاعان.
الەۋمەتتىك جەلىدە تاراعان ۆيدەولار مەن فوتولاردا اۋەجايدىڭ ۇشۋ الاڭىندا ورتەنىپ جاتقان ۇشاقتان ادامداردىڭ جانۇشىرا قاشىپ شىعىپ جاتقان ءساتى بەينەلەنگەن.
ءورت سالدارىنان ۇشاقتىڭ ارتقى بولىگى تۇتاس جانىپ كەتكەن. "سۋحوي" كومپانياسىنىڭ حابارلاۋىنشا، 2017 جىلى زاۋىتتان شىققان بۇل ۇشاق بيىل ساۋىردە تەحنيكالىق بايقاۋدان وتكىزىلگەن.
قازاقستان سىرتقى ىستەر مينيسترلىگى رەسەي استاناسىنداعى ۇشاق اپاتىندا قازا تاپقاندار اراسىندا قازاقستاندىقتار بار-جوعىن ءالى حابارلاعان جوق.
- رەسەيدە ۇشاق اپاتىنا بايلانىستى قىلمىستىق ءىس قوزعالىپ، اپات سەبەبىن انىقتاۋ ءۇشىن كوميسسيا قۇرىلدى.
- ماسكەۋدىڭ شەرەمەتەۆو اۋەجايى مامىردىڭ 5-ءى كۇنى كەشكە ۇشاق قابىلداۋدى شەكتەپ، باسقا جاقتان كەلگەن اۋە رەيستەرىنىڭ كوبىن دومودەدوۆو، نيجني نوۆگورود نەمەسە سانكت-پەتەربۋرگكە بۇردى.
- سۋحوي سۋپەردجەت – سسسر تاراعاننان كەيىن رەسەيدە جاڭادان جاسالعان العاشقى جولاۋشىلار ۇشاعى. جاقىن باعىتتار بويىنشا جولاۋشى تاسىمالداۋعا ارنالعان بۇل ۇشاقتى 2011 جىلدان بەرى بىرنەشە ەلدىڭ اۋە كومپانيالارى پايدالانىپ كەلەدى. رەسەيلىك سۋحوي سۋپەردجەت ۇشاعىنىڭ قاتىسۋىمەن وسىمەن جەتىنشى توتەنشە وقيعا تىركەلىپ وتىر. بۇعان دەيىن 2012 جىلى مامىردىڭ 9-ى كۇنى يندونەزيادا وسىنداي ۇشاق اپاتقا ۇشىراپ، 45 ادام (37 جولاۋشى مەن 8 ەكيپاج مۇشەسى) قازا تاپقان ەدى.
