قورعانىس مينيسترلىگىندە اسكەري پاراد جىل سايىن وتكىزىلۋى ءتيىس دەگەن رەگلامەنت جوق
بيىل وتان قورعاۋشىلار كۇنىنە ارنالعان اسكەري پاراد بولمايدى. قارۋلى كۇشتەردىڭ بولىمشەلەرى دايىندىقتارىن وقۋ-جاتتىعۋ كەزىندە كورسەتتى، دەپ حابارلادى قر قورعانىس مينيسترلىگىنىڭ ءباسپاسوز قىزمەتى Sputnik قازاقستان رەسمي ساۋالىنا.
"وتان قورعاۋشىلار كۇنىنە وراي اسكەري پاراد وتكىزۋ جوسپارلانىپ وتىرعان جوق",- دەپ جازىلعان قورعانىس مينيسترلىگىنىڭ جاۋابىندا.
بيىل قارۋلى كۇشتەر بولىمشەلەرى پارادىنىڭ ورنىنا "ايبالتا 2019" ستراتەگيالىق كوماندالىق-شتابتىق وقۋ-جاتتىعۋى ءوتتى. ول الماتى وبلىسىنداعى "قاراتال" پوليگونىندا ۇيىمداستىرىلعان بولاتىن.
"اسكەري شەرۋدەن باس تارتۋدىڭ ايتارلىقتاي سەبەبى جوق. بىزدە شەرۋدى جىل سايىن وتكىزۋ كەرەك دەگەن رەگلامەنت جوق. بيىل قارۋلى كۇشتەر بولىمشەلەرى پارادىنىڭ ورنىنا "ايبالتا 2019" ستراتەگيالىق كوماندالىق-شتابتىق جاتتىعۋى ءوتتى. جاتتىعۋ كەزىندە قازاقستاندىق اسكەر ءوزىنىڭ كۇش-قۋاتىن كورسەتتى", - دەدى قورعانىس مينيسترلىگىنىڭ ءباسپاسوز حاتشىسى سەرىك بورانباەۆ.
"ايبالتا 2019" وقۋ-جاتتىعۋى
بيىل "ايبالتا 2019" وقۋ-جاتتىعۋى اۋقىمدى بولدى. وعان سەگىز مىڭ اسكەري قىزمەتكەر، ءبىر جارىم مىڭنان استام جەردەگى تەحنيكا مەن 50-دەن استام اۋە تەحنيكاسى قاتىستى.
وقۋ-جاتتىعۋ اياقتالعان سوڭ، قازاقستان پرەزيدەنتى قاسىم-جومارت توقاەۆ اسكەردىڭ دايىندىعىنا جوعارى باعا بەردى. قارۋلى كۇشتەردىڭ بەدەلىن نىعايتا ءتۇسۋ ءۇشىن مەملەكەت تاراپىنان قولداۋ كورسەتۋدى جالعاستىراتىنىن ايتتى.
Sputnik.
