گولليۆۋد رەسەيگە ۇلكەن ەكراندارعا ارنالعان فيلمدەردىڭ پيراتتىق كوشىرمەلەرىن ساتقانداردى انىقتادى. اتى اتالعان ەلدەردىڭ قاتارىندا قازاقستان دا بار. بۇل تۋرالى "ۆەدوموستي" باسىلىمى جاريالادى، دەپ حابارلايدى “ادىرنا” ۇلتتىق پورتالى.
اقپارات بويىنشا، ايىپتاۋ 21 شىلدە كۇنى الەمدىك پروكاتقا شىققان ەكى سەنساتسيالىق فيلم – "باربي" جانە "وپپەنگەيمەر" فيلمدەرىنە قاتىستى.
"گولليۆۋد ولاردى سۋ تاڭبالارى بويىنشا انىقتادى (سۋ تاڭباسى – ءمولدىر جازۋ، شاعىن گرافيكا جانە اۆتورلىق قۇقىقتى قورعايتىن لوگوتيپ). سۋ تاڭباسىن ديستريبيۋتور فيلمدەردىڭ كوشىرمەلەرىن كينوتەاترلارعا بەرۋ كەزىندە قويادى", - دەدى ەكى ءىرى كينوتەاتردىڭ جانە كينوپروكات كومپانياسىنىڭ توپ-مەنەدجەرلەرى.
ەسكە سالساق، 21 شىلدە كۇنى الەمدىك پروكاتقا شىققان گولليۆۋدتىق "باربي" مەن "وپپەنگەيمەر" اتتى تۋىندىلار رەسەي كينوتەاترلارىندا كورسەتىلمەيدى. ەڭ ءىرى شەتەلدىك كينوكومپانيالار – Walt Disney Company, Sony Pictures, Warner Bros, Paramount جانە Universal ۋكرايناداعى سوعىس قيمىلدارى باستالعاننان كەيىن رەسەيدەگى قىزمەتىن توقتاتقان ەدى.
