رەسەيلىك ءانشى گريگوري لەپستىڭ كونتسەرتتەرى وزبەكستان مەن قىرعىزستاندا دا وتپەيتىن بولدى. بارلىق دايىندىق قازاقستاننىڭ قارسىلىعىنان كەيىن توقتاتىلدى، دەپ حابارلايدى "ادىرنا" ۇلتتىق پورتالى.
رەسەيدىڭ باسقىنشىلىق ارەكەتىن اشىق قولدايتىن ءانشى لەپستىڭ ونەرىن تاماشالاۋدان وزبەكستان حالقى دا باس تارتتى. 23 قازان كۇنىنە جوسپارلانعان كونتسەرتكە حالىق جاپپاي قارسى شىعىپ، الەۋمەتتىك جەلىلەردە ارنايى ناۋقان ۇيىمداستىردى.
ەستەرىڭىزگە سالا كەتەيىك، بۇعان بۇرىن وزبەكستاندىق بلوگەر ميرزو زيمني ءوزىنىڭ Telegram-ارناسىندا #lepskerakmas (#لەپسنەنۋجەن) حەشتەگىن جازىپ، قوعامدىق سىلكىنىس تۋدىرعان بولاتىن.
وسى جازبادان كەيىن گريگوري لەپستىڭ كونتسەرتتىك حابارلاندىرۋى Ticket.uz سايتتىنان الىنىپ تاستالدى.
مۇنداي "ورتا ازيالىق" ناۋقانعا قىرعىزستاندىقتار دا قوسىلدى. شولپان اتا ويىن-ساۋىق ورىندارىنىڭ بىرىندە ونەر كورسەتۋدى جوسپارلاعان لەپستىڭ بۇل مەكەندە دە دەگەنى بولمادى. مىڭداعان تەرىس پىكىرلەرگە بايلانىستى كونتسەرتتى ۇيىمداستىرۋشىلار پلاكاتتاردى الىپ تاستاپ، لەپستىڭ ونەر كورسەتپەيتىندىگىن راستادى.
ەستەرىڭىزگە سالا كەتەيىك، گريگوري لەپس شىلدە ايىندا قازاقستاننىڭ قوناەۆ قالاسىندا ونەر كورسەتۋى كەرەك ەدى. بۇعان قاتىستى قوعام بەلسەندىگى ارمان شوراەۆ باس كوتەرىپ، گريگوري لەپس كەشىنىڭ شىرقىن بۇزعانعا ءوز قالتاسىنان ءبىر ميلليون تەڭگە تولەيتىنىن مالىمدەدى. كەيىنىرەك ۋكراينالىق ورىنداۋشىلار چەللەندجگە قوسىلدى. مىسالى، ولگا پولياكوۆا ءوزىنىڭ Instagram پاراقشاسىندا گريگوري لەپستىڭ بەتىنە تۇكىرگەن ازامات ءۇشىن مىڭ نە 2 مىڭ دوللار ۇسىناتىنىن حابارلادى.
ناتيجەسىندە، قوناەۆتا رەسەيلىك ءارتىستىڭ كونتسەرتى توقتاتىلدى. مۇنداي قادامداردان كەيىن لەپستىڭ ۇجىمى قازاقستان حالقىن كۇستانالاپ، ديرەكتورى قازاقستاندى "دوستىققا جۇعىمسىز ەل" دەپ ايىپتادى.
"ادىرنا" ۇلتتىق پورتالى
