كوكشەتاۋداعى قىزۋى كوتەرىلىپ، باسى اۋىرعان №5510 اسكەري بولىمشەسىنىڭ ساربازدارى جاپپاي اۋرۋحاناعا ءتۇسىپ جاتىر. ولاردىڭ دەنى ينفەكتسيالىق اۋرۋحاناعا جاتقىزىلىپ، بەسەۋىنەن مەنينگوكوكك بەلگىلەرى انىقتالعانى ايتىلدى، دەپ حابارلايدى "ادىرنا" ۇلتتىق پورتالى.
ناۋقاستانعان ساربازدار سانى 44-كە جەتكەن. دارىگەرلەر ىشىندەگى ءبىر ساربازدىڭ جاعدايى اۋىر ەكەندىگىن ايتتى. قازىر بولىمشەدەگى بارلىق جاۋىنگەرلەر مەديتسينالىق تەكسەرۋدەن ءوتىپ جاتىر.
كتك تەلەارناسىنىڭ حابارلاۋىنشا, جاۋىنگەرلەر اۋىر جاعدايدا ەمحاناعا جەتكىزىلگەن:
"بىزگە اۋرۋحاناعا اكەلگەندە 40 گرادۋس تەمپەراتۋرا، بەزگەگى ۇستاپ، قالتىراپ تۇردى. التى ادام بىراق ءتۇستى، ودان سوڭ تاعى بىرنەشەۋى. ءبىر ساربازدىڭ جاعدايى مۇلدەم مۇشكىل بولدى. دەنەسى قۇرىسىپ، تارتىلىپ، ءتىپتى جۇرەگى توقتاپ بارىپ، ايتەۋىر دارىگەرلەر جانىن ساقتاپ قالدى. ءالى دە جانساقتاۋ بولىمشەسىندە جاتىر. ناقتى تولىق ەسىن جيدى دەپ ايتا المايمىن", - دەدى كوكشەتاۋ كوپسالالى اۋرۋحانانىڭ ديرەكتورى ساكەن قالىمجانوۆ.
قر ۇلتتىق ۇلان "ورتالىق" وڭىرلىك قولباسشىلىعى مەديتسينا باسقارماسىنىڭ باستىعى راشيد ءابىلماجىنوۆ جۇقپالى اۋرۋدىڭ قالاي تاراپ، قايدان كەلگەنى انىقتالىپ جاتقانىن جەتكىزدى:
"قازىر جۇقپالى اۋرۋلارعا قارسى شارالار جۇرگىزىپ جاتىر. اسكەري بولىمشەدە ساربازداردى جان-جاقتى تەكسەرەتىن مۇمكىندىك جوق. ءبىر دارىگەر عانا بار. ولاردىڭ بارلىعى بىردەي مەديتسينا بەكەتىندە ەمدەلە المايدى. ال ءتۇرلى ساراپتاما قورىتىندىسى دايىن بولعاننان كەيىن قىزمەتتىك تەكسەرىس جۇرگىزىلەدى. جاپپاي اۋرۋ سەبەبى انىقتالعان سوڭ كىنالى اسكەريلەردى انىقتايمىز".
قازىرگى ۋاقىتتا اسكەري بولىمشەدە شەكتەۋلەر ەنگىزىلىپ، ناۋقاستارمەن بايلانىستا بولعان 278 ساربازدىڭ تەكسەرىستەن وتكەنى حابارلاندى.
"ادىرنا" ۇلتتىق پورتالى
كوكشەتاۋ قالاسى
اسكەردەگى وقيعا
اسكەري سارباز
№5510 اسكەري بولىمشەسى
جۇقپالى اۋرۋلار
مەنينگوكوكك بەلگىلەرى
