بىردەن ەكى ايەل العان جىگىتتىڭ ۆيدەوسى ناۋرىزدا الەۋمەتتىك جەلىلەردە تاراپ، قىزۋ تالقىعا تۇسكەن بولاتىن. كوپتەگەن ادام بۇل جاي حايپ دەپ، سەنبەگەن ەدى.
ءوزىن ەرجان مىرزا دەپ اتايتىن جىگىتتىڭ ەكى ايەلىنىڭ ءبىرى بولعان فاريزا ەسىمدى قىز رەداكتسيامىزعا حابارلاسىپ، بار جاعدايدى ءتۇسىندىرىپ، كومەك سۇرادى. ونىڭ سوزىنشە، فاريزا بۇگىندە ول ۇيدەن كەتىپ قالعان. ال باستاپقىدا كۇيەۋى تاعى ءبىر ايەل اكەلەتىنىنەن بەيحابار بولعان ەكەن.
- نەگىزى ءبىز ەكەۋىمىز ۇيلەنبەك بولعانبىز. 16 ناۋرىزدا «ءتاتتى شاي» بولدى. 17 ناۋرىزدا مەنى كەلىسىپ الىپ كەتتى. سول ساتتە كولىكتەن ءبىر قىزدى كورىپ قالدىم. بىراق تاعى ءبىر ايەل اكەلە جاتىر دەگەن وي بولمادى. ۇيىنە بارعان كەزدە ول قىز بالا كوتەرىپ قالعانىن ءبىلدىم. ول كەزدە قىزدىڭ جاسى 17-دە ەدى، قازىر 18-دە. ماعان جاعدايدى تۇسىندىرگەننەن كەيىن مەن قالدىم. بىراق ۇشەۋىمىز تۋرالى الەۋمەتتىك جەلىگە سالىپ جىبەرگەنىن قالامادىم. ءبىزدىڭ ءومىرىمىز تۋرالى الەۋمەتتىك جەلىگە سالۋىنا قارسى بولعان كەزىمدە مەنى ۇرىپ-سوعۋ باستالدى. قازىر ول ۇيدەن قاشىپ كەتتىم. ول ۇيدە تۇرمايمىن»، — دەيدى فاريزا.
ونىڭ سوزىنشە، بۇرىنعى كۇيەۋى ءالى كۇنگە دەيىن حابارلاسىپ كەزدەسۋدى سۇرايدى ەكەن.
- سۋرەتتەرىمىز بەن ۆيدەولارىمىزدى الەۋمەتتىك جەلىگە ءالى كۇنگە ۇشەۋىمىز ءبىر ۇيدە تۇراتىنداي سالىپ تاستايدى. تىكەلەي ەفيرلەرگە كىرىپ، مەن ءالى سول ۇيدە تۇراتىنداي ايتىپ وتىرادى. بىراق مەنىڭ ول ۇيدەن كەتكەنىمە ەكى ايداي ۋاقىت بولدى.
اجىراساتىنداي قالىڭ مال بەرۋ دەگەن سەكىلدى باسقا دا داستۇرلەر ورىندالمادى. اناسى ەكەۋى كەلىپ، «جاعدايىم جوق» دەپ ايتتى. مەن ەكى ايەل بولىپ تۇرمايمىن دەگەن كەزدە ماعان پىشاق تاقاپ، مەنى قورقىتتى. مەنى قورقىتىپ، ۇركىتۋمەن ۇستاپ وتىردى. پوليتسياعا، ىشكى ىستەر باسقارماسىنا دەيىن شاعىمداندىم. بىراق ەشكىم ەشنارسە ىستەي المادى. سەبەبى پوليتسەيلەر ول ونىڭ جەكە ءومىرى بولعاندىقتان، ەشنارسە ىستەي المايتىنىن ايتتى. وقيعا شىمكەنتتىڭ وزىندە بولعان. قازىر ول ەكىنشى ايەلىمەن تۇرىپ جاتىر، مەن وعان ەش قارسى ەمەسپى»، - دەيدى فاريزا.
فاريزا بۇرىنعى كۇيەۋى ونىڭ سۋرەتتەرىن پاراقشاسىنا سالماسا ەكەن دەگەن ءوتىنىشتى عانا ايتتى.
- مەنىڭ مازامدى الماسا دەيمىن. مەن ول ۇيدە تۇرماسام دا بۇرىنعى فوتو، ۆيدەولارىمىزدى پايدالانىپ، ءالى كۇنگە دەيىن ۇشەۋىمىز بىرگە ءبىر ۇيدە تۇراتىنداي سالىپ ءجۇر. ونىڭ ءبارى الەۋمەتتىك جەلىدە وقىرمان جيناۋ ءۇشىن ىستەپ وتىر. مەن وعان قارسىمىن، سەبەبى مەنىڭ ءوز ءومىرىم، بولاشاق ءومىرىم بار شىعار؟ مەنى كورگەن ادامدار بەتىمە باسقانىن قالامايمىن. الەۋمەتتىك جەلىدە سالعان سۋرەتىندە مەنىڭ كوزىم كوگەرىپ تۇر. سەبەبى مەن ونىڭ الدىندا سالما دەپ قارسى بولعان ەدىم. وسىلايشا، مەنى ۇرىپ جىبەرگەن. قازىر ەكىنشى ايەلى دە ماعان حابارلاسىپ، مازاقتاپ، كۇيەۋى ەكەۋى بىرىگىپ، ارنارسە ايتادى. وسى كۇنگە دەيىن ەكى اي بويى ەشتەڭە دەمەدىم. ال قازىر شەگىنە جەتتى. جاسىرىن نومىرمەن حابارلاسىپ، بالاعات سوزدەر ايتادى، - دەپ قىنجىلدى فاريزا.
ال پوليتسيا وكىلدەرى بۇعان قاتىستى بىلاي دەپ جاۋاپ بەرگەن:
"بۇل دەرەك اۋداندىق پوليتسيا باسقارماسىنا تىركەۋگە الىنىپ، جان-جاقتى تەكسەرۋ جۇمىستارى جۇرگىزىلدى. ىستە قىلمىس قۇرامى بولماۋىنا بايلانىستى قورعاۋ نۇسقاماسىن شىعارۋ ءۇشىن جەرگىلىكتى پوليتسيا بولىمىنە جولداندى. قازىرگى تاڭدا كۇدىكتىنىڭ بۇرىنعى وتباسىلىق سۋرەتتەرىن الەۋمەتتىك جەلىلەرگە سالعانى بويىنشا تەكسەرۋ جۇمىستارى جالعاسىپ جاتىر", - دەلىنگەن شىمكەنت قالاسى پوليتسيا دەپارتامەنتىنىڭ Massaget.kz تىلشىسىنە بەرگەن رەسمي جاۋابىندا.
"ادىرنا" ۇلتتىق پورتالى
