22 ناۋرىزدا قازاقستان استاناسىنىڭ اتىن "نۇر-سۇلتان" دەپ وزگەرۋىنە "قارسىلىق بىلدىرگەن سوڭ وقۋىنان شىعارىلعانى" حابارلانعان 16 جاستاعى ستۋدەنت تۋرالى ءبىلىم ءمينيسترى كۇلاش ءشامشيدينوۆا پىكىر ءبىلدىردى. بۇل تۋرالى "قازاقپارات" اگەنتتىگى حابارلادى.
ءمينيستردىڭ سوزىنشە، "بالانى وقۋدان شىعارۋ تۋرالى ارىزدى اتا-اناسىنىڭ ءوزى تۇسىرگەن".
ء"بىز ول جايىندا ەكى كۇن بۇرىن ەستىدىك. دامير دەگەن جىگىت. ونىڭ ماسەلەسىن زەردەلەۋدى باستادىق. بىزگە تۇسكەن اقپاراتقا سايكەس، ستۋدەنتتىڭ اتا-انالارى بالاسىن الىپ كەتۋ تۋرالى ءوتىنىشتى وزدەرى بەرگەن. دەگەنمەن، قازىر ءبىز ءوزىمىز تەكسەرىپ جاتىرمىز. ەگەر ونى زاڭسىز وقۋدان شىعارسا، زاڭ بويىنشا ءتيىستى شارالار قولدانىلادى" دەيدى ءشامشيدينوۆا.
بىراق ازاتتىقپەن سويلەسكەن وقۋدان شىققان بالانىڭ اناسى ميرا دجانۇزاقوۆا مينيستر ءسوزىن "وتىرىك" دەدى.
- جوق. ولار ءسويتىپ الداپ جاتىر. مەكتەپتىڭ ءوزى ەكى اي وقىتۋعا زورعا الدى. [كوللەدج اكىمشىلىگى بىزبەن] سويلەسكەن جوق، بىردەن شىعارىپ جىبەردى. قول قويدىق. "شىعىڭدار" دەدى. ءوز بالامدى وقۋدان شىعارىپ قايتەم؟ - دەدى اناسى.
قازاقستان پرەزيدەنتى قىزمەتىنە 20 ناۋرىزدا كىرىسكەن قاسىم-جومارت توقاەۆ استاناعا نۇرسۇلتان نازارباەۆتىڭ اتىن بەرۋدى ۇسىنعان. بىرنەشە كۇننەن سوڭ، 23 ناۋرىزدا، جارلىققا قول قويدى.
ۇسىنىسقا قازاقستاندىقتار ءارتۇرلى رەاكتسيا تانىتتى: جەرگىلىكتى بيلىك قازاقستان قالالارىندا استانا اتاۋىنىڭ وزگەرۋىن قولداعان كونتسەرتتەر وتكىزدى, ال الەۋمەتتىك جەلىدە ءتۇرلى بەلسەندىلەر بۇعان قارسىلىق بىلدىرگەن. پوليتسيا 22 ناۋرىزدا "نۇر-سۇلتان" اتاۋىنا قارسى بىرنەشە تۇرعىندى ۇستاعان.
