تۇركيانىڭ ىستامبۇل قالاسىندا تەحنوفەست اەروعارىش جانە تەحنولوگيالىق فەستيۆالى ءوتتى. بيىل ايتۋلى شارا تۇركيا رەسپۋبليكاسىنىڭ قۇرىلعانىنا 100 جىلدىعىنا ارنالدى.
تەحنوفەستتىڭ نەگىزگى ماقساتى وسكەلەڭ ۇرپاقتىڭ تەحنولوگياعا دەگەن قىزىعۋشىلىعىن ارتتىرۋ ءارى تۇركيانى تەحنولوگيانى وندىرەتىن جانە دامىتاتىن ەل رەتىندە الەمگە تانىتۋ.
شاراعا قاتىسۋشى ءارى ونى ۇيىمداستىرۋشىلاردىڭ ءبىرى - تۇرىك اسكەري اۋە تەحنيكالارىن ءوندىرۋشى سەلجۇك بايراكتار تەنحوفەستتىڭ كوكجيەگى جىلدان جىلعا كەڭەيىپ كەلە جاتقانىن ايتتى.
سەلجۇك بايراكتار، Baykar Makina كومپانياسىنىڭ تەحنيكالىق ديرەكتورى:
«تەحنوفەست تاۋەلسىز تۇرىك ەلىنىڭ جوباسى. فەستيۆالدىڭ بولاشاعى بار. بيىل ءبىز التىنشى رەت ۇيىمداستىرىپ جاتىرمىز. وتكەن جىلى ءازىربايجاندا وتكىزگەن بولاتىنبىز. ال كەلەشەكتە باۋىرلاس ەلدەردە ۇيىمداستىراتىن بولامىز. «قىزىل الما» دەپ اتالاتىن اسكەري اۋە اپپاراتىمىزدان كەيىن ۇشاتىن كولىك جانە عارىش اپپاراتتارىنا دەن قويۋىمىز مۇمكىن. بۇل قازىرگى زامان تالابى» دەدى.
بيىلعى فەستيۆالدەگى كورمەگە ازاماتتىق جانە اسكەري اۋە تەحنيكانىڭ ءتۇر-ءتۇرى قويىلعان. مۇندا ۇشاقتىڭ، تىكۇشاقتىڭ جانە ۇشقىشسىز باسقارىلاتىن تەحنيكالاردىڭ ونداعان بىرلىگى كوپشىلىككە تانىستىرىلدى. اسىرەسە اڭىزعا اينالعان «بايراكتار» ۇشقىشسىز اسكەري اۋە اپپاراتىنا كوپتىڭ قىزىعۋشىلىعى جوعارى. ال ونى قۇراستىرۋشى سەلجۇك بايراكتار بولاشاقتا قازاق ەلىندە دە مۇنداي فەستيۆالدىڭ ءوتۋى مۇمكىن دەدى.
«ءبىزدىڭ فەستيۆال مامىردىڭ باسىنا دەيىن جالعاسادى. باۋىرلاس قازاق ەلىن وسى جەردەن كورگىم كەلەدى. ءبىز ءتۇبى ءبىر ەلمىز. ال، كەلەشەكتە ەكى ەلدىڭ جارقىن بولاشاعى ءۇشىن تەحنوفەستى بىرىگىپ ءسىزدىڭ ەلدە دە ۇيىمداستىرۋعا بولادى» دەدى ول.
ءىرى اۆياتسيالىق شوۋعا اسىرەسە ستۋدەنتتەرمەن مەكتەپ وقۋشىلارىنىڭ قىزىعۋشىلىعى زور. سوندىقتان ولار وسى كۇندەردى جىل بويى كۇتەمىز دەيدى.
عىلىم مەن تەحنولوگيالىق وندىرىسكە ارنالعان مەرەكە 28 ءساۋىر مەن 1 مامىر ارالىعىندا ىستامبۇلدىڭ اتاتۇرىك اۋەجايىندا، ال انكارادا 30 تامىز بەن 3 قىركۇيەك ارالىعىندا وتپەك.
عاني وتەپبايۇلى، ىستامبۇل
